សពអ្នកម្នាង អ៊ុក ផល្លា តម្កល់នៅវត្តបទុម ខណៈសម្ដេចក្រុមព្រះ ទៅដល់ថៃ ដើម្បីបន្តព្យាបាល

ជាតិ

សពអ្នកម្នាង អ៊ុក ផល្លា តម្កល់នៅវត្តបទុម ខណៈសម្ដេចក្រុមព្រះ ទៅដល់ថៃ ដើម្បីបន្តព្យាបាល

18, Jun 2018 , 10:56 am

រូបភាព

ដោយ:

ភ្នំពេញ៖ នៅព្រឹកថ្ងៃទី១៨ ខែមិថុនានេះ សពរបស់អ្នកម្នាង អ៊ុក ផល្លា ត្រូវបានយកទៅតម្ដល់នៅវត្តបទុមវត្តីរួចរាល់ហើយ ខណៈសម្ដេចក្រុមព្រះ ត្រូវបានបញ្ជូនទៅពិនិត្យសុខភាពបន្តនៅប្រទេសថៃ កាលពីយប់ថ្ងៃទី១៧ ខែមិថុនា។ នេះបើតាមការឲ្យដឹង ពីលោក ញ៉េប ប៊ុកជិន អ្នកនាំពាក្យគណបក្សហ្វ៊ុនស៊ិនប៉ិច។

លោក ញ៉េប ប៊ុនជិន បានអះអាងថា ការបញ្ជូនសម្ដេចក្រុមព្រះ ទៅមន្ទីរពេទ្យនៅប្រទេសថៃនេះ គឺដើម្បីឲ្យប្រាកដថា សុខភាពរបស់ទ្រង់ ពិតជាមិនមានបញ្ហាធ្ងន់ធ្ងរ ដូចការអះអាងរបស់គ្រូពេទ្យនៅកម្ពុជា។

ទាក់ទងនឹងកាលបរិច្ឆេទនៃការបូជាសព អ្នកម្នាង អ៊ុក ផល្លា ដែលកំពុងតម្កល់នៅក្នុងវត្តបទុមវត្ដីវិញនោះ អ្នកនាំពាក្យរូបនេះ មិនទាន់អាចបញ្ចាក់បានឡើយ ហើយព័ត៌មាននៃមរណភាពរបស់អ្នកម្នាង ក៏នៅមិនទាន់ជ្រាបដល់សម្ដេចក្រុមព្រះនៅឡើយដែរ។

បើទោះជាគណបក្សហ្វ៊ុនស៊ិនប៉ិច កំពុងមានទុក្ខជាទម្ងន់បែបនេះក្ដី តែអ្នកនាំពាក្យខាងលើបានឲ្យដឹងថា គ្រោះថ្នាក់នេះនឹងមិនធ្វើឲ្យប៉ះពាល់ដល់យុទ្ធនាការឃោសនាបោះឆ្នោតនាពេលខាងមុខឡើយ។ លោកអះអាងបែបនេះ ដោយសារតែគណបក្សហ្វ៊ុនស៊ិនប៉ិច មានគណៈកម្មការរួចជាស្រេច ក្នុងការរៀបចំខ្លួនក្នុងយុទ្ធនាការឃោសនាបោះឆ្នោតនៅខែកក្កដា ខាងមុខនេះ។

សម្ដេចក្រុមព្រះ នរោត្តម រណឬទ្ធិ និងអ្នកម្នាង អ៊ុក ផល្លា បានជួបគ្រោះថ្នាក់ចរាចរណ៍ បុកជាមួយរថយន្តតាក់ស៊ី នៅម៉ោងជិត៩ព្រឹកថ្ងៃអាទិត្យ ស្ថិតនៅតាមបណ្ដោយផ្លូវជាតិលេខ៤ ចន្លោះគីឡូម៉ែត្រ ២០០-២០១ ភូមិអូរតាសេក ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ។ ហេតុការណ៍នេះ បានបណ្ដាលឲ្យមានមនុស្សប្រុសស្រីរបួសចំនួន៦នាក់ ស្លាប់ម្នាក់គឺអ្នកម្នាង អ៊ុក ផល្លា៕