ជាតិ
ខុទ្ទកាល័យសម្ដេច ហ៊ុន សែន ថា អាមេរិកបំពានកម្ពុជាទាំងកំរោល រូបពីហ្វេសប៊ុកលោក ហ៊ីង ប៊ុនហៀង អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការបញ្ជាការដ្ឋានអង្គរក្សនាយករដ្ឋមន្រ្តី ហ៊ុន សែន
× ភ្នំពេញ៖ នៅក្នុងសំណុំរឿងនៃការបង្កកទ្រព្យសម្បត្តិមន្ត្រីជាន់ខ្ពស់យោធារបស់កម្ពុជាម្នាក់ គឺលោក ហ៊ីង ប៊ុនហៀង ខុទ្ទកាល័យសម្តេចនាយករដ្ឋមន្ត្រី និងក្រសួងការពារជាតិកម្ពុជាបានប្រតិកម្មយ៉ាងខ្លាំងក្លាជាបន្តបន្ទាប់នៅថ្ងៃទី១៣ខែមិថុនានេះ ប្រឆាំងរដ្ឋាភិបាលអាមេរិក។
នៅក្នុងសេចក្តីថ្លែងការណ៍២ផ្សេងគ្នា ប៉ុន្តែក្នុងគោលដៅប្រតិកម្មតបតនឹងរដ្ឋាភិបាលសហរដ្ឋអាមេរិកដូចគ្នា ក្រសួងការពារជាតិកម្ពុជាបានហៅសេចក្តីសម្រេចរបស់ក្រសួងរតនាគារអាមេរិកថាជាសេចក្តីសម្រេចដ៏ល្ងង់ខ្លៅ។ ខុទ្ទកាល័យសម្តេចនាយករដ្ឋមន្ត្រី ហ៊ុន សែន វិញ បាន ចាត់ទុកទង្វើរបស់អាមេរិកនេះ ថាជាការរំលោភអធិបតេយ្យភាព និងឯករាជ្យរបស់កម្ពុជា ដែលកម្ពជាមិនអាចទទួលយកបានឡើយ។
សេចក្តីថ្លែងការណ៍របស់ខុទ្ទកាល័យនាយករដ្ឋមន្ត្រីកម្ពុជា បានសរសេរថ្កោលទោសអាមេរិកថាបានចោទប្រកាន់ដោយគ្មានមូលដ្ឋានមកលើរូបលោក ហ៊ីង ប៊ុនហៀង អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការបញ្ជាការដ្ឋានកងអង្គរក្ស។
សេចក្តីថ្លែងការណ៍ក្រដាសពណ៌លឿងបានសរសេរយ៉ាងដូច្នេះ៖«ខុទ្ទកាល័យសម្តេចនាយករដ្ឋមន្ត្រី សូមរិះគន់ដោយត្រង់ៗចំពោះវិធានការដោយខ្វះវិចារណញ្ញាណ និងជាអំពើបំពានទាំងកំរោលឥតអៀនខ្មាសរបស់សហរដ្ឋអាមេរិកនេះ»។ សេចក្តីថ្លែងការណ៍ដដែលបានបន្តរិះគន់រដ្ឋាភិបាលវ៉ាស៊ីនតោនថា បានបំពានអធិបតេយ្យនៃប្រទេសឯករាជ្យមួយ ដែលពុំស្ថិតនៅក្រោមច្បាប់របស់សហរដ្ឋអាមេរិក។ «គួរសួរទៅអាមេរិកវិញដែរថា កាលដែលកងទ័ពអាមេរិកមកសម្លាប់ជនជាតិកម្ពុជារាប់លាននាក់កាលពីទស្សវត្សរ៍ឆ្នាំ១៩៧០ ដែលគ្រាប់បែកនៅតែត្រូវបានគេរកឃើញដល់សព្វថ្ងៃនេះ តើនេះមិនមែនជាការរំលោភសិទ្ធិមនុស្សពីសំណាក់អាមេរិកទេឬ?»។ ខុទ្ទកាល័យសម្តេចហ៊ុន សែន ចោទសួរយ៉ាងដូច្នេះ។
ក្រៅពីខុទ្ទកាល័យសម្ដេច ហ៊ុន សែន ក្រសួងការពារជាតិកម្ពុជា ក៏ចេញមកថ្កោលទោសអាមេរិក តាមរយៈសេចក្ដីថ្លែងការណ៍ដូច្នេះថា៖ «ការដាក់ទណ្ឌកម្មបង្កកទ្រព្យសម្បត្តិនេះ គឺជាការសម្រេចដ៏ល្ងង់ខ្លៅ ធ្វើឡើងដោយទំនើងចិត្ត សហរដ្ឋអាមេរិក ដែលកម្ពុជាមិនអាចទទួលស្គាល់បានឡើយ»។
បន្ថែមពីនេះក្រសួងការពារជាតិ អំពាវនាវដល់សហរដ្ឋអាមេរិក ឲ្យបញ្ឈប់ជាបន្ទាន់នូវការដាក់ទណ្ឌកម្ម មកលើមន្ត្រីជាន់ខ្ពស់យោធាកម្ពុជា ដោយគ្មានមូលដ្ឋានច្បាស់លាស់បែបនេះ។
កាលពីថ្ងៃទី១២ មិថុនា អាមេរិក បានប្រកាសបង្កកទ្រព្យសម្បត្តិលោក ហ៊ីង ប៊ុនហៀង អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការបញ្ជាការដ្ឋានកងអង្គរក្ស ដោយលើកហេតុផលថា លោកជាប់ពាក់ព័ន្ធនឹងករណីរំលោភសិទ្ធិមនុស្សនៅកម្ពុជាកន្លងមក។ ការិយាល័យគ្រប់គ្រងទ្រព្យសម្បត្តិបរទេសនៃក្រសួងរតនាគារអាមេរិក ដែលបានប្រកាសបង្កកទ្រព្យសម្បត្តិលោក ហ៊ីង ប៊ុនហៀងនោះ បានរៀបរាប់ថា មេបញ្ជាការកងអង្គរក្សសម្ដេច ហ៊ុន សែន រូបនេះ បានជាប់ពាក់ព័ន្ធនឹងការរំលោភសិទ្ធិមនុស្ស ក្នុងករណីប្រើហិង្សាប្រឆាំងប្រជាជនកម្ពុជា ដែលគ្មានអាវុធអស់ច្រើនឆ្នាំមកនេះ ដោយរាប់បញ្ចូលទាំងឆ្នាំ២០១៣ និងឆ្នាំ២០១៥៕
Tag:
ហ៊ីង ប៊ុនហៀង
ក្រសួងការពារជាតិ
អាមេរិក
សិទ្ធិមនុស្ស
© រក្សាសិទ្ធិដោយ thmeythmey.com