អំពើល្អ! អ្នករត់កង់បីម្នាក់នៅសៀមរាបតាមយកលុយឲ្យកីឡាករអង្គរថាយហ្គឺរដែលភ្លេច

កីឡាជាតិ

ជាតិ

អំពើល្អ! អ្នករត់កង់បីម្នាក់នៅសៀមរាបតាមយកលុយឲ្យកីឡាករអង្គរថាយហ្គឺរដែលភ្លេច

15, Jun 2018 , 9:59 pm

រូបភាព

ដោយ:

អ្នករត់កង់បីក្នុងខេត្តសៀមរាបម្នាក់បានផ្ញើសារទៅកាន់ប្រធានក្លិបបាល់ទាត់អង្គរថាយហ្គឺរ លោក Akihiro Kato ដើម្បីសុំជួបកីឡាករ Kazuteru Okamoto ដែលបានភ្លេចលុយ២០ដុល្លារនៅលើកង់បីរបស់លោក។ អ្នករត់បីនោះទទួលបានអាវយឺតក្លិបអង្គរថាយហ្គឺរជាសំណងមួយ ក្រោយប្រគល់លុយ២០ដុល្លារឲ្យកីឡាកររូបនោះវិញ។

ក្រោយចប់ការប្រកួតដោយគ្មានការស៊ុតបញ្ចូលទីរវាងក្រុមអង្គរថាយហ្គឺរជាមួយក្រុមសូលទីឡូអង្គរកាលពីថ្ងៃទី៩ ខែមិថុនា បុរសរត់កង់បីដែលជាអ្នកគាំទ្រក្លិបអង្គរថាយហ្គឺរម្នាក់ បានផ្ញើសារទៅកាន់ប្រធានក្លិបអង្គរថាយហ្គឺរលោក Akihiro Kato សុំជួបកីឡាករម្នាក់។ អ្នករត់កង់បីរូបនោះ បានជួបកីឡាករ Kazuteru Okamoto ដែលភ្លេចលុយ២០ដុល្លារលើកង់បីរបស់ខ្លួនដូចបំណង។ បន្ទាប់មក គាត់បានប្រគល់លុយ២០ដុល្លារនោះឲ្យកីឡាករ Kazuteru វិញ ហើយកីឡាករជប៉ុនរូបនោះ ក៏បានឲ្យអាវយឺតក្លិបអង្គរថាយហ្គឺរមួយដល់បុរសអ្នករត់កង់បី ដើម្បីតបស្នងចំពោះទឹកចិត្តដែលជាគំរូដ៏ប្រពៃមួយនេះ។

ទំព័រហ្វេសប៊ុកក្លិបបាល់ទាត់អង្គរថាយហ្គឺរដែលបានបង្ហោះរូបបុរសរត់កង់បីជាមួយកីឡាករ Kazuteru បានរៀបរាប់ថា មួយថ្ងៃមុនការប្រកួតជាមួយក្រុមសូលទីឡូអង្គរ កីឡាករ Kazuteru Okamoto បានជិះកង់បីខាងលើ ហើយបានភ្លេចលុយ២០ដុល្លារនៅលើកង់បីនោះ។ នៅថ្ងៃប្រកួត បុរសរត់កង់បីខាងលើ បានទៅទស្សនានិងគាំទ្រក្លិបអង្គរថាយហ្គឺរក្នុងនាមជាអ្នកគាំទ្រ។

បុរសនោះបានចាប់អារម្មណ៍លើកីឡាករជប៉ុនលេងម៉ូដសក់ម្នាក់ដែលកំពុងទាត់បាល់ពិន័យ Free Kick ក្រោយអ្នកគាំទ្រស្រែកដោយហៅឈ្មោះកីឡាករខាងលើ(Teru Teru) ភ្លាមៗនោះធ្វើឲ្យនឹកឃើញថា កីឡាកររូបនេះហើយដែលបានភ្លេចលុយ២០ដុល្លារលើកង់បីរបស់ខ្លួន។ ក្រោយចប់ការប្រកួតអ្នកគាំទ្រក្លិបអង្គរថាយហ្គឺររូបនេះ បានផ្ញើសារទៅកាន់ប្រធានក្លិបសុំជួបកីឡាករ Kazuteru Okamoto តែម្តង៕