អន្តរជាតិ
នយោបាយអន្តរជាតិ
ចិន ចង់ឃើញមីយ៉ាន់ម៉ាធ្វើការជិតស្និទ្ធជាមួយភ្នាក់ងារ UN លើការនាំជនភៀសខ្លួនទៅស្រុកវិញ
× នៅថ្ងៃទី៦ មិថុនាកន្លងទៅ រដ្ឋាភិបាលមីយ៉ាន់ម៉ា និងភ្នាក់ងារជំនាញអង្គការសហប្រជាជាតិ បានចុះហត្ថលេខាលើអនុស្សារណៈយោគយល់ស្តីពីការវិលត្រលប់របស់ជនភៀសខ្លួនជនជាតិភាគតិចរ៉ូហ៊ីងយ៉ារាប់សិបម៉ឺននាក់ទៅមីយ៉ាន់ម៉ាវិញ។ កិច្ចព្រមព្រៀងនេះ ក៏ទទួលបានការស្វាគមន៍ពីសំណាក់អ្នកជិតខាងមីយ៉ាន់ម៉ា គឺចិនផងដែរ។
រដ្ឋាភិបាលក្រុងប៉េកាំង នៅថ្ងៃ៧ មិថុនា បានថ្លែងស្វាគមន៍ចំពោះចំណាត់ការចុងក្រោយរវាងរដ្ឋាភិបាលក្រុងណៃពិដោរ ជាមួយនឹងភ្នាក់ងារជំនាញរបស់អង្គការសហប្រជាជាតិ ដែលរួមមាន UNHCR និង UNDP លើការរៀបចំលក្ខខណ្ឌក្នុងការរៀបបញ្ជូនជនភៀសខ្លួនរ៉ូហ៊ីងយ៉ា ទៅកាន់ទីកន្លែងដើមរបស់ពួកគេវិញ បន្ទាប់ពីបានចាកចេញអស់រយៈច្រើនខែហើយនោះ ។
តាមរយៈសន្និសីទសារព័ត៌មានប្រចាំថ្ងៃអ្នកនាំពាក្យក្រសួងការបរទេសចិន លោកស្រី ហួ ឈួនអ៊ីង បានទទួលស្គាល់ថា បញ្ហាជនភៀសខ្លួនដែលកើតចេញពីរដ្ឋរ៉ាខានរបស់មីយ៉ាន់ម៉ា មានសាវតាប្រវត្តិសាស្ត្រស្មុគស្មាញ ដែលពាក់ព័ន្ធនឹងជាតិសាសន៍ និងសាសនា ។
ជាមួយគ្នានេះ លោកស្រី បានបន្ថែមថា រដ្ឋាភិបាលចិន ក៏សូមសាទរពីកិច្ចប្រឹងប្រែងរបស់មីយ៉ាន់ម៉ាជាមួយនឹងភ្នាក់ងារជំនាញអង្គការសហប្រជាជាតិដែលបានជ្រើសរើសនូវដំណោះស្រាយតាមរយៈបែបសន្តិវិធី និងកិច្ចសហប្រតិបត្តិការល្អ ហើយ ចិន ក៏ចង់ឃើញមីយ៉ាន់ម៉ា ធ្វើកិច្ចសហប្រតិបត្តិការជិតស្និទបំផុតជាមួយនឹងភ្នាក់ងារអង្គការសហប្រជាជាតិផងដែរ ។
តាមរយៈវេទិកាព័ត៌មានដដែលនោះ លោកស្រី ក៏ឆ្លៀតលើកពីគុណសម្បត្តិរបស់ចិនក្នុងនាមជាអ្នកជិតខាង ដែលកន្លងមក ចិន ក៏បានស្នើឲ្យភាគីមីយ៉ាន់ម៉ា និងបង់ក្លាដែស អនុវត្តដំណោះស្រាយបីជំហានដែលរួមមានដូចជា ការបញ្ឈប់ហិង្សា និងរក្សាស្ថិរភាព, ការរៀបបញ្ជូនជនភៀសខ្លួននិងផ្តល់ទីជម្រក និងការកាត់បន្ថយភាពក្រីក្រនៅតំបន់ជនរងគ្រោះផងដែរ ។
សូមជម្រាបផងដែរ ក្រោយនៃវិបត្តិជនភៀសខ្លួនមីយ៉ាន់ម៉ា ផ្ទុះឡើង មានមហាអំណាចជាច្រើនរួមទាំងអាមេរិក សហភាពអឺរ៉ុប និងអង្គការជំនាញសិទ្ធិមនុស្សផងនោះ បានចេញថ្លែងការណ៍រិះគន់ និងថ្កោលទោសមីយ៉ាន់ម៉ាជាបន្តបន្ទាប់ ។ តែចិន មិនធ្វើដូច្នេះឡើយ ។ ចិន ថែមទាំងការពាររដ្ឋាភិបាលមីយ៉ាន់ម៉ា នៅមហាសន្និបាតអង្គការសហប្រជាជាតិ ខណៈដែលរដ្ឋភាគច្រើន បានចោទរដ្ឋាភិបាលមីយ៉ាន់មា់ថាបានបំពានសិទ្ធិមនុស្សធ្ងន់ធ្ងរនោះ ៕
Tag:
ចិន
មីយ៉ាន់ម៉ា
រ៉ូហ៊ីងយ៉ា
© រក្សាសិទ្ធិដោយ thmeythmey.com