ជាតិ
សម្ដេចក្រុមព្រះ បានធូរស្បើយហើយ រូបពីគណនីហ្វេសបុក ព័ត៌មានសម្តេចក្រុមព្រះ
× ភ្នំពេញ៖ សម្ដេចក្រុមព្រះនរោត្តម រណឬទ្ធិ បានឆ្លងផុតគ្រោះថ្នាក់ហើយ បន្ទាប់ពីជួបគ្រោះថ្នាក់ចរាចរណ៍នៅព្រឹកថ្ងៃទី១៧ ខែមិថុនា។ នេះបើតាមប្រភពពីអ្នកដង្ហែរក្បួនសម្ដេចក្រុមព្រះ មុនពេលកើតហេតុ។ បច្ចុប្បន្នសម្រេចក្រុមព្រះកំពុងសម្រាកព្យាបាលនៅមន្ទីរពេទ្យរ៉ូយ៉ាល់ភ្នំពេញ ដោយព្រះអង្គរងរបួសប្រេះស្មងជើងខាងឆ្វេង ចំណែកឯការហូរឈាមតាមត្រចៀកក្រោយពេលកើតហេតុភ្លាមៗនោះ ត្រូវបានគ្រូពេទ្យពិនិត្យឃើញថា មិនមានបញ្ហាដល់ព្រះសិរសា (ក្បាល) របស់ព្រះអង្គឡើយ។
យ៉ាងណាព័ត៌មានអំពីមរណភាពរបស់អ្នកម្នាង អ៊ុក ផល្លា ត្រូវបានក្រុមគ្រូពេទ្យ និងព្រះញាតិវង្ស បិទមិនទាន់ឲ្យព្រះអង្គដឹងឡើយ ដោយខ្លាចប៉ះពាល់ដល់សុខភាពរបស់ទ្រង់។
សូមបញ្ជាក់ថា សម្ដេចក្រុមព្រះ នរោត្តម រណឬទ្ធិ និងអ្នកម្នាង អ៊ុក ផល្លា បានជួបគ្រោះថ្នាក់ចរាចរណ៍ បុកជាមួយរថយន្តតាក់ស៊ី នៅម៉ោងជិត៩ព្រឹកថ្ងៃអាទិត្យនេះ ស្ថិតនៅតាមបណ្ដោយផ្លូវជាតិលេខ៤ ចន្លោះគីឡូម៉ែត្រ ២០០-២០១ ភូមិអូរតាសេក ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ។ ហេតុការនេះបានបណ្ដាលឲ្យមានមនុស្សប្រុសស្រីរបួសចំនួន៦នាក់ ស្លាប់ម្នាក់គឺអ្នកម្នាង អ៊ុក ផល្លា៕
Tag:
សម្ដេចក្រុមព្រះ
គ្រោះថ្នាក់ចរាចរណ៍
អ្នកម្នាងអ៊ុកផល្លា
© រក្សាសិទ្ធិដោយ thmeythmey.com