សាខាធ្វើលិខិតឆ្លងដែនធម្មតាគំរូថ្មី ក្នុងខេត្តបី ត្រូវបានដាក់ឲ្យដំណើរការ

ជាតិ

សាខាធ្វើលិខិតឆ្លងដែនធម្មតាគំរូថ្មី ក្នុងខេត្តបី ត្រូវបានដាក់ឲ្យដំណើរការ

06, Jun 2018 , 9:59 pm

រូបភាព

ដោយ:

ភ្នំពេញ៖ សាខាធ្វើលិខិតឆ្លងដែនធម្មតាគំរូថ្មី នៅខេត្តបាត់ដំបង បន្ទាយមានជ័យ និងកោះកុង បានបើកដំណើរការ នៅថ្ងៃទី៦ ខែមិថុនា នេះ។ អគ្គនាយកដ្ឋានអត្តសញ្ញាណកម្ម បញ្ជាក់ថា ការដាក់ឲ្យដំណើរការនូវសាខាទាំងនេះ គឺដើម្បីលើកកម្ពស់ការផ្ដល់សេវាលិខិតឆ្លងដែនធម្មតា ជូនប្រជាពលរដ្ឋឲ្យកាន់តែមានប្រសិទ្ធភាព និងឆាប់រហ័ស។

អត្ថបទទាក់ទង

តម្លៃលិខិតឆ្លងដែនថ្មី៖ ១៥ថ្ងៃ១០០ដុល្លារ ៧ថ្ងៃ១៥០ដុល្លារ រីឯ១ថ្ងៃ២០០ដុល្លារ!

អគ្គនាយករងនៃអគ្គនាយកដ្ឋានអត្តសញ្ញណកម្ម លោកឧត្តមសេនីយ៍ឯក ប្រុក ម៉ៃឧត្ដម បានឲ្យដឹងថា សាខាខាងលើបានដំណើរការធ្វើលិខិតឆ្លងដែនគំរូចាស់យូរមកហើយ មិនមែនទើបតែឥឡូវនេះទេ ហើយការដាក់ឲ្យដំណើរថ្ងៃនេះជាលិខិតឆ្លងដែនធម្មតាគំរូថ្មី ដែលបានបំពាក់ប្រព័ន្ធឧបករណ៍ទំនើបគ្រប់គ្រាន់។

លោក បន្តថា នៅឆ្នាំ២០១៤ អគ្គនាយកដ្ឋានអត្តសញ្ញណកម្ម បានដាក់ឲ្យដំណើរការលិខិតឆ្លងដែនធម្មតាគំរូថ្មីម្ដងរួចមកហើយនៅសាខាទាំងបីខាងលើ ប៉ុន្តែនៅពេលនោះការប្រើប្រាស់ប្រព័ន្ធឧបករណ៍ចាស់មិនស្គាល់គំរូថ្មី ដូច្នេះការធ្វើលិខិតឆ្លងដែនធម្មតាគំរូថ្មីក៏បានផ្អាកមួយរយៈ ដោយសារមិនទាន់មានឧបករណ៍ទំនើបគ្រប់គ្រាន់។

លោក បានបន្ថែមថា នៅពេលផ្អាកមួយរយៈនោះ មានតែសាខាខេត្តបាត់ដំបង និងបន្ទាយមានជ័យទេ ដែលបានដំណើរការផ្ដល់លិខិតធ្វើដំណើរទៅក្រៅប្រទេសសម្រាប់តែពលករប៉ុណ្ណោះ។ លោក បញ្ជាក់យ៉ាងដូច្នេះថា៖«ការផ្ដល់នេះមិនមែនជាលិខិតឆ្លងដែនធម្មតាសម្រាប់ផ្ដល់ទៅប្រជាពលរដ្ឋទូទៅឡើយ គឺសម្រាប់តែពលករ ជាសៀវភៅខ្មៅ»។

បើតាមការផ្ដល់បទសម្ភាសដល់សារព័ត៌មានថ្មីៗតាមទូរសព្ទ អគ្គនាយករងរូបនេះ បានថ្លែងថា ចាប់ពីថ្ងៃនេះតទៅ មិនថាប្រជាពលរដ្ឋទូទៅ ឬពលករទេ គឺអាចទៅធ្វើលិខិតឆ្លងដែនធម្មតាគំរូថ្មី នៅសាខាខេត្តបាត់ដំបង និងបន្ទាយមានជ័យបានដូចគ្នា ពីព្រោះនៅសាខាទាំងពីរបានបំពាក់ឧបរណ៍ទំនើបគ្រប់គ្រាន់។ ចំណែកឯសាខាមួយទៀតនៅខេត្តកោះកុង មិនមានពលករដែលត្រូវចេញទៅធ្វើការនៅប្រទេសថៃ ដូចខេត្តទាំងពីរខាងលើនេះទេ ដូច្នេះប្រជាពលទូទៅអាចធ្វើបានដូចគ្នាដោយបានបំពាក់ឧបករណ៍ទំនើបដូចខេត្តទាំងនេះផងដែរ។

លោក ប្រុក ម៉ៃឧត្ដម បានបន្ថែមទៀតថា ចំពោះរយៈពេលផ្ដល់លិខិតឆ្លងដែនធម្មតាគំរូថ្មី គឺរហ័សរយៈពេល ១ថ្ងៃ នៃថ្ងៃធ្វើការសម្រាប់នៅរាជធានីភ្នំពេញ ហើយចំណែកនៅតាមសាខាទាំង៣ខាងលើ មានរយៈពេល ៣ថ្ងៃ នៃថ្ងៃធ្វើការ។

មន្ត្រីបម្រើការងារនៅសាខាខេត្តបន្ទាយមានជ័យ ប្រាប់សារព័ត៌មានថ្មីៗតាមទូរសព្ទថា ថ្ងៃដំបូងនៃដំណើរការផ្ដល់សាវាលិខិឆ្លងដែនធម្មតាជូនប្រជាពលរដ្ឋ សាខាក្រុងប៉ោយប៉ែត ខេត្តបន្ទាយមានជ័យ មានប្រជាពលរដ្ឋជិត ១០០នាក់។ ឯមន្ត្រីសាខាខេត្តកោះកុង អះអាងថា ក្រុងខេមរភូមិន្ទ កោះកុង មានប្រជាពលរដ្ឋ២០នាក់។ ចំណែកមន្ត្រីសាខាខេត្តបាត់ដំបង មិនបានលើកទូរសព្ទនោះទេ។

សូមបញ្ជាក់ថា អាសយដ្ឋានសាខាផ្តល់សេវាលិខិតឆ្លងដែនធម្មតាគំរូថ្មី នៅតាមខេត្តចំនួន៣នេះ រួមមាន ខេត្តបាត់ដំបង ស្ថិតនៅដីឡូតិ៍លេខ F29 ភូមិជំនីក ឃុំអន្លង់វិល ស្រុកសង្កែ, ខេត្តបន្ទាយមានជ័យ ស្ថិតនៅភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត ហើយខេត្តកោះកុង ស្ថិតនៅភូមិលេខ៤ សង្កាត់ដងទង់ ក្រុងខេមរភូមិន្ទ៕