ភ្នំពេញ៖ កម្ពុជា ក្លាយជាអនុប្រធាននៃមហាសន្និបាតអង្គការសហប្រជាជាតិ លើកទី៧៣ បន្ទាប់ពីមានការទទួលស្គាល់ជាផ្លូវការ ដោយប្រទេសនៃក្រុមតំបន់អាស៊ីប៉ាហ្វិក។ ការទទួលស្គាល់នេះ ក្រោយពីកម្ពុជាបានដាក់បេក្ខភាពស្នើទៅអង្គការសហប្រជាជាតិ តាំងពីខែមករា ឆ្នាំ២០១៧មក។ នេះបើតាមសេចក្តីប្រកាសព័ត៌មានរបស់ក្រសួងការបទេស និងសហប្រតិបត្តិការអន្តរជាតិ។
ក្នុងឋានៈជាអនុប្រធានមហាសន្និបាតនេះ កម្ពុជាអាចមានឱកាសដឹកនាំកិច្ចប្រជុំរបស់មហាសន្និបាត ជំនួសមុខប្រធាន និងតាមសំណើររបស់ប្រធាន។ បន្ថែមពីនេះ កម្ពុជា ក៏នឹងក្លាយជាសមាជិកនៃគណៈកម្មាធិការទូទៅ ដែលមានមុខងារ ដូចជាពិនិត្យរបៀបវារៈបណ្ដោះអាសន្ន និងបញ្ជីបន្ថែមចំនុចពិភាក្សា ផ្ដល់អនុសាសន៍ដល់មហាសន្និបាត និងជួយដល់ប្រធាននឹងមហាសន្និបាតក្នុងការរៀបចំរបៀបវារៈ សម្រាប់កិច្ចប្រជុំពេញអង្គនីមួយៗ ។ ជាពិសេសការងារទូទៅរបស់មហាសន្និបាតជាដើម។
ក្រៅពីកម្ពុជា ក៏មានប្រទេសចំនួន៤ទៀត ត្រូវបានទទួលស្គាល់ជាផ្លូវការ សម្រាប់ឋានៈជាអនុប្រធានមហាសន្និបាតដែរ។ គួរបញ្ជាក់ថា កម្ពុជា ធ្លាប់ត្រូវបានជ្រើសតាំងលើកដំបូង ជាអនុប្រធាននៃសម័យប្រជុំមហាសន្និបាតអង្គការសហប្រជាជាតិលើកទី៥៦ អាណត្តិឆ្នាំ ២០០១-២០០២។
ចំពោះតួនាទីអនុប្រធានមហាសន្និបាតនៃអង្គការសហប្រជាជាតិលើកទី៧៣ នេះ មានបេក្ខភាពមកពីប្រទេសចំនួន២១ ដែលតំណាងឲ្យតំបន់នីមួយៗ ជុំវិញពិភពលោក ដោយក្នុងនោះរួមមាន៖ ស៊ីប, អាល់ហ្ស៊េរី ,បួគីណាហ្វាសូ, កម្ពុជា ,សាធារណរដ្ឋប្រជាធិបតេយ្យកុងហ្គោ ,ហ្កំប៊ី ,ហ្គីយ៉ាន, អ៊ីរ៉ាក់, ជប៉ុន, ណាមីប៊ី, ប៉ាណាម៉ា, កាតា,សាំងម៉ារ៉ាំង, អេស្ប៉ាញ, ស៊ូដង់, អ៊ុយក្រែន, ចិន ,បារាំង, អង់គ្លេស, អាមេរិកនិង រុស្ស៊ី។
.
សម្រាប់តួនាទីនេះ បេក្ខភាពទាំងអស់ មានអាណត្តិអនុវត្តការងាររយៈពេល១ឆ្នាំ គឺចាប់ពីខែកញ្ញា ឆ្នាំ២០១៨ ដល់ខែកញ្ញា ឆ្នាំ២០១៩៕