អ្នកមាននៅកម្ពុជា ចាប់ផ្ដើមបញ្ជាទិញឧទ្ធម្ភាគចក្រពីថៃ ក្រោយពីមានការជំរុញពីសម្ដេច ហ៊ុន សែន

ជាតិ

អ្នកមាននៅកម្ពុជា ចាប់ផ្ដើមបញ្ជាទិញឧទ្ធម្ភាគចក្រពីថៃ ក្រោយពីមានការជំរុញពីសម្ដេច ហ៊ុន សែន

07, Jun 2018 , 8:59 pm

រូបភាព

រូបពីក្រុមហ៊ុន Airbus ៖ រូបតំណាងឧទ្ធម្ភាគចក្រ

ដោយ: ធឿន បញ្ញាឬទិ្ធ

ភ្នំពេញ៖ អ្នកមានទ្រព្យនៅកម្ពុជាមួយចំនួន បានបញ្ជាទិញឧទ្ធម្ភាគចក្រជាច្រើនគ្រឿងពីប្រទេសថៃ បន្ទាប់ពីមានការជំរុញពីសម្ដេចនាយករដ្ឋមន្ត្រី ហ៊ុន សែន ដែលលើកទឹកចិត្តឲ្យពួកគេ ទិញឧទ្ធម្ភាគចក្រប្រើប្រាស់ផ្ទាល់ខ្លួន។

លោក Rith Channon នាយកប្រតិបត្តិក្រុមហ៊ុន KAS Air ដែលជាក្រុមហ៊ុននាំចូលឧទ្ធម្ភាគចក្រ របស់ Airbus នោះ បាននិយាយថា ក្រុមហ៊ុនលោក បានទទួលការបញ្ជាទិញពីសំណាក់អ្នកមានធនធាន ពីកម្ពុជា លើប្រភេទឧទ្ធម្ភាគចក្រផ្សេងៗគ្នា ជាបន្តបន្ទាប់ ក្នុងរយៈពេលប៉ុន្មានថ្ងៃនេះ។« ឥឡូវនេះ យើងមានការបញ្ជាទិញឧទ្ធម្ភាគចក្រ២ទៅ៣គ្រឿងពីកម្ពុជា។ ហើយនៅពីរ ឬបីថ្ងៃទៀត យើងនឹងជួបជាមួយអនាគតអ្នកបញ្ជាទិញ ដើម្បីចុះហត្ថលេខាលើកិច្ចសន្យា»។ នេះបើតាមការចុះផ្សាយរបស់កាសែត Khmer Times ដែលបានស្រង់សម្ដីរបស់លោក Rith Channon។

ប៉ុន្តែលោក Rith Channon មិនអាចបញ្ជាក់ឈ្មោះអ្នកបញ្ជាទិញ និងតម្លៃឧទ្ធម្ភាគចក្រ ដែលត្រូវបានកុម្ម៉ង់ទិញនេះឡើយ។

អត្ថបទទាក់ទង

សម្ដេច ហ៊ុន សែន ជំរុញឲ្យអ្នកមាននៅកម្ពុជា ទិញយន្តហោះជិះ

នៅកម្ពុជាមានតែក្រុមហ៊ុនចំនួន២ប៉ុណ្ណោះ ដែលមានឧទ្ធម្ភាគចក្រផ្ទាល់ខ្លួន គឺក្រុមហ៊ុន Helistar និង Heli ។ ក្រៅពីនេះ ឧទ្ធម្ភាគចក្រដែលកំពុងហោះហើរនៅកម្ពុជា គឺជាកម្មសិទ្ធរបស់រដ្ឋ។ នេះបើតាមលោក Channon នាយកប្រតិបត្តិក្រុមហ៊ុន KAS Air ដែលមានមូលដ្ឋាននៅប្រទេសថៃ។

កាលពីពេលថ្មីៗនេះ សម្ដេចនាយករដ្ឋមន្ត្រី ហ៊ុន សែន បានជំរុញឲ្យអ្នកមានធនធានច្រើននៅកម្ពុជា គួរតែចំណាយលុយទិញឧទ្ធម្ភាគចក្រប្រើប្រាស់ផ្ទាល់ខ្លួន។ សម្ដេច បាននិយាយថា ការប្រើប្រាស់ឧទ្ធម្ភាគចក្រ អាចផ្ដល់ផលចំណេញផ្នែកពេលវេលា សម្រាប់ការធ្វើដំណើររបស់អ្នកប្រើប្រាស់ ហើយម្យ៉ាងទៀត រដ្ឋក៏អាចស្នើប្រើប្រាស់ឧទ្ធម្ភាគចក្រទាំងនោះ នៅពេលមានករណីចាំបាច់ណាមួយ៕