កីឡាអន្តរជាតិ
អន្តរជាតិ
ទោះមិនទៅមើលផ្ទាល់ តែលោក ពូទីន បានទូរសព្ទទៅគ្រូបង្វឹក ហើយថា លោកមិនដាក់សម្ពាធអ្វីឡើយ
× ម្ចាស់ផ្ទះរុស្ស៊ី បានយកឈ្នះជើងឯកឆ្នាំ២០១០ អេស្ប៉ាញ ដោយការទាត់បាល់កាត់សេចក្តីប៉េណាល់ទីក្នុងលទ្ធផល ៤-៣ នាកីឡដ្ឋាន Luzhniki Stadium ក្នុងក្រុងមូស្គូ ដើម្បីឈានទៅវគ្គ១/៤ផ្តាច់ព្រ័ត្រនៃព្រឹត្តិការណ៍ FIFA World Cup។ មុនជំនួបប្រកួតវគ្គ១៦ក្រុមចុងក្រោយ តើក្រុមរុស្ស៊ីបានទទួលដំបូន្មានអ្វីខ្លះពីប្រធានាធិបតីលោកវ្ល៉ាឌីមៀរ ពូទីន ដើម្បីយកជ័យជម្នះលើអេស្ប៉ាញ?។
ប្រធានាធិបតីរុស្ស៊ី លោកវ្ល៉ាឌីមៀរ ពូទីន បានហៅទូរសព្ទទៅកាន់គ្រូបង្វឹកក្រុមជម្រើសជាតិរុស្ស៊ីលោក Stanislav Cherchesov មុនពេលក្រុមម្ចាស់ផ្ទះបានផ្តួលអេស្ប៉ាញ ដោយបាល់កាត់ក្តីប៉េណាល់ទីក្រោយការប្រកួតរយៈពេល១២០នាទីបញ្ចប់ទៅក្នុងលទ្ធផល ១-១។
អ្នកនាំពាក្យវិមានគ្រីមឡាំងលោក Dmitry Peskov បាននិយាយថា មុនពេលការប្រកួតមកដល់នៅប្រហែលថ្ងៃត្រង់លោកពូទីន បានខលទៅគ្រូបង្វឹករុស្ស៊ី ដោយមិនបាននិយាយអ្វីច្រើននោះទេ គឺគ្រាន់តែជូនពរគាត់ឲ្យទទួលបានលទ្ធផលល្អប៉ុណ្ណោះ។
ម្យ៉ាងទៀត មេដឹកនាំរុស្ស៊ីរូបនេះក៏មិនបានចូលរួមទស្សនាផ្ទាល់ការប្រកួតនៅទីក្រុងម៉ូស្គូវាងរុស្ស៊ីទល់នឹងអេស្ប៉ាញនេះដែរ។
លោក Peskov បានបន្ថែមថា៖«លោកពូទីនបានសរសើរ គ្រូបង្វឹកលោក Cherchesov រូចទៅហើយក្រោយជួយរុស្ស៊ីឆ្លងផុតវគ្គចែកពូល។ ក្នុងជំនួបទល់នឹងអេស្ប៉ាញ ពូទីនគិតរួចទៅហើយថាបើទោះជារុស្ស៊ីទទួលលទ្ធផលបែបណា ក៏លោកមិនបន្ទោសនឹងដាក់សម្ពាធអ្វីមួយលើកីឡាករ និងគ្រូបង្វឹកឡើយ ដោយលោកគ្រាន់តែផ្តល់ពាក្យជូនពរ និងលើកទឹកចិត្តប៉ុណ្ណោះ»។
តែទោះយ៉ាងណា រុស្ស៊ីអាចឈានទៅកាន់វគ្គ៨ក្រុមចុងក្រោយបានបើទោះពួកគេស្ថិតក្នុងចំណាត់ថ្នាក់ទី៧០ពិភពលោកក្នុងតារាង FIFA Ranking ក៏ដោយ។ រុស្ស៊ីនឹងត្រូបជួបក្រូអាស៊ីដែលយកឈ្នះដាណឺម៉ាកដោយបាល់កាត់សេចក្តី១១ម៉ែត្រដូចគ្នាក្នុងវគ្គ១/៤ផ្តាច់ព្រ័ត្រនៅថ្ងៃទី៧ ខែកក្កដា ដើម្បីឈានទៅកាន់វគ្គពាក់កណ្តាលផ្តាច់ព្រ័ត្រ៕
Tag:
បាល់ទាត់
FIFA World Cup
ពូទីន
© រក្សាសិទ្ធិដោយ thmeythmey.com