ជាតិ
សេដ្ឋកិច្ច
បារាំងផ្ដល់ប្រាក់កម្ចី ១៤លានដុល្លារ ដល់ក្រុមហ៊ុននាំចេញអង្ករកម្ពុជា Golden Rice
× ក្រុមហ៊ុន Golden Rice ដែលជាក្រុមហ៊ុននាំចេញអង្ករកម្ពុជា បានទទួលកម្ចី ១៤លានដុល្លារពីស្ថាប័នហិរញ្ញវត្ថុ PROPACO ដែលជាបុត្រសម្ព័ន្ធ របស់ទីភ្នាក់ងារអភិវឌ្ឍបារាំង (AFD) ជំនាញលើការអភិវឌ្ឍវិស័យឯកជន។ កិច្ចព្រមព្រៀងហិរញ្ញវត្ថុនេះ ត្រូវបានចុះហត្ថលេខាដោយតំណាងស្ថាប័នទាំងពីរ កាលថ្ងៃទី៧ ខែមិថុនា ឆ្នាំ២០១៨ នៅប្រទេសសិង្ហបុរី។
កម្ចី ពីPROPACO នឹងអនុញ្ញាតឲ្យក្រុមហ៊ុន Golden Rice ពង្រីកសមត្ថភាពផលិតកម្មរបស់ខ្លួន ព្រមទាំងអាចផលិតថាមពលអគ្គិសនី១មេហ្កាវ៉ាត់ (ដើរដោយការដុតអង្កោម) បន្ថែមទៀត។ កម្ចីនេះក៏បានលើកទឹកចិត្ត ដល់បច្ចេកវិទ្យាបង្កើតថ្មី និងលើកស្ទួយការប្រើប្រាស់ថាមពលកកើតឡើងវិញ ដែលអាចកាត់បន្ថយការចំណាយលើថាមពលរបស់ក្រុមហ៊ុន Golden Riceផងដែរ។ នេះបើតាមសេចក្តីប្រកាសព័ត៌មានរបស់ PROPACO។
ការផ្តល់កម្ចីនេះ គឺជាលើកទី៣ហើយ ដែល PROPACO បានផ្តល់ឲ្យក្រុមហ៊ុន Golden Rice។ PROPACO បានផ្តល់កម្ចី លើកទីមួយចំនួន ៧លានដុល្លារ ក្នុងឆ្នាំ២០០៩ និងកម្ចីលើកទីពីរចំនួន ១០លានដុល្លារ ក្នុងឆ្នាំ២០១៣ ។
ក្រុមហ៊ុន Golden Rice គឺជាក្រុមហ៊ុនផលិត និងនាំចេញអង្ករក្រអូប ដ៏ធំមួយក្នុងចំណោមក្រុមហ៊ុននាំចេញអង្ករធំៗ ទាំង១០របស់កម្ពុជា។ ទីផ្សារធំៗសម្រាប់នាំអង្ករចេញក្រុមហ៊ុន Golden Rice មានអឺរ៉ុប, ចិន និងប្រទេសម៉ាឡេស៊ី៕
Tag:
បារាំង
កម្ចី
Golden Rice
PROPACO
© រក្សាសិទ្ធិដោយ thmeythmey.com