ជាតិ
បក្សហ៊្វុនស៊ិនប៉ិច ស្នើឲ្យស៊ើបអង្កេតករណីគ្រោះថ្នាក់ចរាចរណ៍លើសម្ដេចក្រុមព្រះទាំង៣លើក លោក យូ ហុកគ្រី អនុប្រធានគណបក្សហ៊្វុនស៊ិនប៉ិច
× ភ្នំពេញ៖ អនុប្រធានគណបក្សហ៊្វុនស៊ិនប៉ិច លោក យូ ហុកគ្រី បានស្នើឲ្យមានការស៊ើបអង្កេតឲ្យបានស៊ីជម្រៅពីករណីគ្រោះថ្នាក់ចរាចរណ៍ លើសម្ដេចក្រុមព្រះ នៅក្នុងក្បូនចំនួន៣ដងមកហើយ។ ដោយករណីទី១ នៅឆ្នាំ២០១៥ ដែលបង្កឲ្យសម្ដេច និងអ្នកម្នាងរងរបួសធ្ងន់ ករណីទី២នៅឆ្នាំ២០១៧ មានគ្រោះថ្នាក់លើក្បួនរថយន្តសម្ដេចក្រុមព្រះ តែមិនប៉ះលើរថយន្តសម្ដេចក្រុមព្រះឡើយ ហើយនៅឆ្នាំ២០១៨នេះ ក៏បានប៉ះជាមួយរថយន្តសម្ដេចក្រុមព្រះជាលើកទី៣។
សូមស្ដាប់ប្រសាសន៍របស់លោក យូ ហុកគ្រី ជាមួយក្រុមអ្នកសារព័ត៌មាននៅទីកម្កល់សពអ្នកម្នាង អ៊ុក ផល្លា ក្នុងវត្តបទុមវត្តីដូចតទៅ៖
ករណីគ្រោះថ្នាក់ចរាចរណ៍លើសម្ដេចក្រុមព្រះ និងអ្នកម្នាង អ៊ុក ផល្លា បានកើតឡើងចំនួន៣លើកមកហើយ រាប់ពីឆ្នាំ២០១៥ ដល់ឆ្នាំ២០១៨នេះ។ គ្រោះថ្នាក់ទាំង៣ករណីនេះ មាន២ករណីដែលរថយន្តបង្ក ជិះចូលមកបុកចំពីមុខរថយន្តរបស់សម្ដេចក្រុមព្រះ ដែលមានក្បួនរថយន្តដង្ហែជាច្រើនគ្រឿងនៅពីមុខ ថែមទាំងមានរថយន្តសឺរ៉ែនបើកផ្លូវផងនោះ។
ចំណែកមួយករណីទៀតគឺកើតឡើងនៅខេត្តកំពត នៅថ្ងៃទី១៦ ខែឧសភា ឆ្នាំ២០១៧ ដោយរថយន្តដឹកដី ជិះកាត់ក្បួនរថយន្តសម្ដេចក្រុមព្រះ និងបានប៉ះជាមួយរថយន្ត លោក ឆឹង ចំរើន ដែលកាលនោះលោកជា អនុប្រធានគណបក្សហ៊្វុនស៊ិនប៉ិច តែមិនបានបង្កគ្រោះថ្នាក់ដល់សម្ដេច និងអ្នកម្នាងឡើយ។
ក្បួនរថយន្តរបស់សម្ដេចក្រុមព្រះ នរោត្តម រណឫទ្ធិ នេះ សុទ្ធតែកើតឡើងបន្ទាប់ពីព្រះអង្គត្រឡប់មកពីជួបសំណេះសំណាល សមាជិកសមាជិការនៃគណបក្សរបស់ទ្រង់ទាំង៣ករណី។ ករណីទី១ កើតឡើងនៅថ្ងៃទី២៥ ខែមេសា ឆ្នាំ២០១៥ ក្នុងខេត្តកំពង់ចាម បានបង្កឲ្យសម្ដេចក្រុមព្រះ រងរបួសស្រាល និងអ្នកម្នាង អ៊ុក ផល្លា របួសធ្ងន់។ ករណីទី៣ ដែលទើបកើតឡើងក្នុងខេត្តព្រះសីហនុ នៅថ្ងៃទី១៧ ខែមិថុនា ឆ្នាំ២០១៨នេះ បានកើតឡើងដោយសាររថយន្តតាក់ស៊ីបុកចំមុខរថយន្តរបស់សម្ដេច ទាំងមានក្បួនរួមដំណើរបើកផ្លូវនៅខាងមុខ។ តែលើកនេះសម្ដេចមិនមានសំណាងដូចមុនឡើយ ដោយព្រះអង្គបានបាត់បង់ភរិយា ដែលតែងតែរួមដំណើរជាមួយព្រះអង្គគ្រប់ទីកន្លែងមិនដែលខាន។
ដោយភាពចៃដន្យច្រើនលើកបែបនេះហើយ បានជាអនុប្រធានគណបក្សហ្វ៊ុនស៊ិនប៉ិចលោក យូ ហុកគ្រី ស្នើដល់មន្ត្រីមានសមត្ថកិច្ច បើកការស៊ើបអង្កេតឲ្យបានស៊ីជម្រៅបន្ថែមលើករណីគ្រោះថ្នាក់របស់សម្ដេចក្រុមព្រះនេះ។
Tag:
គ្រោះថ្នាក់ចរាចរណ៍
សម្ដេចក្រុមព្រះ
អ្នកម្នាងអ៊ុកផល្លា
គណបក្សហ្វ៊ុនស៊ិនប៉ិច
© រក្សាសិទ្ធិដោយ thmeythmey.com