ក្រុមអ្នករុករកអង់គ្លេសជឿថា កុមារថៃជាង១០នាក់ដែលបាត់ខ្លួននៅមានជីវិត

អន្តរជាតិ

ក្រុមអ្នករុករកអង់គ្លេសជឿថា កុមារថៃជាង១០នាក់ដែលបាត់ខ្លួននៅមានជីវិត

29, Jun 2018 , 2:23 pm

រូបភាព

ដោយ: ទេព ពិទូរ្យ

យន្តហោះគ្មានមនុស្សបើក Drone និងក្រុមអ្នករុករកអង់គ្លេសបានប្រទះឃើញច្រកចូលរូងភ្នំទី២ ដែលពួកគេគិតថាជាកន្លែងមានសុវត្ថិភាព សម្រាប់ក្មេងប្រុសទាំង១២នាក់ រួមទាំងគ្រូបង្វឹកកីឡាបាល់ទាត់របស់ពួកគេដែលបានបាត់ខ្លួនក្នុងរូងភ្នំមួយនាខេត្តឈៀងរ៉ៃ ប្រទេសថៃ កាលពីថ្ងៃទី ២៣ ខែមិថុនា ពោលគឺមានរយៈពេល ៧ ថ្ងៃមកហើយ។

កាសែតបាងកកប៉ុស្តិ៍ផ្សាយដូច្នេះថា ក្រុមជួយសង្គ្រោះបានដាក់ក្តីសង្ឃឹមរបស់ពួកគេនៅលើផ្លូវច្រកចូលថ្មីមួយទៀតដែលទើបរកឃើញនៅភាគខាងជើងនៃច្រកចូលទីមួយជុំវិញរូងភ្នំ Tham Luang ស្ថិតក្នុងស្រុកមៃសៃ ខេត្ត ឈៀងរ៉ៃ ជាទីដែលក្រុមក្មេងៗជាកីឡាករបាល់ទាត់អាយុក្រោម១៦ឆ្នាំបាត់ខ្លួន។ ក្រុមអ្នករុករកនេះនៅតែសង្ឃឹមថាសមាជិកក្រុមដែលបាត់ខ្លួននៅតែរស់រានមានជីវិតនៅឡើយ និងស្វែងរកឲ្យទាល់តែឃើញ។

បន្ទាប់ពីរកឃើញច្រកថ្មីនេះភ្លាម អគ្គស្នងការរងនគរបាលជាតិថៃលោក Wirachai Songmetta ក៏បានដឹកនាំក្រុមប៉ូលីស និងអ្នកជួយសង្គ្រោះចំនួន១៣២នាក់ទៅពិនិត្យ និងស្ទាបស្ទង់ស្ថានភាពផ្លូវដែលជាច្រកសំខាន់នេះដើម្បីស្វែងរកលទ្ធភាពចូលទៅកាន់រូងភ្នំ។

ក្រុមអ្នកជំនាញមុជទឹកអង់គ្លេសបីនាក់ រួមទាំងកងទ័ពអាមេរិកនៃទីបញ្ជាការយោធាប្រចាំតំបន់ប៉ាស៊ីហ្វិក (USPACOM) ចំនួន៣០នាក់ផ្សេងទៀត ក៏កំពុងប្រតិបត្តិការជួយសង្គ្រោះ និងស្វែងរកក្មេងៗទាំងនោះដោយធ្វើដំណើរឆ្ពោះទៅភាគខាងលិចនៃរូងភ្នំតាមច្រកដែលទើបរកឃើញថ្មីមួយទៀតនោះ។

សូមបញ្ជាក់ថា មនុស្ស១៣នាក់ដែលមានអាយុចន្លោះពី១១ ទៅ១៦ឆ្នាំ ក្នុងនោះមានគ្រូបង្វឹកបាល់ទាត់ម្នាក់ បានបាត់ខ្លួនក្នុងរូងភ្នំមួយឈ្មោះ Tham Luang Nang Non បន្ទាប់ពីពួកគេចូលជ្រកភ្លៀងនៅទីនោះ។ បើតាមការសន្និដ្ឋានរបស់អាជ្ញាធរ ដោយសារភ្លៀងធ្លាក់ខ្លាំងធ្វើឲ្យទឹកក្នុងរូងភ្នំឡើងខ្ពស់ ទើបធ្វើឲ្យពួកគេត្រូវរកផ្លូវផ្សេងជាទីសុវត្ថិភាព និងដើម្បីចាកចេញពីរូងភ្នំ៕