ជាតិ
សង្គមជាតិ
សពអ្នកម្នាង អ៊ុក ផល្លា នឹងតម្កល់ធ្វើបុណ្យនៅវត្តបទុមវត្តី
× គណបក្សហ្វ៊ុនស៊ិនប៉ិច សម្រេចយកវត្តបទុមវត្តី ធ្វើជាកន្លែងរៀបចំពិធីបុណ្យសពរបស់អ្នកម្នាង អ៊ុក ផល្លា ដែលបានទទួលមរណភាព បន្ទាប់ពីជួបគ្រោះថ្នាក់ចរាចរណ៍នៅខេត្តព្រះសីហនុ កាលពីព្រឹកមិញ។ នេះបើតាមលោក ញ៉េប ប៊ុនជិន អ្នកនាំពាក្យគណបក្សហ្វ៊ុនស៊ិនប៉ិច ដែលបានប្រាប់សារព័ត៌មានថ្មីៗ តាមទូរសព្ទនៅយប់ថ្ងៃទី១៧ ខែមិថុនា ឆ្នាំ២0១៨។
លោក ញ៉េប ប៊ុនជិន បាននិយាយទាំងអាក់អួល យ៉ាងដូច្នេះថា៖«ឥឡូវសពរបស់អ្នកម្នាង នៅក្នុងមន្ទីរពេទ្យ នៅឡើយទេ។ ទាល់តែស្អែកបានយើងបញ្ជូនទៅវត្តបទុមវត្តី។ យើងសូមប្រកាសថា ប្រជាជន និងបរិស័ទណា ដែលស្រឡាញ់គាំទ្រអ្នកម្នាង ហើយចង់ទៅចូលរួមពិធីបុណ្យ សូមអញ្ជើញចុះ»។
អ្នកនាំពាក្យរូបនេះ បន្តថា គណបក្សមិនទាន់បានសម្រេចជាផ្លូវការនោះទេ ទាក់ទងនឹងកម្មវិធីបុណ្យសពរបស់អ្នកម្នាង អ៊ុក ផល្លា ដូច្នេះ លោក មិនទាន់អាចបញ្ជាក់បានឡើយ ថាសពរបស់អ្នកម្នាង នឹងត្រូវតម្កល់ទុករយៈពេលយូរប៉ុនណា។
ចំណែកឯ សម្តេចក្រុមព្រះ នរោត្តម រណឫទ្ធិ ប្រធានគណបក្សហ្វ៊ុនស៊ិនប៉ិច ដែលបានជួបគ្រោះថ្នាក់ចរាចរណ៍ជាមួយអ្នកម្នាង បានដឹងខ្លួនហើយ ហើយក៏អាចមានបន្ទូលបានដែរ។ ប៉ុន្តែ ព័ត៌មានអំពីមរណភាពរបស់អ្នកម្នាង ដែលជាភរិយារបស់ព្រះអង្គ ត្រូវបានលោក ញ៉េប ប៊ុនជិន អះអាងថា មិនទាន់ហ៊ានផ្តល់ឲ្យព្រះអង្គ ដឹងនោះទេ។ លោក ប្រាប់ហេតុផលបែបនេះថា៖«យើងមិនទាន់ចង់ឲ្យព្រះអង្គដឹងទេ ព្រោះយើងខ្លាចប៉ះពាល់ដល់សុខភាពរបស់ព្រះអង្គ»។
ចំពោះព័ត៌មាននៃការបញ្ជូនព្រះអង្គ ទៅបន្តព្យាបាលនៅក្រៅប្រទេស លោក ញ៉េប ប៊ុនជិន មិនទាន់អាចប្រាប់ឡើយ ដោយសារតែលោក មិនទាន់ដឹងច្បាស់លាស់៕
© រក្សាសិទ្ធិដោយ thmeythmey.com