សូហ្វតិន្នីសកម្ពុជារំពឹងបានមេដាយពីកីឡាអាស៊ី ក្រោយទៅហ្វឹកហាត់នៅជប៉ុន

កីឡាជាតិ

ជាតិ

សូហ្វតិន្នីសកម្ពុជារំពឹងបានមេដាយពីកីឡាអាស៊ី ក្រោយទៅហ្វឹកហាត់នៅជប៉ុន

08, Jun 2018 , 10:19 pm

រូបភាព

កីឡាករ ឯក ចំរើន ផ្តល់បទសម្ភាសដល់អ្នកសារព័ត៌មាននៅអាកាសយានដ្ឋានអន្តរជាតិភ្នំពេញ

ដោយ:

ទាំងគ្រូបង្វឹកជប៉ុន ម៉ាសាតូ អូហ្គីវ៉ារ៉ា និងកីឡាករសុទ្ធតែរំពឹងខ្ពស់ ក្នុងការដណ្តើមមេដាយពីព្រឹត្តិការណ៍ Asian Games នៅទីក្រុងហ្សាការតាប្រទេសឥណ្ឌូណេស៊ី ក្រោយពួកគេទទួលបានឱកាសទៅហ្វឹកហាត់ពង្រឹងសមត្ថភាពនៅប្រទេសជប៉ុន។ គ្រូបង្វឹកនិងកីឡាករទាំង៦រូបបានចាកចេញពីកម្ពុជាទៅកាន់ប្រទេសជប៉ុនកាលពីយប់ថ្ងៃទី៧ មិថុនា ឆ្នាំ២០១៨ ដោយពួកគេហ្វឹកហាត់នៅទីនោះប្រមាណជា៣ខែ។ សម្រាប់ការចេញទៅហ្វឹកហាត់នៅជប៉ុននេះ សហព័ន្ធធានារ៉ាប់រងទាំងស្រុងលើការចំណាយ។

គ្រូបង្វឹកកីឡាសូហ្វតិន្នីសជនជាតិជប៉ុន ម៉ាសាតូ អូហ្គីវ៉ារ៉ា ដែលដឹកនាំកីឡាករកម្ពុជាទៅហ្វឹកហាត់នៅប្រទេសជប៉ុនបានបង្ហាញការជឿជាក់ថា តាមរយៈការហ្វឹកហាត់នៅជប៉ុន កម្ពុជានឹងទទួលបានមេដាយ សម្រាប់ការប្រកួត Asian Games នៅទីក្រុងហ្សាការតាប្រទេសឥណ្ឌូណេស៊ីចន្លោះពីថ្ងៃទី១៨ សីហា ដល់ថ្ងៃទី២ កញ្ញា ឆ្នាំ២០១៨។ ការជឿជាក់បែបនេះ ព្រោះលោកគិតថា ការហ្វឹកហាត់នៅជប៉ុននឹងផ្តល់បទពិសោធល្អៗដល់កីឡាករកម្ពុជាក្នុងការអភិវឌ្ឍសមត្ថភាពឲ្យកាន់តែរីកចម្រើន។

«ខ្ញុំគិតថាសមត្ថភាពយើងបច្ចុប្បន្នមិនទាន់អាចដណ្តើមមេដាយកម្រិតអាស៊ីបាននោះទេ។ ប៉ុន្តែបើសិនយើងខិតខំប្រឹងប្រែងហ្វឹកហាត់ពង្រឹងសមត្ថភាពនៅជប៉ុន ខ្ញុំជឿជាក់ថា យើងនឹងអាចទទួលបានមេដាយសំរឹទ្ធ ឬប្រាក់ពី Asian Games នៅឥណ្ឌូណេស៊ី លើវិញ្ញាសាវាយទោលនិងវាយគូ»។ នេះជាការលើកឡើងរបស់លោក ម៉ាសាតូ អូហ្គីវ៉ារ៉ា។

លោក ម៉ាសាតូ អូហ្គីវ៉ារ៉ា ផ្តល់បទសម្ភាសដល់អ្នកសារព័ត៌មានមុនឡើងយន្តហោះនៅអាកាសយានដ្ឋានអន្តរជាតិភ្នំពេញ

