អាល្លឺម៉ង់​ចោទថា រដ្ឋបាល​ត្រាំ​កំពុង​ព្យាយាម​លូកលាន់​កិច្ចការ​នយោបាយ​ផ្ទៃក្នុង​ខ្លួន​
អន្តរជាតិ
អាល្លឺម៉ង់​ចោទថា រដ្ឋបាល​ត្រាំ​កំពុង​ព្យាយាម​លូកលាន់​កិច្ចការ​នយោបាយ​ផ្ទៃក្នុង​ខ្លួន​
06, Jun 2018 , 9:39 pm        
រូបភាព
​ឯកអគ្គរដ្ឋទូត​អាមេរិក​ប្រចាំ​អាល្លឺម៉ង់​រង​ការរិះគន់ និង​ចោទប្រកាន់​ផងដែរ​ពី​សំណាក់​រដ្ឋាភិបាល​អាល្លឺម៉ង់ ក្រោយ​មន្ត្រី​ទូត​ជាន់ខ្ពស់​រូបនេះ​ប្រកាសថា​ខ្លួន​មានបំណង​គាំទ្រ​បណ្តា​អ្នកនយោបាយ​អភិរក្ស​ទូទាំង​អឺរ៉ុប​។ មិន​ត្រឹមតែ​ប៉ុណ្ណោះ​លោក​ក៏បាន​អញ្ជើញ​អធិការបតី​អូទ្រីស​ដែលជា​អ្នកនយោបាយ​អភិរក្ស​ទៅកាន់​ស្ថានទូត​អាមេរិក​នៅ​អាល្លឺម៉ង់​ថែមទៀត​។



​រដ្ឋាភិបាល​អាល្លឺម៉ង់​កំពុង​ទាមទារ​ឲ្យ​សហរដ្ឋអាមេរិក​បកស្រាយ​ជុំវិញ​ពាក្យសម្តី​របស់​អគ្គរដ្ឋទូត​អាមេរិក​ប្រចាំ​អាល្លឺម៉ង់​លោក Richard Grenell និង​ឥរិយាបថ​មួយចំនួន​របស់លោក​ដែល​អាចជា​ផ្នែក​មួយ​នៃ​ការជ្រៀតជ្រែក​កិច្ចការ​នយោបាយ​អាល្លឺម៉ង់​ផង​នោះ​។

​បើតាម​ទីភ្នាក់ងារ​ព័ត៌មាន AFP លោក Richard Grenell ដែលជា​អគ្គរដ្ឋទូត​ដែល​ត្រូវ​លោក ដូ​ណា​ល់ ត្រាំ តែងតាំង​ផ្ទាល់​នោះបាន​ផ្តល់​បទសម្ភាសន៍​មួយ​ជាមួយ​ទស្សនា​វ​ដ្តី Breitbart ថា លោក​ចង់​បង្កើន​អំណាច​ក្រុម​អ្នកនយោបាយ​អភិ​រក្សា​នៅ​ពាសពេញ​តំបន់​អឺរ៉ុប​ដែល​កំពុង​ប្រឆាំងនឹង​ស្ថានភាព​នយោបាយ​បច្ចុប្បន្ន​ផង​នោះ​។​

​ក្រោយពី​លើកឡើង​បែបនេះហើយ មន្ត្រី​ទូត​ជាន់ខ្ពស់​រូបនេះ​ស្រាប់តែ​ចេញ​លិខិតអញ្ជើញ​អធិការបតី​អូទ្រីស​លោក Sebastian Kurz ដែល​នឹង​បំពេញ​ទស្សនកិច្ច​នៅ​អាល្លឺម៉ង់​នៅ​សប្តាហ៍​ក្រោយ​ឲ្យ​ជួបពិភាក្សា​ជាមួយ​លោក​នៅ​ស្ថានទូត​អាមេរិក​នៅ​អាល្លឺម៉ង់​ទៀត​។ គេ​ដឹង​ច្បាស់​ថា​លោក Sebastian Kurz ជា​អ្នកនយោបាយ​អភិរក្ស​ដែល​កំពុង​ដឹកនាំ​រដ្ឋាភិបាលចម្រុះ​ដែលមាន​បក្ស​ស្តាំនិយម​ជ្រុល និង​បក្ស​អភិរក្ស​ផងដែរ​។​

