សម្តេច ហ៊ុន សែន ជឿថា ការអំពាវនាវកុំឲ្យពលរដ្ឋទៅបោះឆ្នោត នឹងមិនជោគជ័យឡើយ

ជាតិ

បោះឆ្នោត

សម្តេច ហ៊ុន សែន ជឿថា ការអំពាវនាវកុំឲ្យពលរដ្ឋទៅបោះឆ្នោត នឹងមិនជោគជ័យឡើយ

20, Jun 2018 , 12:59 pm

រូបភាព

ដោយ: ថ្មីៗ

សម្តេច ហ៊ុន សែន នាយករដ្ឋមន្ត្រី និងជាប្រធានគណបក្សប្រជាជនកម្ពុជា ឆ្លៀតរម្លឹកពីអតីតគណបក្សសង្គ្រោះជាតិ ខណៈការបោះឆ្នោត នៅសល់តែ៣៩ថ្ងៃទៀត នឹងមកដល់។ ប្រមុខរដ្ឋាភិបាល យល់ថា ការប្រឹងប្រែងរបស់លោក សម រង្ស៊ី និងអតីតក្រុមអ្នកប្រឆាំង ដែលបំផុសបំផុលឲ្យប្រជាពលរដ្ឋដេតផ្ទះ នៅថ្ងៃបោះឆ្នោត នឹងមិនអាចទៅរួចឡើយ។

សម្តេច ហ៊ុន សែន មានជំនឿថា ប្រជាពលរដ្ឋ នឹងប្រើប្រើសិទ្ធិទៅបោះឆ្នោត ឲ្យគណបក្សណាមួយ ដែលខ្លួនពេញចិត្ត ដោយមិនធ្វើតាមការអំពាវនាវរបស់អតីតគណបក្សប្រឆាំងនោះទេ។ ក្នុងពិធីជួបសំណេះសំណាលជាមួយកម្មករ-កម្មការិនី នៅព្រឹកថ្ងៃទី២០ ខែមិថុនា ឆ្នាំ២០១៨នេះ ប្រធានគណបក្សកាន់អំណាច បាននិយាយយ៉ាងដូច្នេះថា៖«បក្សមួយបានងាប់ទៅហើយ ចង់ឲ្យគេដេកឱបបក្សងាប់ហ្នឹង ឬក៏ត្រូវប្រើសិទ្ធិនយោបាយ របស់ខ្លួន ដើម្បីទៅជ្រើសរើសបក្សនយោបាយណាមួយ ដែលខ្លួនស្រឡាញ់? [.....] អ្នកដែលចង់ឲ្យគេឱបខ្មោច ប្រហែលជាគ្មានសំណាង បានគេទៅឱបជាមួយទេ។ ខ្លួនឯកព្រាត់ប្រាសទៅណា គឺព្រាត់ប្រាសទៅបាត់ហើយ»។

សម្តេច ហ៊ុន សែន បានប្រកាសម្តងទៀតថា ការបោះឆ្នោត នឹងប្រព្រឹត្តនៅថ្ងៃទី២៩ ខែកក្កដា ឆ្នាំ២០១៨ ដោយមិនត្រូវពន្យារពេលឡើយ។ នាយករដ្ឋមន្ត្រីរូបនេះ បានបន្តអំពាវនាវឲ្យប្រជាពលរដ្ឋ បោះឆ្នោតឲ្យគណបក្សរបស់ខ្លួន ដើម្បីបន្តដឹកនាំប្រទេស។

លោក សម រង្ស៊ី និងអតីតក្រុមអ្នកប្រឆាំង ដែលកំពុងនៅក្រៅប្រទេស នៅតែអំពាវនាវកុំឲ្យប្រជាពលចេញទៅបោះឆ្នោត។ លោក សម រង្ស៊ី ហៅការបោះឆ្នោត ដែលគ្មានគណបក្សប្រឆាំង ថាជាការបោះឆ្នោតលេងសើច និងមិនអាចយកការបាន។

អតីតប្រធានគណបក្សប្រឆាំងរូបនេះ ចាត់ទុករដ្ឋាភិបាលថ្មី ដែលកើតឡើងពីការបោះឆ្នោត នៅក្រោយថ្ងៃទី២៩ ខែកក្កដា ថាជារដ្ឋាភិបាលមិនស្របច្បាប់ ហើយសហគមន៍អន្តរជាតិ នឹងមិនទទួលស្គាល់នោះទេ៕