គ្រូបង្វឹកជនជាតិជប៉ុនរូបនេះបន្ថែមថា៖«ពួកគេមានកាយសម្បទានិងទេពកោសល្យល្អ តែខ្ញុំគិតថា បច្ចុប្បន្នពួកគេខ្វះបទពិសោធក្នុងការប្រកួត។ ជាក់ស្តែងកាលពីពេលកន្លងទៅយើងបានទៅចូលរួមប្រកួតជើងឯកអាស៊ីលក្ខណៈមិត្តភាពនៅប្រទេសថៃ យើងមិនទទួលបានមេដាយនោះទេ។ សម្រាប់ការហ្វឹកហាត់នៅជប៉ុនលើកនេះ យើងហ្វឹកហាត់ជាក្រុមលេខ១របស់ជប៉ុន ដូច្នេះខ្ញុំគិតថា យើងនឹងមានសមត្ថភាព និងជំនាញកាន់តែប្រសើរ»។

កីឡាករ ឯក ចំរើន បាននិយាយថា ការចេញទៅហ្វឹកហាត់នៅប្រទេសជប៉ុនជាឱកាសល្អក្នុងការអភិវឌ្ឍសមត្ថភាព សម្រាប់រូបគេនិងមិត្តរួមក្រុម ព្រោះជប៉ុនជាប្រទេសដែលមានសក្តានុពលមួយផ្នែកកីឡានេះ។ ទន្ទឹមនឹងនេះ ចំរើន ប្តេជ្ញាថា រូបគេនឹងខិតខំហ្វឹកហាត់ឲ្យអស់ពីសមត្ថភាព តាមរយៈការចាប់យកបទពិសោធថ្មីៗ ដើម្បីពង្រឹងសមត្ថភាពឲ្យកាន់តែប្រសើរ។

«ខ្ញុំគិតថាតាមរយៈការហ្វឹកហាត់នៅជប៉ុន វានឹងមានការប្រែប្រួលច្រើន ព្រោះជប៉ុនជាប្រទេសមួយខ្លាំងផ្នែកកីឡាសូហ្វតិន្នីសលើពិភពលោក។ ដូច្នេះវាជាឱកាសមួយដ៏ល្អសម្រាប់ពួកខ្ញុំក្នុងការដកស្រង់បទពិសោធ ហាត់បច្ចេកទេសថ្មី ដើម្បីពង្រឹងសមត្ថភាពឲ្យកាន់តែខ្លាំង។ ខ្ញុំរំពឹងថា ទទួលបានលទ្ធផលល្អសម្រាប់ការប្រកួត Asian Games ក្រោយមកពីហ្វឹកហាត់នៅជប៉ុន»។ នេះជាការលើកឡើងរបស់កីឡាករ ឯក ចំរើន។

កីឡាករ កាន់ សោភ័ណ, ឯក ចំរើន, យី សរសារិទ្ធ, ឌឹម សំសុជាភារុណ, អន សម្បត្តិ និងគ្រូបង្វឹក ម៉ាសាតូ អូហ្គីវ៉ារ៉ា ជាសមាសភាពដែលសហព័ន្ធកីឡាសូហ្វតិន្នីសកម្ពុជាបញ្ជូនទៅហ្វឹកហាត់រយៈពេលជាង២ខែនៅប្រទេសជប៉ុន ដើម្បីត្រៀមប្រជែងដណ្តើមមេដាយក្នុងព្រឹត្តិការណ៍ Asian Games នៅទីក្រុងហ្សាការតាប្រទេសឥណ្ឌូណេស៊ី។ ពួកគេបានចាកចេញពីកម្ពុជាទៅកាន់ប្រទេសជប៉ុនកាលពីយប់ថ្ងៃទី៧ ខែមិថុនា ឆ្នាំ២០១៨។

សម្រាប់ការហ្វឹកហាត់នៅជប៉ុននេះ សហព័ន្ធត្រូវចំណាយថវិកា១២,០០០ដុល្លារ សម្រាប់ថ្លៃហ្វឹកហាត់ ស្នាក់នៅ និងហូបចុក និង៤,៥៦០ដុល្លារលើថ្លៃធ្វើដំណើរ។ តែយ៉ាងណា លោក ជា ប៊ុនហេង អនុប្រធានទី១សហព័ន្ធបញ្ជាក់ថា ការហ្វឹកហាត់នៅជប៉ុនជារឿងមួយដ៏ល្អក្នុងការអភិវឌ្ឍកីឡាសូហ្វតិន្នីសឲ្យមានការរីកចម្រើន ព្រោះជប៉ុនជាប្រទេសខ្លាំងខាងផ្នែកកីឡាមួយនេះ។ លោកលើកឡើងថា បើចង់ឲ្យកីឡាករខ្លាំងត្រូវបញ្ជូនទៅប្រទេសខ្លាំង បើបញ្ជូនទៅប្រទេសខ្សោយ កីឡាករនឹងខ្សោយ៕