អាជីវករលក់ទុរេន រំពឹងរកប្រាក់ចំណេញយ៉ាងតិច ២ពាន់ដុល្លារ ក្នុងមួយរដូវនេះ

ជាតិ

សេដ្ឋកិច្ច

អាជីវករលក់ទុរេន រំពឹងរកប្រាក់ចំណេញយ៉ាងតិច ២ពាន់ដុល្លារ ក្នុងមួយរដូវនេះ

16, Jun 2018 , 6:59 pm

រូបភាព

ដោយ: អ៊ូ សុខមាន (OU Sokmean)

ភ្នំពេញ៖ ទុរេនកំពតឆ្នាំនេះ កំពុងមានទីផ្សារខ្លាំង ដោយសារមានការគាំទ្រពីសំណាក់ប្រជាពលរដ្ឋខ្មែរ និងបរទេស។ អាជីវករលក់ទុរេនមួយចំនួន មានក្តីរំពឹងខ្ពស់ក្នុងការរកប្រាក់ចំណេញមិនតិចជាង២ពាន់ដុល្លារឡើយ ខណៈតម្លៃទីផ្សារផ្លែទុរេន ជាមធ្យមពី ២២,០០០រៀល ដល់ ២៧,០០០រៀល ក្នុងមួយគីឡូក្រាម។

លោក គុណ នី ជាអ្នកលក់ទុរេនបោះដុំ និងរាយ នៅកែងវិទ្យាល័យទួលទំពូង បានប្រមូលទិន្នផលទុរេន ពីដីចម្ការខ្លួននៅក្នុងតំបន់ទឹកឈូ ខេត្តកំពត យកមកផ្គត់ផ្គង់នៅលើទីផ្សារក្នុងទីក្រុងភ្នំពេញ អស់រយៈពេល៣ឆ្នាំមកហើយ។ សម្រាប់រដូវទុរេនឆ្នាំនេះ លោក គុណ នី អាចលក់ចេញក្នុងតម្លៃ១៩,០០០រៀលក្នុងមួយគីឡូក្រោម សម្រាប់ការលក់បោះដុំ និងតម្លៃពី២១,០០០ ទៅ២៣,០០០រៀល ក្នុងមួយគីឡូសម្រាប់ការលក់រាយនៅលើទីផ្សារ។ តម្លៃនេះ គឺលក់បានថ្លៃជាងឆ្នាំមុន ពី១,០០០រៀល ទៅ២,០០០រៀលក្នុងមួយគីឡូក្រាម។

លោក គុណ នី ដែលកំពុងឈរលក់ទុរេនជាមួយក្មួយប្រុសពីរនាក់ បាននិយាយថា លោកអាចលក់ទុរេនបានពី ១០០ ទៅ១៥០គីឡូក្រាម ក្នុងមួយថ្ងៃ ដោយចំណាយពេលលក់ពីម៉ោង២រសៀល ដល់ម៉ោង១០យប់។ ដោយសារឃើញសន្ទុះនៃការគាំទ្រពីសំណាក់ប្រជាពលរដ្ឋមកលើទិន្នផលទុរេននេះ លោក គុណ នី មានក្តីរំពឹងថាលោកអាចរកចំណេញបានមិនតិចជាង២ពាន់ដុល្លារឡើយ។

« ខ្ញុំអាចរកចំណូលបានពី២,៥លាន ទៅ៤លានរៀលក្នុងមួយថ្ងៃ ដោយមានការគាំទ្រ ពីអតិថិជនចំរុះជាតិសាសន៍ ដូចជា ខ្មែរ បារាំង ពិសេសជនជាតិចិន មកទិញទុរេនខ្ញុំរាល់ថ្ងៃតែម្តង។ ឆ្នាំនេះខ្ញុំអាចចំណេញពីការលក់ទុរេន បាន៣ ទៅ៥ពាន់ដុល្លារ ក្នុងមួយរដូវទុរេនខ្មែរនេះ ដោយឆ្នាំកន្លងទៅខ្ញុំចំណេញបានប្រហែល ២ពាន់ដុល្លារ»។ នេះជាការបញ្ជាក់របស់លោក គុណ នី ដែលយល់ឃើញថា មូលហេតុដែលនាំឲ្យទុរេនកំពត ត្រូវប៉ាន់នៅក្នុងទីផ្សារនេះ ដោយសារតែមានឈ្មួញជនជាតិចិន ចុះមកប្រមូលទិញទុរេនច្រើនយកទៅប្រទេសចិន។

បើតាមបុរសមាឌធំ សប្បុរស្រអែមរូបនេះ ក្នុងខែកុម្ភៈកន្លងមក លោកបានលក់ទុរេន ៥០០គីឡូក្រាមឲ្យឈ្មួញចិនដែរ នៅតម្លៃ២៥,០០០រៀលក្នុងមួយគីឡូក្រាម ដោយទទួលប្រាក់បាន ១២,៥លានរៀល។

