លោក ត្រាំ អាចស្កាត់ជួបលោក ពូទីន ខែក្រោយពេលទៅប្រជុំបក្សសម្ព័ន្ធយោធាណាតូនៅព្រុចសែល

អន្តរជាតិ

លោក ត្រាំ អាចស្កាត់ជួបលោក ពូទីន ខែក្រោយពេលទៅប្រជុំបក្សសម្ព័ន្ធយោធាណាតូនៅព្រុចសែល

22, Jun 2018 , 9:39 pm

រូបភាព

ដោយ: ថ្មីៗ

ប្រធានាធិបតីអាមេរិកលោក ដូណាល់ ត្រាំ ទំនងជានឹងស្កាត់ជួបជាមួយប្រធានាធិបតីរុស្ស៊ីលោក វ្ល៉ាឌីមៀ ពូទីន ក្នុងដំណើរទស្សនកិច្ចទៅកាន់តំបន់អឺរ៉ុបខែក្រោយ។ ជំនួបរវាងមេដឹកនាំទាំងពីរនេះអាចនឹងធ្វើឲ្យមានការបញ្ហាចម្រូងចម្រាសកើតឡើងច្រើនផងដោយសារអ្នកនយោបាយអាមេរិកនៅតែចោទថា មេដឹកនាំក្រេមឡាំងជួយឲ្យលោក ត្រាំឈ្នះឆ្នោតឆ្នាំ ២០១៦។

លោក ដូណាល់ ត្រាំ នឹងចាប់ផ្តើមដំណើរទស្សនកិច្ចនៅអឺរ៉ុបខែកក្កដាខាងមុខនេះ ហើយលោកបានបង្ហើបថា លោកកំពុងតែពិនិត្យមើលលទ្ធភាពក្នុងការជួបពិភាក្សាជាមួយសមភាគីរុស្ស៊ីលោក វ្ល៉ាឌីមៀ ពូទីន ក្នុងពេលនោះផងដែរ។ ជំនួបលើកដំបូងរវាងអ្នកទាំងពីរគឺកើតឡើងនៅក្រៅកិច្ចប្រជុំប្រទេសម្ភៃ(G20) ដែលធ្វើឡើងនៅក្រុង Hamburg ប្រទេស អាល្លឺម៉ង់ នាខែកក្កដាកាលពីឆ្នាំមុន។

យោងតាមការចុះផ្សាយរបស់ទីភ្នាក់ងារព័ត៌មាន AFP ប្រមុខរដ្ឋអាមេរិករូបនេះនឹងទៅអឺរ៉ុបដើម្បីចូលរួមក្នុងកិច្ចប្រជុំកំពូលបក្សសម្ព័ន្ធយោធាណាតូដែលចាប់ផ្តើមនៅថ្ងៃ ១១ ដល់ថ្ងៃ ១២ កក្កដា នាទីក្រុងព្រុចសែល។ ដូច្នេះហើយលទ្ធភាពនៃការរៀបចំជំនួបទ្វេភាគីរវាងប្រមុខរដ្ឋទាំងពីរមានច្រើនដែរ។

កាលពីដើមសប្តាហ៍នេះ អ្នកនាំពាក្យសេតវិមានអាមេរិក ក៏បានបង្ហើបផងដែរថា នៅសប្តាហ៍ក្រោយនេះ ទីប្រឹក្សាសន្តិសុខរបស់លោក ត្រាំ គឺលោក ចន បុលតុន (John Bolton) នឹងធ្វើដំណើរទៅកាន់ក្រុងម៉ូស្គូដើម្បីជួបជាមួយមន្ត្រីរុស្ស៊ីពិភាក្សាគ្នាជុំវិញការរៀបចំជំនួបទ្វេភាគីដ៏កម្រនេះផងដែរ។

យ៉ាងណាក៏ដោយ ជំនួបទ្វេភាគីនេះមិនមែនជារឿងដែលគេពេញចិត្តឡើយ។ ក្រុមសហគមន៍ចារកម្មអាមេរិក និងអ្នកនយោបាយអាមេរិកជាច្រើននាក់នៅតែចោទប្រកាន់ថា មេដឹកនាំរុស្ស៊ីបានជ្រៀតជ្រែកចូលក្នុងការបោះឆ្នោតរបស់អាមេរិកឆ្នាំ ២០១៦ ហើយជួយឲ្យលោក ត្រាំ ជាប់ឆ្នោតផង។ ការចោទប្រកាន់នេះនៅបន្តលងបន្លាយលោក ត្រាំ ដល់ពេលបច្ចុប្បន្ន បើទោះជាលោកទាត់ចោលការចោទប្រកាន់នេះរៀងរហូតមកក៏ដោយចុះ។

ក្រៅពីរឿងបោះឆ្នោត រុស្ស៊ីក៏ត្រូវគេចោទប្រកាន់ផងដែរពាក់ព័ន្ធការប្រើប្រាស់អាវុធគីមីដើម្បីធ្វើឃាតអតីតចារជនរុស្ស៊ីលោក Sergei Skripal នៅចក្រភពអង់គ្លេស និងរងការរិះគន់ខ្លាំងជុំវិញការបន្តគាំទ្រមេដឹកនាំស៊ីរីលោក បាសា អាល់អាសាដ ផងដែរ។

ដោយឡែក អ្នកជំនាញរុស្ស៊ីជឿជាក់ថា ជំនួបជាថ្មីរវាងលោក ត្រាំ និងលោក ពូទីន នឹងអាចជួយត្រួសត្រាយផ្លូវសម្រាប់ការឈានទៅដកទណ្ឌកម្មប្រឆាំងរុស្ស៊ីកន្លងមកផងពាក់ព័ន្ធនឹងជម្លោះអ៊ុយក្រែន និងការលូកលាន់ក្នុងការបោះឆ្នោតដែរ។

បើទោះបីជាលោក ត្រាំ កន្លងមកសម្រេចដាក់ចេញទណ្ឌកម្មសេដ្ឋកិច្ចបន្ថែមប្រឆាំងក្រុងមូស្គូ និងមានការបណ្តេញអ្នកការទូតរុស្ស៊ីច្រើននាក់ពីអាមេរិកក្តី លោក នៅតែបន្តរក្សាជំហរទោរទន់ក្នុងការឈានទៅស្តារទំនាក់ទំនងជាមួយលោក ពូទីន ដែរ។ ដូចឃើញស្រាប់ កាលពីដើមខែកន្លងទៅពេលទៅចូលរួមកិច្ចប្រជុំប្រទេសប្រាំពីរ (G7) លោក ត្រាំ បានអំពាវនាវឲ្យសមាជិកឯទៀតពិចារណាបញ្ចូលរុស្ស៊ីទៅក្នុងក្រុមវិញ។ រុស្ស៊ីត្រូវគេព្យួរសមាជិកភាពនៅក្នុងឆ្នាំ ២០១៤ ក្រោយពេលដែលប្រទេសនេះក្រសោបយកទឹកដីគ្រីមៀ ពីអ៊ុយក្រែននោះ៕