កីឡាអន្តរជាតិ
អន្តរជាតិ
ជនអាណាមិកទូរសព្ទប្រាប់ប៉ូលិសរុស្ស៊ីថា មានការបង្កប់គ្រាប់បែកអំឡុង World Cup 2018
× ប៉ូលិសរុស្ស៊ីប្រចាំទីក្រុង Rostov-on-Don បានឲ្យដឹងនៅថ្ងៃទី២៧ ខែមិថុនានេះ ថាពួកគេបានទទួលការគំរាមកំហែងពីការបំផ្ទុះគ្រាប់បែកជាច្រើនលើកច្រើនសាក្នុងអំឡុងការប្រកួតពានរង្វាន់កីឡាបាល់ទាត់ពិភពលោក World Cup 2018។ ម្ចាស់ក្លិបកំសាន្ត និងភោជនីយដ្ឋានមួយចំនួនក៏ទទួលការគំរាមដូចគ្នានេះដែរ ហើយថែមទាំងប្រាប់ពួកគេឲ្យជម្លៀសខ្លួនចេញពីក្រុងទៀតផង។
បើតាមការផ្សាយរបស់ទីភ្នាក់ងារព័ត៌មាន Reuters ប៉ូលិសប្រចាំតំបន់បាននិយាយថា ពួកគេបានទទួលការហៅទូរសព្ទជាច្រើនដងពីជនអានាមិកអំពីការបំផ្ទុះគ្រាប់ដែលបានដាក់បង្កប់នៅទីតាំងមួយចំនួនក្នុងក្រុង Rostov-on-Don ប្រទេសរុស្ស៊ី។
ក្រោយទទួលទូរសព្ទរួច កងកម្លាំងប៉ូលិសបានទៅត្រួតពិនិត្យនៅគ្រប់ទីតាំងនោះ ប៉ុន្តែរកមិនឃើញវត្ថុដែលនាំឲ្យគ្រោះថ្នាក់ណាមួយឡើយ។ បច្ចុប្បន្ន ទីតាំងទាំងអស់នោះដំណើរការតាមធម្មតា។
ដោយឡែក អ្នកគ្រប់គ្រងភោជនីយដ្ឋានអ៊ីតាលី Luciano ម្នាក់ដែលស្ថិតក្នុងក្រុងខាងលើក៏បាននិយាយថា បុគ្គលិកខ្លួនក៏ត្រូវបានជនអនាមិកប្រាប់តាមរយៈទូរសព្ទឲ្យរូបគេចាកចេញពីទីនោះឲ្យបានមុនរយៈពេល ២ម៉ោងទៀតបន្ទាប់ពីទទួលការគំរាមដោយបំផ្ទុះគ្រាប់បែកនៅក្នុងអគារ។
យ៉ាងណាក៏ដោយ អ្នកនាំពាក្យអង្គភាពគ្រប់គ្រងកីឡាបាល់ទាត់ពិភពលោក FIFA មិនអាចទាក់ទងព័ត៌មានជុំវិញករណីនេះបានភ្លាមៗនៅឡើយទេ។
រុស្ស៊ីបានទទួលសិទ្ធិធ្វើម្ចាស់ផ្ទះព្រឹត្តិការណ៍កីឡាបាល់ទាត់ពិភពលោកលើកទី២២នេះ ដោយមានការចូលរួមពីប្រទេសចំនួន ៣១ផ្សេងទៀត។ ដំណើរការប្រកួតបានធ្វើឡើងអស់រយៈពេល១៤ថ្ងៃមកហើយ ហើយក៏រកឃើញក្រុមដែលឈានទៅវគ្គបន្ត និងហាលអាវខ្លះៗហើយដែរ៕
Tag:
បាល់ទាត់
FIFA World Cup
បំផ្ទុះគ្រាប់បែក
© រក្សាសិទ្ធិដោយ thmeythmey.com