ពីចាញ់ទៅឈ្នះ៖ សុខ រិទ្ធ ឈ្នះ ហ៊ឹម សេរី វិញ ខណៈចៅក្រម៣នាក់ ត្រូវបានសហព័ន្ធសម្រេចផ្អាកការងារ៦ខែ

កីឡាជាតិ

ជាតិ

ពីចាញ់ទៅឈ្នះ៖ សុខ រិទ្ធ ឈ្នះ ហ៊ឹម សេរី វិញ ខណៈចៅក្រម៣នាក់ ត្រូវបានសហព័ន្ធសម្រេចផ្អាកការងារ៦ខែ

14, Jun 2018 , 8:19 pm

រូបភាព

កីឡាករ សុខ រិទ្ធ (ក្រហម)ចាប់ជើងគូប្រកួត ហើយ បម្រុងប្រើកណ្តាប់ដៃស្តាំវាយលើគូប្រកួត នាការប្រកួតកីឡាជាតិលើកទី២

ដោយ:

ភ្នំពេញ៖ កីឡាករ សុខ រិទ្ធ ដែលចៅក្រមកាត់ក្តីឲ្យចាញ់ ហ៊ឹម សេរី នាការប្រកួតវគ្គផ្តាច់ព្រ័ត្រក្នុងព្រឹត្តិការណ៍កីឡាជាតិលើកទី២ ត្រូវបានសហព័ន្ធកីឡាប្រដាល់គុនខ្មែរ សម្រេចឲ្យឈ្នះវិញ ក្រោយពិនិត្យមើលវីដេអូប្រកួតសារឡើងវិញ។ ចំណែកចៅក្រម៣រូប ដែលកាត់ក្តីឲ្យ ហ៊ឹម សេរី ឈ្នះនោះ ត្រូវបានសហព័ន្ធពិន័យឲ្យផ្អាកការងារចំនួន៦ខែ។

អ្នកលេងគុនខ្មែរ សុខ រិទ្ធ ដែលរងភាពអយុត្តិធម៌ក្នុងការប្រកួតកីឡាជាតិលើកទី២ ដោយចៅក្រមកាត់ក្តីឲ្យចាញ់កីឡាករ ហ៊ឹម សេរី នាការប្រកួតវគ្គផ្តាច់ព្រ័ត្រ ទទួលបានភាពយុត្តិធម៌វិញហើយ ក្រោយសហព័ន្ធកីឡាប្រដាល់គុនខ្មែរសម្រេចឲ្យរូបគេឈ្នះវិញ។ សុខ រិទ្ធ ត្រូវបានចៅក្រមកាត់ក្តីឡើងវិញ ដោយឲ្យឈ្នះកីឡាករ ហ៊ឹម សេរី ក្នុងលទ្ធផល ៣-២។ ក្នុងនោះគណៈវិនិច្ឆ័យបានឲ្យ ហ៊ឹម សេរី ឈ្នះក្នុងទឹកទី១និងទី២ តែពីទឹកទី៣ដល់ទឹកទី៥ សុខ រិទ្ធ ជាអ្នកឈ្នះ។

ការសម្រេចនេះ បន្ទាប់ពីសហព័ន្ធមើលវីដេអូប្រកួតសារឡើងវិញ ក្រោយមានការតវ៉ា និងរិះគន់ពីមហាជន ដែលសង្ស័យលើការផ្ដល់ពិន្ទុមិនសុក្រឹត្យដល់កីឡាករ សុខ រិទ្ធ ឲ្យចាញ់កីឡាករ ហ៊ឹម សេរី នាការប្រកួតដណ្តើមមេដាយមាសលើទម្ងន់៥១គីឡូក្រាម នៅពហុកីឡដ្ឋានជាតិមរតកតេជោកាលពីពេលកន្លងទៅមក។

ជ័យជម្នះកើតចេញពីការតវ៉ានេះ បានជួយឲ្យ សុខ រិទ្ធ ក្លាយជាកីឡាករជម្រើសជាតិគុនខ្មែរឆ្នាំ២០១៩ ប្រចាំសហព័ន្ធកីឡាប្រដាល់គុនខ្មែរថែមទៀតផង។ ចំណែកចៅក្រម៣រូបរួមមាន លោក នួន បូរ៉ា, ឡឹក ចំណាប់ និងលោក សួន ប៊ុនសូត្រ ដែលកាត់ក្តីឲ្យ ហ៊ឹម សេរី ឈ្នះក្នុងការប្រកួតភ្លាមៗនេះ ត្រូវបានសហព័ន្ធពិន័យដោយផ្អាកការងារចំនួន៦ខែ ដើម្បីទុកពេលសិក្សារៀនសូត្រឡើងវិញ។

កីឡាករ សុខ រិទ្ធ មានស្រុកកំណើតនៅស្រុកមង្គលបូរី ខេត្តបន្ទាយមានជ័យ។ បច្ចុប្បន្នរូបគេជាសិស្សគុនរបស់ក្លិបប្រដាល់ សាន់ សាយយ៉ាន ដែលមានលោក សាន់ សាយយ៉ាន់ ជាគ្រូបង្វឹក។ សុខ រិទ្ធ ជាកីឡាករល្បីឈ្មោះមួយរូបនៅប្រទេសថៃ ហើយក៏ធ្លាប់ឈ្នះខ្សែក្រវាត់នៅថៃផងដែរ៕