ជាតិ
សង្គមជាតិ
ជនជាតិចិន ១០នាក់ ត្រូវបានចាប់ខ្លួន ក្រោយប្រើអំពើហិង្សាលើជនជាតិចិនដូចគ្នា
× ជនជាតិចិន ១០នាក់ ត្រូវបានសមត្ថកិច្ចខេត្តព្រះសីហនុ ចាប់ខ្លួន ក្រោយពីប្រើអំពើហិង្សាទៅលើជនជាតិចិន ២នាក់ផ្សេងទៀត។ នេះបើតាមគេហទំព័រអគ្គស្នងការនគរបាលជាតិ។
ការផ្សាយរបស់នគរបាលជាតិ ឲ្យដឹងថា ជនសង្ស័យទាំង១០នាក់នេះ បានវាយទៅលើជនរងគ្រោះ ដែលជាជនជាតិដូចគ្នា២នាក់ផ្សេងទៀត នៅកាស៊ីណូ បណ្ដាលឲ្យសន្លប់បាត់ស្មារតី ហើយក៏លើកដាក់ក្នុងរថយន្តដើម្បីធ្វើសកម្មភាពប្រើអំពើហិង្សាបន្តទៀតនៅកន្លែងផ្សេង។ ប្រជាពលរដ្ឋដែលបានឃើញហេតុការណ៍នេះ បានរាយការណ៍ ទៅសមត្ថកិច្ចដើម្បីចុះធ្វើអន្តរាគមន៍។ នេះបើតាមការបន្តរបស់នគរបាលជាតិ។
នគរបាលជាតិ បានបន្ថែមថា ក្រោយពីទទួលបានការរាយការណ៍របស់ប្រជាពលរដ្ឋ សមត្ថកិច្ចជំនាញ បានតាមចាប់ជនសង្ស័យខាងលើនៅចំណុចមុខផ្សារចិន ស្ថិតក្នុងខេត្តព្រះសីហនុ និងរំដោះជនរងរងគ្រោះ។
នគរបាលជាតិ បានស្រង់សម្ដីលោកឧត្តមសេនីយ៍ទោ ស្នងការនគរបាលខេត្តព្រះសីហនុ លោក ជួន ណារិន្ទ ថា ជនរងគ្រោះជាបុគ្គលិកកាស៊ីណូផ្នែកអនឡាញ ហើយជនសង្ស័យក៏ជាបុគ្គលិកដូចគ្នា។ លោក ជួន ណារិន្ទ បានបន្តថា សមត្ថកិច្ច ការិយាល័យនគរបាលព្រហ្មទណ្ឌកម្រិតស្រាល កំពុងបន្តនីតិវិធីបញ្ជូនជនសង្ស័យទៅសាលាដំបូងខេត្តព្រះសីហនុ ដើម្បីចាត់ការបន្តនីតិវិធីច្បាប់៕
Tag:
ជនជាតិចិន
ហិង្សា
ជួន ណារិន្ទ
© រក្សាសិទ្ធិដោយ thmeythmey.com