មន្ត្រីជំនាញ អំពាវនាវឲ្យឈប់ដុតថង់ប្លាស្ទិក ព្រោះអាចប៉ះពាល់ដល់អាយុជីវិត

ជាតិ

សុខភាព

មន្ត្រីជំនាញ អំពាវនាវឲ្យឈប់ដុតថង់ប្លាស្ទិក ព្រោះអាចប៉ះពាល់ដល់អាយុជីវិត

06, Jun 2018 , 5:26 pm

រូបភាព

លោក ស៊ូ សាវុធ អនុរដ្ឋលេខាធិការ នៃក្រសួងបរិស្ថាន។ រូបពីក្រសួងបរិស្ថាន

ដោយ: អ៊ូ សុខមាន (OU Sokmean)

លោក ស៊ូ សាវុធ អនុរដ្ឋលេខាធិការ នៃក្រសួងបរិស្ថាន មានប្រសាសន៍ក្នុងពិធីប្រារព្ធទិវាបរិស្ថានជាតិ និងបរិស្ថានពិភពលោក នៅថ្ងៃទី៥ ខែមិថុនា ឆ្នាំ២០១៨ ថា ការដុតសំរាមថង់ប្លាស្ទិក គឺជាការគំរាមកំហែងយ៉ាងធ្ងន់ធ្ងរទៅដល់អាយុជីវិត មនុស្ស សត្វ និងបំផ្លាញបរិស្ថាន។

មន្ត្រីរូបនេះ បានបញ្ជាក់ថា មនុស្ស សត្វ ដែលស្រូបយកឧស្ម័នពីការដុតសំណល់ថង់ប្លាស្ទិក អាចបង្កជាជំងឺមហារីក ជំងឺបេះដូង ផ្លូវដង្ហើម ព្រមទាំងប៉ះពាល់ដល់ស្រទាប់អូហ្សូន ខណៈដែលថង់ប្លាស្ទិកជាកាកសំណល់ ដែលមិនងាយពុកផុយ។

លោក បានអំពាវនាវដល់ប្រជាពលរដ្ឋ នៅទូទាំងប្រទេសឲ្យបញ្ឈប់ជាបន្ទាន់នូវទម្លាប់ដុតកាកសំណល់ថង់ប្លាស្ទិកនៅតាមផ្ទះ ឬទីវាលសាធារណៈ ដែលនាំឲ្យមានផ្សែងទៅបំពុល និងគំរាមកំហែងយ៉ាងធ្ងន់ធ្ងរបំផុតដល់អាយុជីវិតមនុស្ស សត្វ និងបរិស្ថាន។

របាយការណ៍របស់អង្គការមូលនិធិអាក់រ៉ា ដែលសិក្សាពីកម្រិតប្រើប្រាស់ថង់ប្លាស្ទិកនៅកម្ពុជា បានបង្ហាញថា មានថង់ប្លាស្ទិកប្រមាណ១០លានថង់ ត្រូវបានប្រើប្រាស់នៅតាមទីប្រជុំជនធំៗ។

ថង់ប្លាស្ទិក ដែលប្រមូលបានក្នុងបរិមាណសំរាម តាមរយៈការបោសសម្អាតផ្លូវក្នុងទីក្រុងធំៗ រួមមាន រាជធានីភ្នំពេញ មានថង់ប្លាស្ទិក ១៧.៣ភាគរយ ខេត្តសៀមរាប មាន ២០.៧ភាគរយ និងខេត្តព្រះសីហនុ មាន ៣៤ភាគរយ៕

ប្រភព៖ AKP