អន្តរជាតិ
នយោបាយជាតិ
ប្រធានាធិបតី ត្រាំ រងការរិះគន់ព្រោះលើកដៃគំនាប់ឧត្តមសេនីយ៍កូរ៉េខាងជើង លោក ដូណាល់ ត្រាំ លើកដៃគំនាប់ឧត្តមសេនីយ៍កូរ៉េខាងជើង
× ប្រធានាធិបតីអាមេរិក ដូណាល់ ត្រាំ បានរងការរិះគន់ជាថ្មីទៀតបន្ទាប់ពីលោកបានលើកដៃគំនាប់ឧត្តមសេនីយ៍កូរ៉េខាងជើងមួយរូបក្នុងជំនួបជាមួយមេដឹកនាំកូរ៉េខាងជើង គីម ជុងអ៊ុន នៅឯសិង្ហបុរី។ លោក ត្រាំ រងពាក្យរិះគន់ ព្រោះជាមេដឹកនាំប្រទេសមួយ បែរទៅជាគោរពនាយទាហាននៃប្រទេសដែលជាសត្រូវនឹងគ្នាទៅវិញ។ យ៉ាងណាមិញ សេតវិមានបានចេញមុខការពារលោក ត្រាំ និងចាត់ទុកសកម្មភាពនេះជាការបង្ហាញការគោរពធម្មតាប៉ុណ្ណោះ។
បន្ទាប់ពីលោក គីម ជុងអ៊ុន បញ្ចប់ដំណើរទស្សនកិច្ចនៅសិង្ហបុរី ទូរទស្សន៍រដ្ឋកូរ៉េខាងជើងបានផ្សាយវីដេអូជាង៤២នាទីស្ដីពីសកម្មភាពរបស់មេដឹកនាំកូរ៉េខាងជើងជាមួយប្រធានាធិបតីអាមេរិក ដូណាល់ ត្រាំ ។ តាមរយៈវីដេអូនោះ គេឃើញលោក ត្រាំ បានលើកដៃគោរពឧត្តមសេនីយ៍ ណូ ក្វាងឈុល រដ្ឋមន្ត្រីកងទ័ពប្រជាជនកូរ៉េខាងជើង ដែលការណ៍នេះធ្វើឲ្យមានការរិះគន់កាន់តែខ្លាំងលើលោក ត្រាំ ក្រោយពេលលោកបានធ្វើសម្បទានច្រើនទៅហើយនោះ។
ហេតុការណ៍ភ្ញាក់ផ្អើលខាងលើនេះកើតឡើងនៅពេលដែលលោក គីម ណែនាំមន្ត្រីប្រតិភូរបស់ខ្លួនទៅកាន់លោក ត្រាំ។ មកដល់លោកឧត្តមសេនីយ៍ ណូ លោក ត្រាំ ក៏បានបោះដៃទៅមុខដើម្បីស្វាគមន៍មុន តែលោក ណូ ស្រាប់តែលើកដៃគំនាប់វិញ ហើយប្រធានាធិបតីអាមេរិកក៏លើកដៃគំនាប់ដូចគ្នា រួចទើបចាប់ដៃរដ្ឋមន្ត្រីការពារជាតិកូរ៉េខាងជើងតាមក្រោយ។
ក្រុមអ្នករិះគន់លោក ត្រាំ សឹងមិនជឿថា ការគោរពបែបយោធានេះអាចកើតឡើងបានទេ ខណៈគេមើលឃើញថា លោក ត្រាំ បានយកចិត្តមេដឹកនាំកូរ៉េខាងជើងយ៉ាងខ្លាំង ទោះជារបបដឹកនាំក្រុងព្យុងយ៉ាងរងការចោទប្រកាន់ពាក់ព័ន្ធការរំលោភបំពានសិទ្ធិមនុស្សធ្ងន់ធ្ងរក្ដី។ សមាជិកព្រឹទ្ធសភាបក្សប្រជាធិបតេយ្យ Chris Van Hollen បានសរសេរលើ Twitter ថា ជារឿងមិនភ្ញាក់ផ្អើល កូរ៉េខាងជើងបានប្រើប្រាស់ប្រធានាធិបតីអាមេរិកក្នុងយុទ្ធនាការឃោសនារបស់ខ្លួន។
យ៉ាងណាមិញ មន្ត្រីសេតវិមានបានចេញមុខបកស្រាយសកម្មភាពរបស់លោក ត្រាំ ដោយអះអាងថា វាជាគ្រាន់តែជាការគួរសមប៉ុណ្ណោះ។ អ្នកនាំពាក្យសេតវិមាន Sarah Sanders និយាយថា វាជារឿងរាក់ទាក់ធម្មតា ពេលមន្ត្រីយោធាពីប្រទេសផ្សេងគោរព លោក ត្រាំ ក៏គោរពវិញ។
តាមពិតទៅ លោក ត្រាំ មិនមែនជាប្រធានាធិបតីអាមេរិកទីមួយដែលរងការរិះគន់ ព្រោះតែការគោរពនេះឡើយ។ ក្នុងឆ្នាំ២០០៩ អតីតប្រធានាធិបតី បារ៉ាក់ អូបាម៉ា ត្រូវសមាជិកបក្សសាធារណៈពន្លះចាស់ដៃបន្ទាប់ពីលោកឱនគោរពអធិរាជជប៉ុន អាគីហ៊ីតុ ។ ដល់ឆ្នាំ២០១៤ លោក អូបាម៉ា ក៏ការរិះគន់ម្ដងទៀតនៅពេលលោកឱនលំទោនចំពោះមុខមហាក្សត្រអារ៉ាប៊ីសាអូឌីត អាប់ឌុលឡាហ៍ និលើកដៃគោរពទាំងដៃម្ខាងកំពុងកាន់កែវកាហ្វេ៕
Tag:
អាមេរិក
កូរ៉េខាងជើង
ដូណាល់ ត្រាំ
© រក្សាសិទ្ធិដោយ thmeythmey.com