ជាតិ
គម្រោង LASED II ផ្ដល់ដីដល់ពលរដ្ឋក្រីក្រ ៥.១៤១ គ្រួសារ ដើម្បីកសាងជីវិតថ្មី
× ភ្នំពេញ៖ គម្រោង LASED II គឺជាគម្រោង «បែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចជំហានទី២» ដែលទទួលបានការគាំទ្រពីរាជរដ្ឋាភិបាលកម្ពុជា តាមរយៈ កម្មវិធីសម្បទាន ដីសង្គមកិច្ច ក្នុងការបែងចែកដីដល់គ្រួសារប្រជាពលរដ្ឋក្រីក្រ គ្មានដី ឬពលរដ្ឋដែលមានដីតិចតួចដើម្បីលើកកម្ពស់កម្រិតជីវភាពរស់នៅរបស់ប្រជាពលរដ្ឋ។ គម្រោងLASED II ត្រូវបានអនុវត្ត ដោយមានការចូលរួមពីក្រសួងរៀបចំដែនដី នគររូបនីយកម្ម និងសំណង់ លេខាធិការដ្ឋានគណៈកម្មកាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ និង ក្រសួងកសិកម្ម រុក្ខាប្រមាញ់ និងនេសាទ។
ប្រជាពលរដ្ឋដែលទទួលបានដីសម្បទានសង្គមកិច្ច ពីគម្រោង LASED ត្រូវបានទទួលការគាំទ្របន្ត ដោយគម្រោង LASED II ដើម្បីជួយដល់ជីវភាពរស់នៅ ការបង្កើតនូវមុខរបរ និងការគ្រប់គ្រងជីវិតរស់នៅរបស់ខ្លួន ឲ្យមានភាពម្ចាស់ការ។ ពលរដ្ឋដែលបានទទួលដីសម្បទានសង្គមកិច្ចពីគម្រោង LASED II សុទ្ធសឹងតែជាអ្នកដែលមានជីវភាពក្រីក្រ គ្មានដីរស់នៅ និងមិនមានដីបង្កបង្កើនផល។ មុនទទួលបានដីពលរដ្ឋទាំងនោះត្រូវឆ្លងកាត់ដំណាក់កាលជាច្រើនមុននឹងទទួលបានដីសម្រាប់សង់លំនៅឋាន និងដីបង្កបង្កើនផលនៅក្នុងគម្រោងនេះ។
លោកបណ្ឌិត ដោក ដូម៉ា នាយកគម្រោង LASED II នៃក្រសួងដែនដី នគរូបនីយកម្ម និងសំណង់ បានឲ្យដឹងថា គម្រោង LASED ដំណាក់កាលដំបូងបានអនុវត្តចាប់ពីឆ្នាំ២០០៨ និងបានបញ្ចប់ទៅវិញនៅឆ្នាំ២០១៤។ នៅដំណាក់កាលទី១នេះ គឺជាការជ្រើសរើសប្រជាពលរដ្ឋ និងចាប់ឆ្នោតដើម្បីទទួលបានដីលំនៅឋាន និងដីកសិកម្ម។ ចំពោះដំណាក់កាលទី២នេះត្រូវបានអនុវត្តចាប់ពីឆ្នាំ២០១៦ រហូតដល់ឆ្នាំ២០២១ ដែលជាដំណាក់កាលនៃការជួយប្រជាពលរដ្ឋដើម្បីកសាងជីវិតថ្មី ជាមួយនឹងការធ្វើកសិកម្មចិញ្ចឹមសត្វ និងដាំបន្លែ។
បច្ចុប្បន្នគម្រោង «បែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចជំហានទី២» (LASED II) នេះត្រូវបានអនុវត្តនៅលើទីតាំងចំនួន១៤កន្លែង ក្នុងខេត្តគោលដៅចំនួន៥ គឺក្រចេះ ត្បូងឃ្មុំ កំពង់ធំ កំពង់ឆ្នាំង និងកំពង់ស្ពឺ ហើយមានពលរដ្ឋ ដែលទទួលបានផលពីគម្រោងនេះសរុបមានចំនួន ៥.១៤១គ្រួសារ៕
Tag:
សម្បទានសង្គមកិច្ច
ក្រសួងដែនដី
រដ្ឋាភិបាល
ខេត្តកំពង់ឆ្នាំង
© រក្សាសិទ្ធិដោយ thmeythmey.com