ដោយសារតែរដូវទិន្នផលទុរេន កំពុងសំបូរហូរហៀរនោះ នៅទីតាំងមួយចំនួន នៅម្ដុំទួលទំពូងម្ដុំបឹងត្របែក ម្ដុំផ្សារដើមថ្កូវជាដើម គឺមានការដាក់លក់ទុរេន ជាហូរហែក្រៅពីតំបន់ផ្សារធំៗផ្សេងទៀត។ ដោយធ្វើដំណើរឆ្លងកាត់ទីតាំងម្ដុំផ្សារដើមថ្កូវនោះ មានកន្លែងលក់ជាច្រើនដាក់លក់តម្រៀបជួរគ្នា ដែលនាំឲ្យក្លិនទុរេន ដ៏សែនឈ្ងុយឈ្ងប់បានបង្ហើរមកប៉ះច្រមុះអ្នកធ្វើដំណើរ ។

ទីតាំងលក់ទុរេនជាប់របងវិទ្យាល័យហ៊ុនសែនផ្សារដើមថ្កូវ មានមនុស្សជាច្រើននាក់ កំពុងចោមរោមកន្លែងលក់ទុរេនរបស់លោកស្រី ម៉េងហៀង ដែលកំពុងនិយាយតម្លៃជាមួយអ្នកទិញ ខណៈដៃរបស់គាត់ក៏កំពុងមមាញឹកហែកផ្លែទុរេន ដាក់ប្រអប់ឲ្យអ្នកទិញម្នាក់ទៀត។

ស្ថិតនៅចន្លោះម៉ោង១១-១២ ថ្ងៃត្រង់ កន្លែងលក់ទុរេនរបស់លោកស្រី ម៉េងហៀង មានភ្ញៀវចូលមកទិញហូរហែមិនដាច់សោះ ដោយមានភ្ញៀវខ្លះទិញ២ផ្លែ ខ្លះទៀតទិញ៤ផ្លែ ហើយខ្លះទៀតនិយាយស្នើឲ្យបងស្រី ម៉េង ហៀង ជួយរើសទុរេន ទុំល្អសម្រាប់ពួកគេទៀតផង ។

បន្ទាប់ពីស្ងាត់ភ្ញៀវមកទិញទុរេនស្ត្រីមាឌធំល្មម សម្បុរសរូបនេះ ក៏បានឆ្លៀតប្រាប់សារព័ត៌ថ្មីៗថា ទុរេនដែលបងស្រី លក់រាល់ថ្ងៃមានពីរប្រភេទ គឺទុរេនម៉ាន់ថង មានសាច់ក្រាស់ស្ងួត ពណ៌ទឹកដោះគោ លក់ក្នុងតម្លៃទាបបំផុត២៦,០០០រៀល និងមួយប្រភេទទៀតគឺទុរេន ឈ្មោះឪខាក់ ដែលជាប្រភេទទុរេនទុំសាច់ស្ងួត មានពណ៌លឿងល្មៀត រសជាតិផ្អែមស្អិតល្មួត ហើយសំបកមានពណ៌ទឹកប្រាក់ និងពណ៌បៃតងចាស់ លក់ក្នុងតម្លៃចន្លោះពី២២,០០០ ដល់២៤,០០០រៀលក្នុងមួយគីឡូក្រាម។

បងស្រី ម៉េងហៀង ដែលបានប្រកបរបរលក់ទុរេន ៣ឆ្នាំហើយ ក្រៅពីរបរលក់ត្រីរូបនេះ បានបញ្ជាក់ដូច្នេះថា៖« ទុរេនដែលខ្ញុំលក់នេះ គឺរបស់ឪពុកខ្ញុំដាំក្នុងខេត្តកំពត ដោយទុរេនឆ្នាំនេះ ឲ្យផលយឺតជាងរាល់ឆ្នាំ ហើយទទួលបានផលតិចជាងឆ្នាំមុនៗទៀត ដោយសារតែមានភ្លៀងធ្លាក់ច្រើន។ ប៉ុន្តែតម្លៃទុរេនឆ្នាំនេះ លក់បានថ្លៃខ្ពស់ជាងឆ្នាំមុនៗ ដោយក្នុងមួយថ្ងៃ ខ្ញុំអាចលក់ទុរេនបានតិចបំផុត៥០គីឡូក្រាម ជាមួយតម្លៃមធ្យម២២,០០០រៀល ក្នុងមួយគីឡូក្រាម ដោយទទួលបានចំណូលបាន ១,១លានរៀល »។

ដ្បិតឆ្នាំនេះលោកស្រី ម៉េងហៀង ប្រមូលផលទុរេនមកលក់តិចជាងមុនក៏ពិតមែន ប៉ុន្តែស្ត្រីវ័យជាង៤០ឆ្នាំរូបនេះ នៅរំពឹងថា នឹងអាចចំណេញប្រាក់សុទ្ធ២ពាន់ដុល្លារ ដូចឆ្នាំមុនដែរ ដោយសារតម្លៃទុរេនឆ្នាំនេះ លក់បានថ្លៃជាងឆ្នាំទៅ និងមានអតិថិជនគាំទ្រច្រើន៕