ជាតិ
អាជ្ញាធរ នឹងប្រើវិធានការច្បាប់ចំពោះអ្នកក្លែងបន្លំ និងអ្នកចែករំលែកព័ត៌មានមិនពិត ចាប់ពីថ្ងៃទី៥ កក្កដា
× ភ្នំពេញ៖ ក្រសួងចំនួន៣ បានព្រមានពីវិធានការច្បាប់ ចំពោះអ្នកក្លែងបន្លំព័ត៌មាន និងអ្នកប្រើប្រាស់បណ្ដាញសង្គម ដែលចែករំលែកព័ត៌មានមិនពិត នាំឲ្យភាពចលាចលក្នុងសង្គម។ បើតាមអន្តរក្រសួង វិធានច្បាប់លើការផ្សព្វផ្សាយព័ត៌មានក្លែងក្លាយ នឹងចាប់ផ្ដើមអនុវត្តពីថ្ងៃទី៥ កក្កដាទៅ។
ក្រោយពីសង្កេតឃើញពលរដ្ឋភាគច្រើន កំពុងប្រើប្រាស់បណ្ដាញសង្គម និងចែករំលែកព័ត៌មានមិនពិត ដែលនាំឲ្យមានការយល់ច្រឡំពីស្ថានភាពសង្គមនោះ អន្តរក្រសួង បានចេញសេចក្តីប្រកាសព័ត៌មានរួមគ្នាមួយ ដោយប្រាប់ឲ្យអ្នកប្រើប្រាស់ទាំងនោះ មានការប្រុងប្រយ័ត្នមុននឹងផ្សព្វផ្សាយ។ បញ្ហាដែលក្រុមការងារអន្តរក្រសួង មើលឃើញនោះ គឺពលរដ្ឋបានប្រើប្រាស់បណ្ដាញសង្គមយ៉ាងទូលំទូលាយ ដោយការប្រើប្រាស់ជាវេទិកាបញ្ចេញមតិ វាយប្រហារគ្នាទៅវិញទៅមក យ៉ាងអនាធិបតេយ្យ ដែលធ្វើឲ្យប៉ះពាល់ដល់សេចក្តីថ្លៃថ្នូរនៅក្នុងសង្គម។ ក្រៅពីប្រើប្រាស់បណ្ដាញសង្គមជាវេទិកាវាយប្រហារគ្នាហើយ ការចែករំលែកព័ត៌មានមិនពិត និងការបង្កើតព័ត៌មានក្លែងក្លាយ ក៏ជារឿងដែលគួរឲ្យព្រួយបារម្ភផងដែរ។
ត្រង់ចំណុចនេះអគ្គនាយកនៃអគ្គនាយកដ្ឋានព័ត៌មាន និងសោតទស្សន៍ក្រសួងព័ត៌មាន លោក ផុស សុវណ្ណ បាននិយាយថា ក្រុមការងារអន្តរក្រសួង នឹងត្រួតពិនិត្យលើការផ្សព្វផ្សាយនានា របស់អ្នកប្រើប្រាស់បណ្ដាញសង្គម និងស្ថាប័នសារព័ត៌មាន ដែលផ្សព្វផ្សាយរាល់ទម្រង់អត្ថបទ ដល់សាធារណៈជន។
នៅពេលសួរថា តើការត្រួតពិនិត្យលើទម្រង់ព័ត៌មាននេះ ជាការរឹតបន្ដឹងលើការបញ្ចេញមតិដែរទេ? លោក ផុស សុវណ្ណ ឆ្លើយតបថា ការរៀបចំក្រុមការងារគ្រប់គ្រង់ព័ត៌មាននេះ គឺក្នុងគោលបំណងចង់ឲ្យអ្នកប្រើប្រាស់បណ្ដាញសង្គម និងការចេញផ្សាយព័ត៌មាន មានភាពត្រឹមត្រូវប៉ុណ្ណោះ ពោលមិនមែនចង់រឹតត្បិតសិទ្ធិបញ្ចេញមតិឡើយ។
ថ្លែងចំពោះមុខអ្នកកាសែត នៅទីស្ដីការក្រសួងព័ត៌មាន នៅថ្ងៃទី៤ កក្កដា អគ្គនាយកនៃអគ្គនាយកដ្ឋានព័ត៌មាន និងសោតទស្សន៍ក្រសួងព័ត៌មានរូបនេះ បានបញ្ជាក់ដូច្នេះថា៖«មានប្រតិកម្មកន្លងទៅ ថារដ្ឋាភិបាលដាក់សេចក្តីប្រកាសនេះទៅមានគោលបំណងអ្នកមាននិន្នាការផ្ទុយ តែធាតុពិតយើងមិនមែនទេ។ព្រោះប្រទេសយើងមានរបបច្បាប់សេរីភាពសារព័ត៌មានក៏មានចែង និងនៅក្នុងរដ្ឋធម្មនុញ្ញយើង ក៏មានចែងដែរ អំពីការធានាពីសេរីភាព។ តែដូចខ្ញុំនិយាយខាងដើមថា យើងចង់បានរបស់ល្អ ដែលគង់វង្ស ប៉ុន្តែបើយើងប្រើប្រាស់របស់នោះ ក្នុងទិសដៅផ្ទុយ ធ្វើឲ្យពលរដ្ឋអស់ជំនឿវានឹងធ្វើសាបរលាយឯង។ នៅពេលយើងនិយាយពីព័ត៌មានសង្គម គឺទាក់ទងនឹងព័ត៌មានក្លែងក្លាយ ហើយព័ត៌មានក្លែងក្លាយគឺយើងប្រឆាំងទាំងអស់គ្នា ទាំងនៅលើសាកលលោក អ្នកណាក៏ប្រឆាំងដែរ។ ព័ត៌មានក្លែងក្លាយនេះ មិនមែនជារឿងល្អពីព្រោះប្រទេសប្រជាធិបតេយ្យពិតប្រាកដ គឺយើងត្រូវការជម្រើស ព័ត៌មានល្អៗសម្រាប់ប្រជាជនសម្រេចចិត្ត»។
