រថយន្ត
អន្តរជាតិ
ទណ្ឌកម្មសេដ្ឋកិច្ចពីអាមេរិក នាំឲ្យទីផ្សារយានយន្តអ៊ីរ៉ង់ ពិបាកបោះជំហានទៅមុខ
× ទីផ្សារយានយន្តអ៊ីរ៉ង់កំពុងប្រឈមខ្លាំងនៅដំណាក់កាលថ្មីនេះ ដោយសារតែក្រុមហ៊ុនបរទេសជាច្រើននឹងដកខ្លួនចេញក្រោយការដាក់ទណ្ឌកម្មសេដ្ឋកិច្ចរបស់សហរដ្ឋអាមេរិក ដែលចូលជាធរមាននៅខែសីហា ខាងមុខ។ ទោះបីជាអ៊ីរ៉ង់មានរោងចក្រក្នុងស្រុកផ្ទាល់ខ្លួនក៏ដោយ ប៉ុន្តែពួកគេទំនងជាពិបាកដើរដោយខ្លួនឯង ហើយត្រូវប្រឈមជាមួយនឹងឥទ្ធិពលក្រុមហ៊ុនចិនថែមទៀត។ នេះបើតាមការផ្សាយរបស់ Forbes.com ។
អ៊ីរ៉ង់ស្ថិតក្នុងចំណាត់ថ្នាក់ទី១២ លើការផលិតយានយន្តនៅលើពិភពលោក។ នេះបើតាមទិន្នន័យរបស់អង្គការសហគ្រាសយានយន្តអន្តរជាតិ (OICA) ដោយផលិតបានរថយន្តដឹកអ្នកដំណើរប្រមាណ១.៤លានគ្រឿងនៅឆ្នាំ២០១៧ ។
កាលពីឆ្នាំមុនផងដែរ ទីផ្សារយានយន្តអ៊ីរ៉ង់ មានកំណើន១៨ភាគរយ ដោយតាមពីក្រោយចក្រភពអង់គ្លេស ហើយនាំមុខរុស្ស៊ី និងតួកគី។ តាមរបាយការណ៍ អ៊ីរ៉ង់ឈរលើចំណាត់ថ្នាក់ទី១០លើការលក់យានយន្តនៅលើទីផ្សារ តាមរយៈការលក់ប្រភេទរថយន្តដឹកអ្នកដំណើរកើនពី១.១លានគ្រឿងនៅឆ្នាំ២០១៥ ដល់១.៦លានគ្រឿងនៅឆ្នាំ២០១៧។
បើទោះបីជា Peugeot និង Renault មានភាពលេចធ្លោក៏ដោយ តែទីផ្សារក្រុមហ៊ុនយានយន្តក្នុងស្រុកដែលរួមមាន Iran Khodro និង Saipa មានការឈានមុខយ៉ាងខ្លាំងនារយៈពេលប៉ុន្មានឆ្នាំចុងក្រោយនេះ។
ទំនាស់ការទូតរវាងអាមេរិក និងអ៊ីរ៉ង់ បើគិតចាប់តាំងពីលោកប្រធានាធិបតី ដូណាល់ ត្រាំ ឡើងកាន់តំណែង បានធ្វើទីផ្សារយានយន្តអ៊ីរ៉ង់ ហាក់ដូចជាកំពុងដាំក្បាលចុះ។ ការដាក់ទណ្ឌកម្មអាមេរិក បានប៉ះពាល់ដល់ក្រុមហ៊ុនលោកខាងលិច។
ខណៈ General Motors និង Ford មិនសូវមាននៅលើទីផ្សារអ៊ីរ៉ង់ ក្រុមហ៊ុន Renault និង PSA Group ដែលជាក្រុមហ៊ុនមេរបស់ Peugeot និង Citroen រួមទាំងក្រុមហ៊ុន Brands ផ្សេងទៀត ក៏កំពុងពិចារណាដកខ្លួនចេញផងដែរ។
ទោះបីជាយ៉ាងណាក៏ដោយ ក្រុមហ៊ុនអឺរ៉ុបជាច្រើន សុទ្ធតែបានបង្កើតកិច្ចសហការជាមួយក្រុមហ៊ុនក្នុងស្រុក។ កាលពីខែសីហា ឆ្នាំមុន Volkswagen បានសហការជាមួយ Mammut Khodro ក្នុងការផលិតរថយន្តម៉ាក Tiguan និង Passat រីឯ ក្រុមហ៊ុនអាល្លឺម៉ង់ Daimler ប្រកាសគម្រោងសហការជាមួយ Iran Khodro Diesel និង Mammut Group ក្នុងផលិតរថយន្ត Mercedes-Benz ប្រភេទដឹកទំនិញ ។
ប្រសិនបើទណ្ឌកម្មអាមេរិកពិតជាជះឥទ្ធិពលលើសហគ្រាសយានយន្តអឺរ៉ុបពិតមែននោះ ក្រុមហ៊ុនក្នុងស្រុក នឹងបន្តបង្ហាញសាច់ដុំរបស់ខ្លួន។ តែយ៉ាងណាក៏ដោយ ទីផ្សារក៏មិនអាចធំទូលាយដូចមុនផងដែរ បន្ថែមពីលើនេះទៀត វាហាក់ដូចជាការបើកដៃឲ្យក្រុមហ៊ុនបន្តពង្រីកទីផ្សាររបស់ខ្លួនបន្ថែមនៅអ៊ីរ៉ង់។
កាលពីឆ្នាំ២០១៦ ក្រុមហ៊ុនយានយន្តចិនចំនួន៤ រួមមាន Chery, JAC, Lifan និង Brilliance លក់ចេញរថយន្តបានរហូតដល់ជាង១០ម៉ឺនគ្រឿង។ សរុបជារួម ទីផ្សារយានយន្តចិននៅអ៊ីរ៉ង់ កើនពី៣ភាគរយនៅឆ្នាំ២០១១ មក១៥ភាគរយននៅឆ្នាំ២០១៦ ៕
© រក្សាសិទ្ធិដោយ thmeythmey.com