ជាតិ
នយោបាយជាតិ
ព្រះរាជអាជ្ញា ហៅលោក សម រង្ស៊ី ទៅសួរ ពីបទប្រមាថព្រះមហាក្សត្រ
× ទីបំផុត លោក សម រង្ស៊ី ជាអ្នកនយោបាយខ្មែរទីមួយ ដែលក្លាយជាជនសង្ស័យ ក្នុងបទប្រមាថព្រះមហាក្សត្រ។ លោក សៀង សុខ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ដែលឧស្សាហ៍កាន់សំណុំរឿងអ្នកនយោបាយ បានចេញដីកាបង្គាប់លោក សម រង្ស៊ី ដែលកំពុងស្ថិតនៅក្រៅប្រទេស ឲ្យចូលមកបំភ្លឺ នៅថ្ងៃទី១២ ខែកក្កដា ឆ្នាំ២០១៨ ពាក់ព័ន្ធនឹងការប្រមាថព្រះមហាក្សត្រ។
ព្រះរាជអាជ្ញា បានប្រាប់លោក សម រង្ស៊ី យ៉ាងដូច្នេះថា៖«សាមីខ្លួន ត្រូវអញ្ជើញមកតាមដីកានេះ ឲ្យទាន់ពេលវេលា»។ ការចេញដីកានេះ គឺធ្វើឡើងបន្ទាប់ពីលោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ ស្នើទៅទៅស្ថាប័នអយ្យការ ដើម្បីឲ្យចាត់វិធានការលើលោក សម រង្ស៊ី ដែលកំពុងតែហ៊ុមព័ទ្ធទៅដោយបណ្តឹងប្រមាណជា១០ទៅហើយ។
លោក សម រង្ស៊ី រងនូវចំណាត់ការចុងក្រោយនេះ គឺដោយសារតែលោក បានបង្ហោះសារមួយលើទំព័រហ្វេសប៊ុកកាលពីកន្លងមក ដោយសរសេរថា ព្រះរាជសាររបស់ព្រះមហាក្សត្រ ដែលអំពាវនាវឲ្យប្រជាពលរដ្ឋទៅបោះឆ្នោត គឺជាព្រះរាជសារក្លែងក្លាយ។
លោក គឹម សន្តិភាព អ្នកនាំពាក្យក្រសួងយុត្តិធម៌ បានហៅសំណេររបស់លោក សម រង្ស៊ី ថាធ្វើឲ្យប៉ះពាល់យ៉ាងធ្ងន់ធ្ងរដល់ព្រះកិត្តិយសរបស់ព្រះមហាក្សត្រ។ លោក បញ្ជាក់ថា ទង្វើរបស់លោក សម រង្ស៊ី ត្រូវផ្តន្ទាទោសដាក់ពន្ធនាគារពី១ឆ្នាំទៅ៥ឆ្នាំ៕
Tag:
សម រង្ស៊ី
តុលាការ
ព្រះមហាក្សត្រ
© រក្សាសិទ្ធិដោយ thmeythmey.com