ព្រឹកថ្ងៃទី១០ខែមិថុនា សមាជនៃគណបក្សប្រជាធិបតេយ្យមូលដ្ឋានបានបោះឆ្នោតជ្រើសរើសលោក យ៉ង សាំងកុមារ ជាបេក្ខភាពនាយករដ្ឋមន្ត្រីរបស់គណបក្សនេះ ដើម្បីដឹកនាំការប្រកួតក្នុងការបោះឆ្នោតទល់នឹងគណបក្ស១៩ទៀត។ លោក កុមារ អះអាងថា គណបក្សរបស់លោកថ្មី ប៉ុន្តែលោកមិនខ្លាចនឹងប្រកួតដណ្តើមអំណាចពីគណបក្សប្រជាជនកម្ពុជារបស់សម្តេចនាយករដ្ឋមន្ត្រី ហ៊ុន សែន ឡើយ។ សូមលោកអ្នកអានបទសម្ភាសរវាងលោក លាង ដឺលុច អគ្គនាយកនៃសារព័ត៌មានថ្មីៗ និង លោក យ៉ង សាំងកុមារ។
លោក លាង ដឺលុច៖ លោកបានទទួលសំឡេងនៃការផ្តល់សេចក្តីទុកចិត្តចំនួន១២៧ លើ១៤៦ ពីសមាជនៃគណបក្សប្រជាធិបតេយ្យមូលដ្ឋាន ដើម្បីឲ្យលោកធ្វើជាបេក្ខភាពនាយករដ្ឋមន្ត្រីប្រកួតប្រជែងក្នុងការបោះឆ្នោតថ្ងៃទី២៩ខែកក្កដាខាងមុខនេះ។ តើអ្វីខ្លះជាអារម្មណ៍របស់លោកនៅពេលនេះ?
លោក យ៉ង សាំងកុមារ៖ វាពិតជាការផ្តល់សេចក្តីទុកចិត្តមកលើខ្ញុំមែន ហើយចាប់ពីពេលនេះទៅខ្ញុំមានអារម្មណ៍ថា ខ្ញុំមានការទទួលខុសត្រូវធំពីរ។ ទីមួយ ខ្ញុំបានក្លាយជាប្រធានក្រុមបាល់ទាត់ម្នាក់ដែលត្រូវដឹកនាំក្រុមចូលទៅក្នុងការប្រកួត។ ទីពីរ ខ្ញុំត្រូវត្រៀមខ្លួន ដើម្បីការងារដឹកនាំប្រទេស។
លោក លាង ដឺលុច៖ តាមពិត លោកក៏ធ្លាប់ធ្វើជាមេដឹកនាំដែរ។ អ្វីដែលខុសប្លែកនៅពេលនេះ គឺថាលោកមិនមែនដឹកនាំពលរដ្ឋធ្វើកសិកម្មទៀតទេ ដែលដឹកនាំគណបក្សនយោបាយចូលរួមប្រកួតក្នុងការដឹកនាំប្រទេស។ តើលោកសប្បាយចិត្តសម្រាប់ខ្លួនឯងដែរឬទេ?
លោក យ៉ង សាំងកុមារ៖ វាជាបន្ទុកទៅវិញទេ។ តែខ្ញុំសប្បាយចិត្ត។ ពីមុនខ្ញុំដឹកនាំអង្គការ ខ្ញុំដឹកនាំកសិករធ្វើកសិកម្ម ក្នុងទំហំការងារពី៥ទៅ១០ភាគរយនៃប្រទេសទាំងមូល។ ពេលនេះ ខ្ញុំត្រូវធ្វើកិច្ចការមួយសម្រាប់ប្រទេសទាំងមូល។ វាជាការទទួលខុសត្រូវមួយ។ ខ្ញុំក៏សប្បាយចិត្ត ពីព្រោះអ្វីដែលយើងធ្វើនេះ វាក៏ជាការត្រួសត្រាយផ្លូវមួយសម្រាប់យុវជនជំនាន់ក្រោយ។
លោក លាង ដឺលុច៖ តាមទ្រឹស្តីលោកត្រូវដឹកនាំគណបក្សដើម្បីប្រកួតទល់នឹងគណបក្សនយោបាយចំនួន១៩ទៀត។ ប៉ុន្តែតាមរូបភាពជាក់ស្តែង គឺលោកត្រូវប្រកួតទល់នឹងគណបក្សប្រជាជនកម្ពុជា ដែលកំពុងកាន់អំណាចយូរឆ្នាំមកហើយ។ តើលោកគិតថា វាលំបាកសម្រាប់លោកទេ? ឬថាលោកមានចំណុចខ្លាំងរបស់លោក?
លោក យ៉ង សាំងកុមារ៖ បើយើងមើលតែមួយជ្រុងនៃធនធានហិរញ្ញវត្ថុ នៃកម្លាំងធនធានមនុស្ស និងពិសោធន៍យូរឆ្នាំក្នុងការងារដឹកនាំប្រទេស យើងអាចនិយាយបានថា គណបក្សប្រជាជនកម្ពុជាជាគណបក្សធំ។ យើងមើលឃើញធំមែន។ តែមើលជ្រុងម្ខាងទៀតនៃទស្សនវិស័យ ឬចក្ខុវិស័យដឹកនាំប្រទេសយូរអង្វែងទៅមុខទៀត ខ្ញុំមិនមានអ្វីត្រូវខ្លាចនោះទេ។ ខ្ញុំមិនប្រកួតទឹកលុយទេ តែខ្ញុំប្រកួតចក្ខុវិស័យដឹកនាំប្រទេស។ យើងទទួលបានកម្លាំងស្ម័គ្រចិត្ត ពិសេសយុវជនចូលរួមជាមួយយើងកាន់តែច្រើន។ យើងសាបព្រោះរបៀបដឹកនាំបែបថ្មី។
លោក លាង ដឺលុច៖ តើលោកមានកម្មវិធីនយោបាយអ្វីថ្មី ដែលលោកគិតថាជាការមានប្រៀបលើគណបក្សកាន់អំណាចសព្វថ្ងៃ?
លោក យ៉ង សាំងកុមារ៖ យើងបានផ្សព្វផ្សាយហើយគោលនយោបាយ១២៥ចំណុច ដែលបង្រួមមកនៅត្រឹម៥ផ្នែកធំៗ ដែលយើងហៅថាគោលនយោបាយ «ស៥» ក្នុងនោះរួមមានការកែទម្រង់សេវាសាធារណៈ ការអភិវឌ្ឍសេដ្ឋកិច្ចមូលដ្ឋានដែលជាការពង្រឹងចំណូលរបស់ពលរដ្ឋ ការអភិវឌ្ឍធនធានមនុស្សដែលមានសុខភាពល្អ ការលើកស្ទួយវិស័យសង្គមកិច្ចជាដើម៕