កីឡាអន្តរជាតិ
អន្តរជាតិ
ស្ត្រីអ៊ីរ៉ង់មានសិទ្ធិទស្សនាការប្រកួត World Cup ជាមួយបុរស ក្រោយជាប់បម្រាម៤០ឆ្នាំ
× នេះជាលើកដំបូងហើយក្នុងរយៈពេលជិត៤០ឆ្នាំដែលស្ត្រីជនជាតិអ៊ីរ៉ង់អាចមានសិទ្ធិអង្គុយទស្សនាការប្រកួតកីឡាបាល់ទាត់ផ្នែកបុរសជាមួយអ្នកគាំទ្របុរសផ្សេងទៀត ដើម្បីអបអរក្រុមជម្រើសជាតិខ្លួនដែលមានវត្តមានក្នុងព្រឹត្តិការណ៍បាល់ទាត់ពិភពលោកនៅរុស្ស៊ី។
បន្ទាប់ពីការហាមឃាត់អស់រយៈពេលជាច្រើនទសវត្សត្រូវបានដកចេញ ក្រុមអ្នកគាំទ្រជាស្ត្រីអ៊ីរ៉ង់បានជួយរៀបចំកីឡដ្ឋានមួយនៅក្នុងក្រុងតេអេរ៉ង់ដើម្បីអបអរក្រុមជម្រើសជាតិអេរ៉ង់ក្នុងការប្រកួតប្រជែងពានរង្វាន់ World Cup 2018។
ព្រឹត្តិការណ៍ប្រវត្ដិសាស្ដ្រនៅឯកីឡដ្ឋាន Azadi ក្នុងក្រុងតេអេរ៉ង់នៅថ្ងៃទី២០ ខែមិថុនាកន្លងទៅ ស្ត្រីអេរ៉ង់អាចទទួលបានសិទ្ធិចូលរួមជាមួយព្រឹត្តិការណ៍កីឡាបុរសវិញបាន ក្រោយបដិវត្តអ៊ីស្លាមឆ្នាំ១៩៧៩។
ទោះបីជាមិនមានច្បាប់ជាផ្លូវការក្នុងការហាមឃាត់ស្ត្រីដើម្បីទៅគាំទ្រកីឡាក៏ដោយ ប៉ុន្តែស្ត្រីទាំងនោះត្រូវបានបណ្តេញចេញពីកីឡដ្ឋាន និងពេលខ្លះត្រូវបានចាប់ខ្លួនទៀតផង។ អ្នកខ្លះទៀតត្រូវក្លែងខ្លួនជាប្រុសដើម្បីគេចផុតពីការរារាំង។
ដើម្បីអបអរដល់ក្រុមអ៊ីរ៉ង់ដែលអាចមានវត្តមានក្នុងការប្រកួតបាល់ទាត់ពិភពលោកលើកនេះ ប្រព័ន្ធផ្សព្វផ្សាយក្នុងស្រុកបានប្រកាសនៅថ្ងៃទី១៩ ខែមិថុនា ថាស្ត្រីនឹងត្រូវបានអនុញ្ញាតឲ្យចូលក្នុងពហុកីឡាដ្ឋានដើម្បីមើលការផ្សាយផ្ទាល់របស់ជម្រើសជាតិអ៊ីរ៉ង់ប្រកួតទល់នឹងអេស្ប៉ាញ នៃវគ្គសន្សំពិន្ទុតាមពូល។
ជាមួយគ្នានោះដែរ ប្រធានក្រុមជម្រើសជាតិអេស្ប៉ាញ Sergio Ramos ក៏បានអបអរជ័យជម្នះរបស់ខ្លួនក្រោយយកឈ្នះអ៊ីរ៉ង់ ១-០ ទៅកាន់ស្ត្រីអ៊ីរ៉ង់ទាំងអស់ផងដែរ។
អ៊ីរ៉ង់បានយកឈ្នះម៉ារ៉ុក ១-០ ក្នុងការប្រកួតបើកឆាកពូល B តែចាញ់អេស្ប៉ាញក្នុងការប្រកួតលើកទី២វិញ។ ការប្រកួតចុងក្រោយក្រុមមកពីតំបន់អាស៊ីនេះនឹងត្រូវប្រជែងជាមួយព័រទុយហ្គាល់ដើម្បីកាត់សេចក្តីយកពីរក្រុមឈានទៅវគ្គ១៦ក្រុមចុងក្រោយ ខណៈម៉ារ៉ុកជាក្រុមហាលអាវមុនគេ៕
Tag:
បាល់ទាត់
FIFA World Cup
ស្ត្រីអ៊ីរ៉ង់
GroupB
© រក្សាសិទ្ធិដោយ thmeythmey.com