កីឡាជាតិ
ជាតិ
លោក ភា សុភ័ក្ត្រា បន្តស្ថិតនៅក្រៅទីលាន រីឯណាហ្គាវើលត្រូវការឈ្នះប៉ូលិសនៅល្ងាចនេះ រូបភាពពីហ្វេសប៊ុកណាហ្គាវើល
× ក្រសួងការពារជាតិ បើកទ្វារកីឡដ្ឋានស្តាតចាស់ស្វាគមន៍ភ្ញៀវអគ្គិសនីកម្ពុជា សម្រាប់ជំនួបពានរង្វាន់បាល់ទាត់ក្របខណ្ឌកំពូលកម្ពុជា នាម៉ោង៦ល្ងាចថ្ងៃទី១០ ខែមិថុនា ឆ្នាំ២០១៨។ ប៉ុន្តែក្នុងជំនួបនេះ គ្មានការបញ្ជាពីគ្រូបង្គោល លោក ភា សុភ័ក្ត្រា ដែលជាប់បម្រាមឡើយ។ នៅល្ងាចនេះដែរ ពហុកីឡដ្ឋានជាតិ នឹងក្លាយជាទីតាំងកាត់លេចក្តីជំនួបរវាងណាហ្គាវើលជាមួយអគ្គស្នងការនគរបាលជាតិ។ នៅម៉ោង៣រសៀលនេះ អាស៊ីអឺរ៉ុបបើកទ្វារកីឡដ្ឋានរបស់ខ្លួនស្វាគមន៍ភ្ញៀវវេស្ទើនភ្នំពេញ។
ក្រោយជាប់ពិន័យ៤ប្រកួតពីគណៈកម្មការវិន័យនៃសហព័ន្ធកីឡាបាល់ទាត់កម្ពុជា លោក ភា សុភ័ក្ត្រា គ្រូបង្វឹកក្រសួងការពារជាតិមិនអាចបញ្ជាកូនក្រុមក្នុងជំនួបតទល់ជាមួយក្រុមអគ្គិសនីកម្ពុជានៅល្ងាចនេះនោះទេ ពោលគឺតាមត្រឹមអង្គុយមើលកូនក្រុមប្រកួតតែប៉ុណ្ណោះ។ លោក ភា សុភ័ក្ត្រា នឹងចូលដឹកនាំក្រុមក្រសួងការពារជាតិវិញនៅជំនួបចុងក្រោយនៃជើងទី១ ជាមួយក្រុមអគ្គស្នងការនគរបាលជាតិ។
លោក ភា សុភ័ក្ត្រា កាលពីខែឧសភា កន្លងទៅ ត្រូវបានគណៈកម្មការវិន័យនៃសហព័ន្ធកីឡាបាល់ទាត់កម្ពុជាពិន័យមិនឲ្យដឹកនាំក្រុមចំនួន៤ប្រកួតក្នុងលីគកំពូលកម្ពុជា ក្រោមបទចោទមិនទទួលស្គាល់ការសម្រេច និងជេរប្រមាថមន្ត្រីការប្រកួតតាមមាត្រា៤៧ និង៤៩នៃក្រមសីលធម៌ និងវិន័យ។
ក្រុមក្រសួងការពារជាតិត្រូវបើកទ្វារកីឡដ្ឋានស្តាតចាស់ស្វាគមន៍ក្រុមអគ្គិសនីកម្ពុជា នាជំនួបសប្តាហ៍ទី៩នៃពានរង្វាន់បាល់ទាត់ក្របខណ្ឌកំពូលនាវេលាម៉ោង៦ល្ងាចថ្ងៃទី១០ ខែមិថុនា ឆ្នាំ២០១៨។ បច្ចុប្បន្នក្រសួងការពារជាតិឈរលេខរៀងទី៦មាន១២ពិន្ទុខណៈអគ្គិសនីកម្ពុជាឈរលេខរៀងទី១១មាន៤ពិន្ទុ។
ក្រោយបរាជ័យលើកដំបូង ៣-០ ក្រោមថ្វីជើងវិសាខាសប្តាហ៍មុន ណាហ្គាវើលត្រូវការឈ្នះក្រុមអគ្គស្នងការនគរបាលជាតិនៅល្ងាចនេះ ដើម្បីបាន៣ពិន្ទុបន្ថែម សម្រាប់បន្តប្រជែងកំពូលតារាងជាមួយបឹងកេត និងរក្សាគម្លាតពីការប្រជែងរបស់វិសាខា។ ណាហ្គាវើលនឹងប្រើប្រាស់ពហុកីឡដ្ឋានជាតិស្វាគមន៍ក្រុមអគ្គស្នងការនគរបាលជាតិនៅម៉ោង៦ល្ងាននេះ។ បច្ចុប្បន្នណាហ្គាវើលឈរលេខរៀងទី២មាន១៩ពិន្ទុ ខណៈបឹងកេតឈរកំពូលតារាងបណ្តោះអាសន្នមាន២៣ពិន្ទុ និងវិសាខាឈរលេខរៀងទី៣មាន១៩ពិន្ទុ។
មុនជំនួបទាំងពីរខាងលើ ក្រុមអាស៊ីអឺរ៉ុបបើកកីឡដ្ឋានរបស់ខ្លួនស្វាគមន៍ក្រុមបាតតារាងវេស្ទើនភ្នំពេញនាវេលាម៉ោង៣រសៀល។ ៨ប្រកួតកន្លងមកអាស៊ីអឺរ៉ុបឈ្នះ២ស្មើ៣និងចាញ់៣ ខណៈវេសើ្ទនភ្នំពេញចាញ់ទាំង៨ប្រកួត៕
Tag:
Cambodian League 2018
ភា សុភ័ក្ត្រា
ទ័ព
ណាហ្គាវើល
ប៉ូលិស
© រក្សាសិទ្ធិដោយ thmeythmey.com