កីឡាជាតិ
ជាតិ
សូលទីឡូអង្គរត្រូវការឈ្នះទ័ព នាជំនួបបម្រាមចុងក្រោយរបស់ លោក ភា សុភ័ក្ត្រា ល្ងាចនេះ អ្នកគាំទ្រក្លិបសូលទីឡូអង្គរ ពេលគាំទ្រក្លិបក្នុងជំនួបជាមួយក្រុមអង្គរថាយហ្គឺរ។ រូបភាពពីហ្វេសប៊ុកក្លិបសូលទីឡូអង្គរ
× ក្រុមចំណូលថ្មីសូលទីឡូអង្គរ ត្រូវទតល់ជាមួយក្រុមក្រសួងការពារជាតិ(ទ័ព) នាការប្រកួតពានរង្វាន់មិត្តហ្វូនខេមបូឌានលីគនៅម៉ោង៦ល្ងាចថ្ងៃទី១៦ មិថុនា ឆ្នាំ២០១៨ នាកីឡដ្ឋានស្តាតចាស់។ នេះជាជំនួបចុងក្រោយនៃការពិន័យរបស់លោក ភា សុភ័ក្ត្រា គ្រូបង្វឹកក្រសួងការពារជាតិ។ ពហុកីឡដ្ឋានជាតិ ជាទីតាំងកាត់សេចក្តីរវាងក្រុមអគ្គស្នងការនគរបាលជាតិជាមួយក្រុមអង្គរថាយហ្គឺរនៅម៉ោង៦:៣០នាទី ក្រោយអាស៊ីអឺរ៉ុបបើកទ្វារកីឡដ្ឋាន A.E.U ស្វាគមន៍ព្រះខ័នរាជស្វាយរៀង។
ក្រុមសូលទីឡូអង្គរ ទាមទារឈ្នះក្រសួងការពារជាតិ នាជំនួបសប្តាហ៍ទី១០ពានរង្វាន់មិត្តហ្វូនខេមបូឌានលីគល្ងាចនេះ ដើម្បីធ្វើឲ្យមានគម្លាតកាន់តែឆ្ងាយពីតំបន់កាត់ចេញនៃក្របខណ្ឌបាល់ទាត់កំពូល។ បច្ចុប្បន្ន សូលទីអង្គរឈរលេខរៀងទី១០មាន៨ពិន្ទុ ពោលគឺលើក្រុមដែលឈរក្នុងតំបន់ក្រហមអគ្គិសនីមាន៤ពិន្ទុ តែមួយចំណាត់ថ្នាក់តែប៉ុណ្ណោះ។
ក្រុមក្រសួងការពារជាតិ បើកទ្វារកីឡដ្ឋានស្តាតចាស់ស្វាគមន៍ក្រុមភ្ញៀវសូលទីឡូអង្គរនាវេលាម៉ោង៦ល្ងាចថ្ងៃទី១៦ ខែមិថុនា ឆ្នាំ២០១៨។ វាជាជំនួបចុងក្រោយនៃបម្រាមរបស់គណៈកម្មការវិន័យនៃសហព័ន្ធកីឡាបាល់ទាត់កម្ពុជា ដែលហាមមិនឲ្យលោក ភា សុភ័ក្ត្រា គ្រូបង្វឹកក្រុមក្រសួងការជាតិ ដឹកនាំក្រុម៤ប្រកួតក្នុងពានរង្វាន់មិត្តហ្វូនខេមបូឌានលីគ។ បច្ចុប្បន្នក្រសួងការពារជាតិឈរលេខរៀងទី៤មាន១៥ពិន្ទុ។ ដូច្នេះ ទ័ពក៏ត្រូវការឈ្នះដូចគ្នាដើម្បីបង្កើនឱកាសក្នុងការប្រជែងដណ្តើមលេខ៣ ដែលវិសាខាកំពុងឈរដោយមាន១៩ពិន្ទុ។
នៅកីឡដ្ឋានអាស៊ីអឺរ៉ុបម៉ោង៣រសៀលនេះ ក្រុមម្ចាស់ផ្ទះអាស៊ីអឺរ៉ុបត្រូវតទល់ជាមួយក្រុមព្រះខ័នរាជស្វាយរៀង ដែលប្រើប្រាស់អ្នកចាំទីដៃទី៣ អ៊ឹម រិទ្ធា ក្រោយអ្នកចាំទីដៃទី១និងទី២ជាប់ពិន័យព្យួរការប្រកួត៣ខែរៀងៗខ្លួន ពាក់ព័ន្ធករណីហិង្សាក្នុងជំនួបនៅខេត្តស្វាយរៀងកាលពីពេលកន្លងទៅ។ ករណីប្រទូសរ៉ាយនេះដែរ ធ្វើឲ្យកីឡាករសំខាន់ៗចំនួន៤រូបរួមមាន សឿយ វិសាល, ណុប តុលា, សារ៉េត គ្រីយ៉ា និងកីឡាករ សុក សំណាង អវត្តមានក្នុងជំនួបនេះផងដែរ។
ពហុកីឡដ្ឋានជាតិនឹងក្លាយជាទីតាំងកាត់សេចក្តីជំនួបរវាងក្រុមអគ្គស្នងការនគរបាលជាតិជាមួយក្រុមអង្គរថាយហ្គឺរនៅម៉ោង៦:៣០នាទី។ បច្ចុប្បន្នក្រុមអគ្គស្នងការនគរបាលជាតិដែលចាញ់ណាហ្គាវើល ៤-២ កាលពីសប្តាហ៍មុន ឈរលេខរៀងទី៦មាន១៤ពិន្ទុ រីឯអង្គរថាយហ្គឺរឈរលេខរៀងទី៩មាន១១ពិន្ទុ ក្រោយបញ្ចប់ដោយគ្មានការស៊ុតបញ្ចូលទីជាមួយសូលទីឡូអង្គរ៕
Tag:
Cambodian League 2018
ភា សុភ័ក្ត្រា
សូលទីឡូអង្គរ
© រក្សាសិទ្ធិដោយ thmeythmey.com