បាក់ឌុបឆ្នាំនេះ មានបេក្ខជនជិត១២ម៉ឺននាក់ និងមាន១៩៥មណ្ឌល

ជាតិ

បាក់ឌុប

សង្គមជាតិ

បាក់ឌុបឆ្នាំនេះ មានបេក្ខជនជិត១២ម៉ឺននាក់ និងមាន១៩៥មណ្ឌល

01, Jul 2018 , 9:39 pm

រូបភាព

ដោយ:

ភ្នំពេញ៖ ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ដែលប្រព្រឹត្តទៅនៅថ្ងៃទី២០ និង២១ ខែសីហា មានបេក្ខជនសរុប១១៧,០៦១នាក់ និងមណ្ឌលប្រឡងចំនួន១៩៥ ដែលចែកចេញជា ៤,៧១៦បន្ទប់ ទូទាំងរាជធានី-ខេត្ត ដោយមានថ្នាក់វិទ្យាសាស្ត្រ និងថ្នាក់វិទ្យាសស្ត្រសង្គម។

យោងតាមក្រសួងក្រសួងអប់រំ យុវជន និងកីឡា បញ្ជីឈ្មោះបេក្ខជនតាមលំដាប់អក្ខរក្រមនាមត្រកូល តាមមណ្ឌលប្រឡងនឹងត្រូវប្រកាសផ្សព្វផ្សាយលើបណ្ដាញសង្គមទំព័រហ្វេសប៊ុកផ្លូវការរបស់ក្រសួងគឺ facebook.com/moeys.gov.kh នៅថ្ងៃទី១៥ ខែសីហា ឆ្នាំ២០១៨។ ចំណែកឯ បញ្ជីឈ្មោះបេក្ខជន លេខតុ លេខបន្ទប់ និងបទប្បញ្ញត្តិផ្សេងៗទាក់ទងទៅនឹងការប្រឡង នឹងបិទផ្សព្វផ្សាយ តាមមណ្ឌលប្រឡង ចាប់ពីម៉ោង ៩ព្រឹក ថ្ងៃទី១៩ ខែសីហា ឆ្នាំ២០១៨។

សម្រាប់មុខវិជ្ជាជម្រើសថ្នាក់វិទ្យាសាស្ត្រ និងថ្នាក់វិទ្យាសាស្ត្រសង្គម ក្រសួងនឹងផ្សព្វផ្សាយ នៅរសៀល ថ្ងៃទី៥ ខែកក្កដា ឆ្នាំ២០១៨។ ចំពោះប្រធានវិញ្ញាសា ដែលត្រូវប្រឡងមាន ៧មុខវិជ្ជា និងមានពីរទម្រង់គឺ ការចែកជូនបេក្ខជន និងកត់ដាក់លើក្ដារខៀន។

ការប្រឡងបាក់ឌុបប៉ុន្មានឆ្នាំកន្លងទៅ ក្រសួងបានដាក់ ១០មុខវិជ្ជា និងរយៈពេល ២ថ្ងៃកន្លះ។ ប៉ុន្តែឆ្នាំ២០១៨នេះ ក្រសួងបានកាត់ ៣មុខវិជ្ជាចេញ ហើយដាក់តែ ៧មុខវិជ្ជា និងរយៈពេលប្រឡង ២ថ្ងៃ ក្នុងគោលបំណងបន្ថយបន្ទុក និងការខ្វល់ខ្វាយរបស់បេក្ខជន។ ក្រសួងអប់រំបានអះអាងដូច្នេះថា ចំណុចនេះមិនបានធ្វើឲ្យប៉ះពាល់ដល់គុណភាពនៃការសិក្សាទេ ដោយសិស្សទាំងអស់បានពង្រឹងសមត្ថភាពតាមរយៈ ការប្រឡងឆមាសនូវគ្រប់មុខវិជ្ជារួចហើយ។

បេក្ខជនប្រឡងទាំងអស់ត្រូវគោរពបទប្បញ្ញត្តិ នៃការប្រឡងឲ្យបានប្រសើរ ក្នុងករណីរកឃើញថាបានប្រព្រឹត្តផ្ទុយនឹងប្បញ្ញត្តិ បេក្ខជននឹងត្រូវកំណត់ឲ្យធ្លាក់ដោយស្វ័យប្រវត្តិ។ នេះបើតាមការអំពាវនៃក្រសួងអប់រំ។

ការប្រកាសលទ្ធផលនៅតាមមណ្ឌលប្រឡងនីមួយៗ គឺនៅរសៀលថ្ងៃទី១១ ខែកញ្ញា ឆ្នាំ២០១៨ សម្រាប់មណ្ឌលប្រឡងនៅរាជធានីភ្នំពេញ និងខេត្តកណ្ដាល ហើយចំណែកឯ មណ្ឌលប្រឡងនៅតាមខេត្តផ្សេងៗ នៅថ្ងៃទី១២ ខែកញ្ញា៕