អន្តរជាតិ
គេរិះគន់លោក ត្រាំ ព្រោះមិនខ្វល់ការបំពានសិទ្ធិមនុស្សធ្ងន់ធ្ងរនៅកូរ៉េខាងជើង លោក ដូណាល់ ត្រាំ ទៅដល់ទឹកដីអាមេរិក ក្រោយជួបលោក គីម ជុងអ៊ុន នៅសិង្ហបុរី (រូបភាព AFP)
× ប្រធានាធិបតីអាមេរិក ដូណាល់ ត្រាំ បានបង្ហាញជំហរមិនខ្វល់ខ្វាយស្ថានភាពសិទ្ធិមនុស្សដ៏អាក្រក់នៅកូរ៉េខាងជើង ក្រោយបានជួបមេដឹកនាំកំពូល គីម ជុងអ៊ុន នៅសិង្ហបុរីរួចមក។ លោក ត្រាំ ចង់ទុកបញ្ហាមួយនេះដោយឡែក និងផ្ដោតការយកចិត្តទុកដាក់ខ្លាំងលើការរំសាយនុយក្លេអ៊ែររបស់កូរ៉េខាងជើងតែមួយមុខ។ មិនត្រឹមមិនអើពើការរំលោភសិទ្ធិមនុស្សរបស់របបដឹកនាំត្រកូល គីម ឡើយ លោក ត្រាំ ថែមទាំងសរសើរមេដឹកនាំជំនាន់ទីបីនេះទៀតផង។
ជំនួបលើកទីមួយរវាងមេដឹកនាំអាមេរិក និងកូរ៉េខាងជើងដែលទើបបញ្ចប់ថ្មីៗនេះ មិនបាននិយាយអ្វីដុំកំភួនទាក់ទងសំណុំរឿងសិទ្ធិមនុស្សនៅកូរ៉េខាងជើងទេ។ ប្រធានាធិបតី ដូណាល់ ត្រាំ បានរងការរិះគន់ដោយសារមិនដាក់សម្ពាធលើមេដឹកនាំកូរ៉េខាងជើង គីម ជុងអ៊ុន លើស្ថានភាពសិទ្ធិមនុស្សដ៏យ៉ាប់យ៉ឺននេះ ទោះជាបានជជែកគ្នាបន្តិចក្ដី។ លោក ត្រាំ បានយកចិត្តទុកលើការលុបបំបាត់នុយក្លេអ៊ែរខ្លាំងជាងបញ្ហាផ្សេងៗ។
ក្នុងកិច្ចសម្ភាសជាមួយទូរទស្សន៍ Fox News ក្នុងដំណើរត្រឡប់ទៅកាន់អាមេរិកវិញ លោក ត្រាំ បានបង្ហាញជំហរធម្មតាតបទៅនឹងសំណួរជុំវិញបញ្ហាសិទ្ធិមនុស្សនៅកូរ៉េខាងជើង ដែលអាចជាឆន្ទៈមួយរបស់លោកក្នុងផ្អឹបទុកសំណុំរឿងនេះមួយអន្លើសិនដើម្បីកុំឲ្យប៉ះពាល់អារម្មណ៍កូរ៉េខាងជើង។ មុននឹងនិយាដល់បញ្ហារសើបនេះ លោក ត្រាំ បានសរសើរលោក គីម ជាមនុស្សមាំមួន ព្រោះអាចដឹកនាំមនុស្សរាប់លាននាក់ទាំងវ័យក្មេង និងជាអ្នកចរចាអស្ចារ្យផង។
ត្រង់បញ្ហាធ្វើទុក្ខម្នេញប្រជាជនកូរ៉េខាងជើងវិញ ប្រធានាធិបតីអាមេរិករូបនេះនិយាយថា មានមនុស្សជាច្រើនដែលបានធ្វើទង្វើអាក្រក់ មិនមែនតែមេដឹកនាំកូរ៉េខាងជើងឡើយ។ លោក ត្រាំ បញ្ជាក់ថា៖ «ខ្ញុំអាចដឹងប្រទេសជាច្រើនដែលមានរឿងអាក្រក់កើតឡើង»។
ក្នុងរបាយការណ៍របស់ក្រសួងការបរទេសអាមេរិក របបដឹកនាំក្រុងព្យុងយ៉ាងមានមន្ទីរឃុំឃាំងនយោបាយជាច្រើនកន្លែង និងមានអ្នកជាប់ឃុំចន្លោះពី៨ម៉ឺនទៅ១២ម៉ឺននាក់ឯណោះ ហើយរស់នៅក្នុងស្ថានភាពអាក្រក់បំផុត។ អ្នកជាប់ទោសត្រូវបានធ្វើការធ្ងន់ៗ គ្មានអាហារគ្រប់គ្រាន់រហូតបាត់បង់ជីវិត។ ពេលខ្លះ ការប្រហារជីវិតត្រូវធ្វើឡើងជាសាធារណៈផង។ លើសពីនោះ របបលោក គីម ក៏ជាប់សង្ស័យសម្លាប់បងប្រុសឯងដែរ។
ដូចការរៀបរាប់ខាងលើ លោក ត្រាំ ទំនងជាកំពុងផ្ចង់អារម្មណ៍ដោះស្រាយបញ្ហានុយក្លេអ៊ែរកូរ៉េខាងជើងសិន មុននឹងលូកដៃក្នុងបញ្ហាឯទៀត។ ការរំសាយនុយក្លេអ៊ែរជាអាទិភាពសំខាន់ ហើយក៏ជាដើមហេតុនាំឲ្យមានជំនួបនៅសិង្ហបុរីដែរ។ កាលពីសន្និសីទកាសែតក្រោយចប់កិច្ចប្រជុំកំពូល លោក ត្រាំ ក៏អះអាងម្ដងហើយថា លោក និងលោក គីម មានការជជែកមួយខ្លីលើបញ្ហាសិទ្ធិមនុស្ស បើប្រៀបធៀបជាមួយការរំសាយកម្មវិធី និងអាវុធនុយក្លេអ៊ែរ៕
Tag:
អាមេរិក
កូរ៉េខាងជើង
ដូណាល់ ត្រាំ
សិទ្ធិមនុស្ស
© រក្សាសិទ្ធិដោយ thmeythmey.com