ប្រមុខការទូតអាមេរិកទៅកូរ៉េខាងត្បូងដើម្បីពន្យល់ពីលទ្ធផលជំនួបត្រាំ-គីម

អន្តរជាតិ

ប្រមុខការទូតអាមេរិកទៅកូរ៉េខាងត្បូងដើម្បីពន្យល់ពីលទ្ធផលជំនួបត្រាំ-គីម

13, Jun 2018 , 10:19 pm

រូបភាព

រដ្ឋមន្រ្តីការបរទេសអាមេរិក ម៉ៃ ប៉ុមប៉េអូ (រុបភាព៖ ក្រសួងការបរទេសអាមេរិក)

ដោយ: តន ចាន់រិទ្ធារ៉ា

ប្រមុខការទូតអាមេរិក ម៉ៃ ប៉ុមប៉េអូ នៅថ្ងៃទី១៤ ខែមិថុនា នឹងធ្វើដំណើរទៅកាន់កូរ៉េខាងត្បូងដើម្បីពន្យល់ព័ត៌មានលម្អិតនៃលទ្ធផលជំនួបរវាងប្រធានាធិបតី ដូណាល់ ត្រាំ និងប្រធានគណៈកម្មការកិច្ចការរដ្ឋកូរ៉េខាងជើង គីម ជុងអ៊ុន នៅសិង្ហបុរី។ លោក ប៉ុមប៉េអូ នឹងជួបមេដឹកនាំកូរ៉េខាងត្បូង ហើយមានជំនួបជាមួយសមភាគីកូរ៉េខាងត្បូង និងជប៉ុនផង។ លោកមានព័ត៌មានច្រើនត្រូវប្រាប់សម្ព័ន្ធមិត្តខ្លួន ជាពិសេសរឿងប្រកាសផ្អាកសមយុទ្ធតែម្ដង។

ទៅដល់ក្រុងសេអ៊ូលនៅថ្ងៃទី១៤ ខែមិថុនា រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ នឹងទៅជួបប្រធានាធិបតីកូរ៉េខាងត្បូង មូន ចេអ៊ីន ដើម្បីរាយការណ៍លទ្ធផលជំនួបមេដឹកនាំអាមេរិក និងកូរ៉េខាងជើងនៅឯសិង្ហបុរី។ ជាជំនួបលើកទីមួយរបស់មេដឹកនាំនៃប្រទេសគូសត្រូវនឹងគ្នា ការចរចាស្ដីពីនុយក្លេអ៊ែររវាងលោក ដូណាល់ ត្រាំ និងលោក គីម ជុងអ៊ុន ពិតជាមានឥទ្ធិពលខ្លាំងលើប្រទេសក្នុងតំបន់អាស៊ីបូព៌ាទាំងមូល។

លោក ប៉ុមប៉េអូ ក៏នឹងមានជំនួបជាមួយសមភាគីកូរ៉េខាងត្បូង កាង ឃ្យុងវ៉ា នៅថ្ងៃដដែលនោះ។ ដោយឡែករដ្ឋមន្ត្រីការបរទេសជប៉ុន តារ៉ូ កូណូ ក៏ត្រូវធ្វើដំណើរទៅកាន់ក្រុងសេអ៊ូលដែរដើម្បីជួបសមភាគីអាមេរិក និងកូរ៉េខាងត្បូងដែរ។ នេះបើតាមការផ្សាយរបស់ទីភ្នាក់ងារព័ត៌មាន AP ។

ក្នុងជំនួបសិង្ហបុរី លោក ត្រាំ និងលោក គីម បានឯកភាពគ្នាលើកិច្ចព្រមព្រៀងមួយដែលមានអត្ថន័យទូលាយខ្លាំងដូចជាការធានារបស់អាមេរិកចំពោះសន្តិសុខរបបដឹកនាំក្រុងព្យុងយ៉ាង និងការបង្ហាញឆន្ទៈរបស់កូរ៉េខាងជើងក្នុងរំសាយនុយក្លេអ៊ែរជាដើម។ ប៉ុន្តែនៅក្រោយជំនួបនេះ ប្រធានាធិបតីអាមេរិកបែរជាធ្វើឲ្យសម្ព័ន្ធមិត្តរបស់ខ្លួនស្រឡាំងកាំងទៅវិញ តាមរយៈការប្រកាសផ្អាកសមយុទ្ធជាមួយកូរ៉េខាងត្បូងដ៏ភ្ញាក់ផ្អើល។

ការផ្អាកសមយុទ្ធនេះ ជាសម្បទានដ៏ធំមួយសម្រាប់កូរ៉េខាងជើង តែធ្វើឲ្យកូរ៉េខាងត្បូង និងជប៉ុនសង្ស័យជាខ្លាំង។ សមយុទ្ធរួមគ្នារវាងអាមេរិក និងកូរ៉េខាងត្បូង ដែលពេលខ្លះមានវត្តមានជប៉ុនដែរនោះ ត្រូវបានកូរ៉េខាងជើងចាត់ទុកជាការបង្កហេតុ និងជាការត្រៀមឈ្លានពានខ្លួន។ យ៉ាងណាមិញ សម្ព័ន្ធមិត្តអាមេរិកទាំងពីរចាត់ទុកសមយុទ្ធនេះជារឿងសំខាន់ បង្ហាញពីទំនាក់ទំនងជិតស្និទ្ធរវាងប្រទេសទាំងបី និងជាការពង្រឹងសមត្ថភាពយោធាផង។

ប្រមុខការទូតអាមេរិកប្រហែលជាត្រូវបកស្រាយឲ្យបានច្បាស់ពីបញ្ហានេះ ព្រោះវាអាចធ្វើឲ្យរង្គោះរង្គើទំនាក់ទំនងសម្ព័ន្ធមិត្ត ទោះជាលោក ត្រាំ យកហេតុផលថា ជាជំហានមួយនៃការចរចាជាមួយកូរ៉េខាងជើងក៏ដោយ។ យ៉ាងណាមិញ ក្រុងសេអ៊ូលទំនងជាទទួលយកការប្រកាសរបស់លោក ត្រាំ ដើម្បីសម្រួលដល់ការជជែកជាមួយក្រុងព្យុងយ៉ាង។ នៅថ្ងៃទី១៣ ខែមិថុនា អ្នកនាំពាក្យវិមានប្រធានាធិបតីកូរ៉េខាងត្បូងនិយាយថា កូរ៉េខាងត្បូងនឹងជជែកជាមួយអាមេរិកឲ្យបានដិតដល់លើបញ្ហានេះ៕