ប៉ុន្តែចំណុចដែលប្រជាពលរដ្ឋ និងមជ្ឈដ្ឋានទូទៅព្រួយបារម្ភ និងមានចម្ងល់នោះ គឺត្រង់ព័ត៌មានបែបណា ដែលខាងរដ្ឋាភិបាល ចាត់ទុកថា ជាព័ត៌មានក្លែងក្លាយ និងត្រូវទទួលទោសទណ្ឌតាមផ្លូវច្បាប់។ ត្រង់ចំណុចនេះលោក ផុស សុវណ្ណ បានឲ្យនិយមន័យថា ព័ត៌មានមិនពិត គឺជាព័ត៌មានដែលគ្មានហេតុការណ៍អ្វីកើតឡើង ដូចជាករណីផ្សព្វផ្សាយព័ត៌មានពីរឿងជនជាតិវៀតណាម ចាប់ក្មេងវះយកសេរីរាង្គជាដើម។ ព័ត៌មាននេះ ត្រូវបានលោក ផុស សុវណ្ណ អះអាងថា ជារឿងមិនពិត ដែលបានបង្កភាពចលាចលក្នុងសង្គមកន្លងមក។
បន្ថែមពីនេះលោក ផុស សុវណ្ណ បានពន្យល់ថា រាល់ព័ត៌មាន ដែលក្រុមការងារអន្តរក្រសួងត្រួតពិនិត្យ តាមដាន គឺមានការវាយតម្លៃ និងវិភាគច្បាស់លាស់ លើកម្រិតព័ត៌មានសិន មុននឹងប្រើវិធានការតាមផ្លូវច្បាប់។«ចាប់ពីស្អែកទៅ(៥ កក្កដា) យើងនឹងមានវិធានការខ្លះៗហើយ ។ តាមពិតយើងប្រុងប្រៀបយូរហើយ តែយើងទុកឱកាសធ្វើការងារជាមួយក្រសួងពាក់ព័ន្ធ ក្នុងការឆែកពិនិត្យ ថាតើព័ត៌មានប្រភេទណា កម្រិតណា ដែលយើងគួរធ្វើ។ យើងចាប់ផ្ដើមច្រោះហើយ សួរឆ្លងយោបល់ថ្នាក់ដឹកនាំ ថាតើយើងគួរមានវិធានការទេ គាត់មានកំហុសប៉ិនហ្នឹង ដោយការថ្លឹងថ្លែង ។ ក្រសួងព័ត៌មាន នឹងតួមុខគេ ដើម្បីត្រួតពិនិត្យមើល ហើយមិនទាន់បញ្ជូនអ្នកណាខុស អ្នកណាត្រូវ ប៉ុន្តែយើងមើលហើយថ្លឺងថ្លែងម្ដងហើយម្ដងទៀត ពីព្រោះយើងមានច្បាប់ផង មានក្រមសីលធម៌វិជ្ជាជីវៈផង»។ នេះជាការបញ្ជាក់របស់លោក ផុស សុវណ្ណ។
គួរបញ្ជាក់ថា ក្រុមការងារអន្តរក្រសួងនេះ មានក្រសួងព័ត៌មាន ក្រសួងមហាផ្ទៃ និងក្រសួងប្រៃសនីយ៍ និងទូរគមនាគមន៍ ។ ការបង្កើតក្រុមការងារអន្តរក្រសួងនេះ ក្នុងគោលបំណងគ្រប់គ្រង និងទប់ស្កាត់រាល់ការផ្សព្វផ្សាយ ឬការចែកចាយខ្លឹមសារព័ត៌មាន ឬសារជាអក្សរ សំឡេង រូបភាព វិដេអូ និងទម្រង់ផ្សេងទៀត ដែលមានចេតនា បង្កចលាចលបណ្ដាលឲ្យអន្តរាយដល់វិស័យការពារជាតិ សន្តិសុខជាតិ សណ្ដាប់ធ្នាប់សាធារណៈ និងទំនាក់ទំនងជាមួយប្រទេសដទៃជាដើម។ ក្រុមការងារអន្តរក្រសួង នឹងត្រូវទទួលភារកិច្ចលើផ្នែកនីមួយៗ នៅក្នុងកិច្ចការប្រឆាំងព័ត៌មានមិនពិតនេះ៕
Tag:
ក្រសួងព័ត៌មាន
ផុស សុវណ្ណ
ហ្វេសប៊ុក
© រក្សាសិទ្ធិដោយ thmeythmey.com