អន្តរជាតិ
តុលាការព្រហ្មទណ្ឌអន្តរជាតិ អនុវត្តនីតិវិធីលើសំណុំរឿងរ៉ូហ៊ីងយ៉ា ក្រោយមានបណ្តឹងពីរដ្ឋអាជ្ញា
× តុលាការព្រហ្មទណ្ឌអន្តរជាតិ (ICC) នៅថ្ងៃ២១ មិថុនា បានចេញសម្រេចមួយ ដោយបានកោះហៅរដ្ឋាភិបាលមីយ៉ាន់ម៉ាឲ្យឆ្លើយបំភ្លឺ ពាក់ព័ន្ធសំណើសុំចាត់ការរបស់រដ្ឋអាជ្ញានៃតុលាការព្រហ្មទណ្ឌអន្តរជាតិលើវិបត្តិជនភៀសខ្លួនរ៉ូហ៊ីងយ៉ារបស់មីយ៉ាន់ម៉ា។ រដ្ឋអាជ្ញាតុលាការមើលឃើញថា វាមានសញ្ញាណនៃការប្រព្រឹត្តបទឧក្រិដ្ឋកម្មប្រឆាំងមនុស្សជាតិ។
តាមរយៈសេចក្តីសម្រេចដែលមានកម្រាស់ប្រាំទំព័រ ចៅក្រមនៃតុលាការព្រហ្មទណ្ឌអន្តរជាតិ បានអញ្ជើញរដ្ឋាភិបាលមីយ៉ាន់ម៉ាមកបំភ្លឺ និងដាក់ភស្តុតាងជាលិខិតផ្លូវការទៅកាន់តុលាការជាសាធារណៈ ឬជាលាក់ការណ៍ពាក់ព័ន្ធបញ្ហាយុត្តាធិការ និងសំណើផ្សេងៗដែលដែលរដ្ឋអាជ្ញាតុលាការព្រហ្មទណ្ឌអន្តរជាតិបានធ្វើដើម្បីប្រឆាំងនឹងរបបដឹកនាំមីយ៉ាន់ម៉ាបច្ចុប្បន្ន។
តុលាការ តាមរយៈសេចក្តីសម្រេចដដែលនោះ ក៏បានកំណត់ថ្ងៃចុងក្រោយសម្រាប់រដ្ឋាភិបាលបំភ្លឺ និងតវ៉ាជុំវិញបណ្តឹងប្រឆាំងខ្លួនពីរដ្ឋអាជ្ញាតុលាការអន្តរជាតិត្រឹមថ្ងៃទី២៧ ខែកក្កដា។ តុលាការ ក៏ថែមទាំងបានបើកផ្លូវឲ្យរដ្ឋអាជ្ញាតុលាការអន្តរជាតិ អាចធ្វើលិខិតឆ្លើយតបវិញទៅកាន់រដ្ឋាភិបាលមីយ៉ាន់ម៉ាផងដែរ បន្ទាប់ពីរដ្ឋាភិបាលមីយ៉ាន់ម៉ា បានដាក់លិខិតបំភ្លឺ និងតវ៉ារបស់ខ្លួនរួច។
សូមរម្លឹកផងដែរថា នៅថ្ងៃទី ៤ ខែមេសាកន្លងទៅ លោកស្រីរដ្ឋអាជ្ញានៃតុលាការព្រហ្មទណ្ឌអន្តរជាតិ Fatou Bensouda បានដាក់បណ្តឹងមួយដោយស្នើឲ្យតុលាការសម្រេចថាតើតុលាការអាចអនុវត្តយុត្តាធិការរបស់ខ្លួនលើការបណ្តេញជនភៀសខ្លួនរ៉ូហ៊ីងយ៉ាពីប្រទេសបានឬយ៉ាងណា។ លោកស្រី បានទទួលស្គាល់ថា សំណើនេះគឺជារឿងដ៏លំបាកនៃផ្នែកច្បាប់មួយ ដ្បិត មីយ៉ាន់ម៉ាមិនមែនជាភាគី នៃលក្ខន្តិកៈក្រុងរ៉ូមរបស់តុលាការព្រហ្មទណ្ឌអន្តរជាតិ ។
តែយ៉ាងណាក៏ដោយ រដ្ឋអាជ្ញានៃតុលាការព្រហ្មទណ្ឌអន្តរជាតិ បានមើលឃើញពីលទ្ធភាពដើម្បីស្វែងរកយុត្តិធម៌សម្រាប់ជនរងគ្រោះ និងនាំជនល្មើសមកទទួលខុសត្រូវចំពោះមុខច្បាប់។ លោកស្រីរដ្ឋអាជ្ញាចាត់ទុកថា វិបត្តិជនភៀសខ្លួន អាចចាត់ទុកថាជាចេតនាបណ្តេញជនជាតិភាគតិចរ៉ូហ៊ីងយ៉ាពីប្រទេសនេះ បានកើតឡើងឆ្លងព្រំដែនពីមីយ៉ាន់ម៉ាទៅកាន់បង់ក្លាដែស ដែលជាប្រទេសហត្ថលេខីនៃលក្ខន្តិកៈក្រុងរ៉ូម។
បើតាមបណ្តឹងរបស់លោកស្រីរដ្ឋអាជ្ញាដែលបានស្នើសុំចាត់ការពីតុលាការបានបញ្ជាក់យ៉ាងដូច្នេះថា៖« គិតចាប់ពីវិបត្តិជនភៀសខ្លួនមីយ៉ាន់ម៉ាផ្ទុះឡើងពីខែសីហា ឆ្នាំ២០១៧មក មានជនជាតិភាគតិចរ៉ូហ៊ីងយ៉ាជាង៦៧០,០០០នាក់ដែលបានស្នាក់នៅក្នុងទឹកដីមីយ៉ាន់ម៉ាយ៉ាងស្របច្បាប់ត្រូវបានបណ្តេញចេញ ទៅកាន់ប្រទេសបង់ក្លាដែស ដែលទង្វើនេះ អាចចាត់ទុកជាបទឧក្រិដ្ឋប្រឆាំងមនុស្សជាតិ»៕
© រក្សាសិទ្ធិដោយ thmeythmey.com