រដ្ឋាភិបាលជំរុញចលនាទេសចរក្នុងស្រុក ដោយខ្លាចខ្មែរអត់ស្គាល់ទឹកដីរបស់ខ្លួន

ជាតិ

សេដ្ឋកិច្ច

រដ្ឋាភិបាលជំរុញចលនាទេសចរក្នុងស្រុក ដោយខ្លាចខ្មែរអត់ស្គាល់ទឹកដីរបស់ខ្លួន

04, Jul 2018 , 6:59 pm

រូបភាព

ដោយ:

ភ្នំពេញ៖ ក្រសួងទេសចរណ៍បង្ហាញការប្ដូរផ្ដាច់របស់ខ្លួន ដើម្បីជំរុញចលនាដើរកម្សាន្តរបស់ពលរដ្ឋខ្មែរតាមតំបន់ទេសចរណ៍ក្នុងប្រទេស។

នៅក្នុងកិច្ចប្រជុំអំពីការរៀបចំពិព័រណ៍ទេសចរជាតិលើកទី១ រដ្ឋមន្ត្រីក្រសួងទេសចរណ៍ លោក ថោង ខុន បានបង្ហាញការតាំងចិត្តជំរុញចលនាដើរកម្សាន្ត ទៅកាន់រមណីយដ្ឋាន និងសហគមន៍ទេសចរណ៍នានានៅទូទាំងប្រទេស ដើម្បីឲ្យប្រជាពលរដ្ឋជ្រួតជ្រាបពីទឹកដីភូមិសាស្ត្រនៃប្រទេសជាតិខ្លួន។

«យើងចង់ជំរុញចលនាដើរកម្សាន្តក្នុងស្រុក ដើម្បីឲ្យពលរដ្ឋខ្មែរបានយល់ដឹងពីទឹកដី វប្បធម៌របស់ខ្លួន និងការអភិវឌ្ឍន៍។ ជួនកាលពួកគាត់បានលឺ តែមិនបានឃើញនឹងភ្នែករបស់ខ្លួន»។ នេះជាប្រសាសន៍របស់លោក ថោង ខុន នៅក្នុងកិច្ចប្រជុំខាងលើ ដែលធ្វើឡើងនៅថ្ងៃទី៣ខែកក្កដានេះ។

លោក ថោង ខុន បន្ថែមថា លោកចង់ឲ្យប្រជាជនបានស្គាល់ មិនមែនត្រឹមតែតំបន់ទេសចរណ៍ដ៏ស្រស់ស្អាតរបស់កម្ពុជាប៉ុណ្ណោះទេតែបានឃើញកន្លែងដាំដុះ ការផលិតនូវផលិតផលរបស់ភូមិសាស្ត្រនីមួយៗផងដែរ។ ឧទាហរណ៍ ម្រេចកំពត ស្រែអំបិល រោងចក្រផលិតស៊ីម៉ង់ត៍ តម្បាញជាដើម។

ការជំរុញចលនាទេសចរនេះ គឺក្រសួងចង់ឲ្យពលរដ្ឋខ្មែរស្គាល់គោលដៅទេសចរណ៍ឲ្យកាន់តែច្រើន មិនមែនត្រឹមតែតំបន់ល្បីៗ ដូចជា អង្គរវត្ត ឆ្នេរនៅក្រុងព្រះសីហនុ កែប ប៉ុណ្ណឹងនោះទេ។ ហើយការបំផុសចលនាទេសចរណ៍នេះ មិនមែនសំដៅតែសម្រាប់អ្នកមានធនធានច្រើននោះទេ តែសិស្សនិស្សិត កម្មករ ក៏ជាគោលដៅក្នុងចលនាដើរកម្សាន្តនេះដែរ។

ទោះយ៉ាងណា លោករដ្ឋមន្ត្រីទេសចរណ៍ ទទួលស្គាល់ថា នៅមានភាពខ្វះខាតក្នុងការរៀបចំតំបន់គោលដៅទេសចរណ៍មួយចំនួន និងកញ្ចប់ទេសចរណ៍សម្រាប់ពលរដ្ឋទូទៅ តែលោកអះអាងថានឹងបន្តជំរុញកិច្ចការនេះបន្ថែមទៀត។ លោកលើកឡើងដូច្នេះថា៖«ប្រជានជនមានលុយចាយ ហេតុអ្វីធ្វើសេវាល្អឲ្យគាត់អត់បាន។ ដូចនេះយើងត្រូវរៀបចំគោលដៅទេសចរណ៍ឲ្យបានល្អ និងមានភាពទាក់ទាញ»។

បន្ថែមពីនេះ រដ្ឋមន្ត្រីក្រសួងទេសចរណ៍រូបនេះ ឲ្យដឹងថា ក្រសួងនឹងរៀបចំគោលនយោបាយជំរុញចលនាដើរកម្សាន្តក្នុងស្រុក នាពេលខាងមុខនេះ។ «យើងចង់ធ្វើកិច្ចការនេះ ព្រោះប្រជាជនមានចំណូលច្រើនជាងមុន ត្រូវការដើរកម្សាន្តច្រើន។ ហើយយើងចង់ឲ្យពលរដ្ឋស្គាល់ទឹកដីរបស់ខ្លួន ដែលនឹងធ្វើឲ្យពួកគាត់មានមោទកភាព និងស្រលាញ់អ្វីដែលជារបស់ជាតិ»។

លោក ថោង ខុន មើលឃើញទេសចរក្នុងស្រុកមានសក្ដានុពលខ្ពស់ ដោយផ្អែកលើចំនួន និងការចាយវាយ ដែលនឹងហុចផលដល់សហគមន៍តាមមូលដ្ឋាននៃទីតាំងទេសចរណ៍។ លោកនិយាយថា ចលនាទេសចរណ៍ក្នុងស្រុក នឹងជាចលករនាំទេសចរណ៍អន្តរជាតិផងដែរ។ លោកថ្លែងដូចនេះថា៖«ឲ្យតែយើងរៀបគោលដៅទេសចរណ៍ សេវាទេសចរណ៍បានល្អ មានពលរដ្ឋខ្មែរដើរលេងច្រើន នោះទេសចរបរទេសក៏ចូលមកប្រទេសយើងកាន់តែច្រើនដែរ»។

បើតាមតួលេខដែលលើកឡើងដោយលោក ថោង ខុន ទេសចរក្នុងស្រុកបានកើនឡើងជាបន្តបន្ទាប់ ដោយក្នុងឆ្នាំ២០១៧ មានចំនួន ១០លាននិង៨សែននាក់ (សំដៅចំនួនលើកនៃការដើរកម្សាន្ត)៕