ក្រុមរុករកក្មេងនៅថៃ ចូលដល់ជាង៩គីឡូម៉ែត្រក្នុងរូងភ្នំហើយ ប៉ុន្តែមិនទាន់ឃើញតម្រុយ

អន្តរជាតិ

ក្រុមរុករកក្មេងនៅថៃ ចូលដល់ជាង៩គីឡូម៉ែត្រក្នុងរូងភ្នំហើយ ប៉ុន្តែមិនទាន់ឃើញតម្រុយ

02, Jul 2018 , 6:13 pm

រូបភាព

ដោយ: ទេព ពិទូរ្យ

ក្រុមអ្នកជួយសង្គ្រោះដែលជាទាហាជើងទឹកថៃនៅថ្ងៃទី២ ខែកក្កដានេះ បានបោសសម្អាតផ្លូវដើម្បីជ្រមុជទឹកចូលទៅក្នុងរូងភ្នំ Tham Luang ដើម្បីស្វែងរកក្មេងប្រុស១២នាក់រួមទាំងគ្រូបង្វឹកបាល់ទាត់របស់ពួកគេម្នាក់ ដែលបានបាត់ខ្លួនអស់រយៈពេល១០ថ្ងៃមកហើយ ពោលគឺតាំងពីថ្ងៃទី២៣ ខែមិថុនាមក។

អ្នកមុជទឹកមកពីអង្គភាពកងទ័ពជើងទឹកថៃបានធ្វើដំណើរចូលទៅក្នុងរូងភ្នំបានរយៈចម្ងាយជាង៩គីឡូម៉ែត្រពីមាត់រូងហើយ ដែលនេះមានន័យថាពួកគេស្ថិតនៅចម្ងាយតែ ៥០០ ម៉ែត្រទៀតប៉ុណ្ណោះនឹងទៅដល់ទីតាំងដែលរំពឹងថាជាកន្លែងដែលក្រុមក្មេងៗទាំងនោះបាត់ខ្លួន និងអាចជាក្តីសង្ឃឹមចុងក្រោយក្នុងការរុករកនេះ។

បើតាមការផ្សាយរបស់ទីភ្នាក់ងារព័ត៌មាន Reuters ប្រតិបត្តិការណ៍នេះបានកើនឡើងអ្នករុករកជាតិ និងអន្តរជាតិរហូតដល់ជាង១០០០នាក់ ដែលក្នុងនោះរួមមានអ្នកជំនាញសង្គ្រោះពីសហរដ្ឋអាមេរិក ចក្រភពអង់គ្លេស ជប៉ុន ចិន រួមទាំងប្រទេសផ្សេងៗទៀត។

ក្រុមអ្នករុករកទាំងនោះ បានចូលទៅជិតដល់តំបន់គ្មានទឹកដែលគេឲ្យឈ្មោះថា «Pattaya Beach» ដែលពួកគេជឿជាក់ថាជាទីដែលមនុស្ស១៣នាក់បានបាត់ខ្លួននៅទីនោះមិនអាចទៅណារួច។

ក្មេងប្រុសដែលមានអាយុចន្លោះពី ១១ទៅ១៦ឆ្នាំនិងគ្រូបង្វឹកវ័យ ២៥ ឆ្នាំរបស់ពួកគេបានបាត់ខ្លួនកាលពីថ្ងៃទី ២៣ ខែមិថុនា អំឡុងពេលចូលទៅក្នុងរូងភ្នំ Tham Luang Nang Non ដែលមានប្រវែង ១០ គីឡូម៉ែត្រ ស្ថិតក្នុងស្រុកម៉ៃសៃ ខេត្តឈាងរ៉ៃ ភាគខាងជើងប្រទេសថៃ៕

អត្ថបទទាក់ទង

៩ថ្ងៃហើយនៅតែគ្មានដំណឹងក្មេងៗថៃដែលបាត់ខ្លួន ខណៈអាជ្ញាធរបង្កើនការរុករក