​ពាក់ព័ន្ធ​នឹង​ការផ្តល់​យោបល់​និង​អញ្ជើញ​មេដឹកនាំ​បរទេស​នៅលើ​ទឹកដី​អាល្លឺម៉ង់​នេះ ក្រសួងការបរទេស​អា​ល្លឺ​ម៉​ង់​បានទាមទារ​ឲ្យ​ភាគី​អាមេរិក​បកស្រាយ​ពាកព័ន្ធ​ជំហរ​អាមេរិក​ក្នុង​បញ្ហា​នេះ ហើយ​ខាង​អ្នកនយោបាយ​ប្រឆាំង​នៅ​អាល្លឺម៉ង់​បាន​ចោទថា លោ Grenell នេះ​កំពុង​ព្យាយាម​លូកលាន់​កិច្ចការ​នយោបាយ​អាល្លឺម៉ង់​ហើយ​។

​អតីត​មេដឹកនាំ​បក្ស​កណ្តាល​និយម​លម្អៀង​ឆ្វេង សង្គម​ប្រជាធិបតេយ្យ (SPD) លោក Martin Schulz បាន​ចាត់ទុកថា ឥរិយាបថ​របស់​មន្ត្រី​ទូត​អាមេរិក​ខាងលើ​មិន​ខុសពី​ម្ចាស់​អាណានិគម​ឡើយ ហើយ​លោក​ក៏បាន​ទាមទារ​ឲ្យ​អាមេរិក​ដក​ឯកអគ្គរ​ដ្ឋ​ទូត​របស់ខ្លួន​ទៅវិញ​ផងដែរ​។ លោក Schulz ជឿថា បើសិនជា​ទូត​អាល្លឺម៉ង់​នៅ​អាមេរិក​ហ៊ាន​និយាយ​ដូច​ទូត​អាមេរិក​នៅ​អាល្លឺម៉ង់​នេះ​ច្បាស់​ជា​ត្រូវ​អាមេរិក​បណ្តេញចេញ​ភ្លាមៗ​មិន​ខាន​។ 

«​បើសិនជា​ឯកអគ្គរដ្ឋទូត​អាល្លឺម៉ង់​នៅ​វ៉ាស៊ីនតោន​ហ៊ាន​និយាយថា ខ្ញុំ​មក​ទីនេះ​ដើម្បី​ជួយ​ពង្រឹង​បក្ស​ប្រជាធិបតេយ្យ ខ្ញុំ​ច្បាស់​ណាស់​ថា អ្នកការទូត​រូបនេះ​ត្រូវ​អាមេរិក​បណ្តេញចេញ​ភ្លាម​»​។ លោក Schulz អះអាង​ដូច្នេះ​។

​យ៉ាងណាក៏ដោយ ក្រសួងការបរទេស​អា​មេ​រិ​ក​មិន​ចាប់អារម្មណ៍​នឹង​ការទាមទារ​របស់​អាល្លឺម៉ង់​ឡើយ ហើយ​គេ​ថែមទាំង​ការពារ​សិទ្ធិ​បញ្ចេញមតិ​របស់​មន្ត្រី​ទូត​ខ្លួន​ថែមទៀត​។ អ្នកនាំពាក្យ​ក្រសួងការបរទេស​អាមេរិក​លោកស្រី Heather Nauert បាន​ប្រាប់​អ្នកសារព័ត៌មាន​នៅ​ថ្ងៃទី ៥ ខែមិថុនា​ថា លោក Grenell មាន​សិទ្ធិ​ក្នុងការ​បញ្ចេញ​មតិយោបល់​ផ្ទាល់ខ្លួន​។

«​គេ​ជា​អ្នកតំណាង​របស់​សេត​វិមាន ទោះជា​រដ្ឋបាល​បច្ចុប្បន្ន ឬ​រដ្ឋបាល​ផ្សេងទៀត​ក៏ដោយ ហើយ​យើង​តែងតែ​លឺ​មតិយោបល់​របស់​ពួកគេ​។ ពេលខ្លះ​វា​ជា​មតិយោបល់​ដែល​អ្នក​ផ្សេងទៀត​ចូលចិត្ត ឬ​អាច​ថា​មិន​ចូលចិត្ត​ផង​។ ហើយ​នេះ​ជា​សិទ្ធិ​នៃ​ការបញ្ចេញមតិ​ដោយ​សេរី​»៕



Tag:
 អាល្លឺម៉ង់​
  អាមេរិក​
  អូទ្រីស​
  អភិរក្សនិយម
© រក្សាសិទ្ធិដោយ thmeythmey.com