ជាតិ
បោះឆ្នោត
បើមិនចង់រងទណ្ឌកម្ម សម្តេច ស ខេង ហាមមន្ត្រីយកតួនាទី និងសម្ភាររដ្ឋបម្រើឲ្យការឃោសនាបោះឆ្នោត សម្តេចឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ។ រូបថត ThmeyThmey
× ភ្នំពេញ៖ មិនខុសពីលើកមុនៗឡើយ សម្តេចឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ បានចេញបញ្ជាណែនាំដល់មន្ត្រីរាជការទាំងអស់ចៀសឱ្យផុតពីការប្រើប្រាសតួនាទី ពេលវេលា និងសម្ភាររបស់រដ្ឋបម្រើឱ្យការឃោសនាបោះឆ្នោត។ សម្រាប់ការបោះឆ្នោតអណត្តិទី៦ខាងមុខនេះ ការឃោសនានឹងប្រព្រឹត្តរយៈពេល២១ថ្ងៃ ដោយចាប់ផ្តើមពី ថ្ងៃទី៧ ខែកក្កដា ខណៈការបោះឆ្នោតដំណើរការនៅថ្ងៃទី២៩ ខែកក្កដា។
«មន្ត្រីរាជការស៊ីវិល ត្រូវមានអព្យាក្រឹត្យភាពក្នុងសកម្មភាពបំពេញការងាររបស់ខ្លួនស្របតាមមាត្រា៣៧ នៃច្បាប់ស្តីពីសហលក្ខន្តិកៈមន្ត្រីរាជការស៊ីវិល នៃកម្ពុជា និងច្បាប់ស្តីពីការបោះឆ្នោតជ្រើសតាំងតំណាងរាស្ត្រនិងបទបញ្ជា និងនីតិវិធីសម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៦ តាមមាត្រា ៨២ និងមាត្រា៨៣»។ នេះជាការក្រើនរំលឹករបស់សម្តេច ស ខេង។
ច្បាប់ស្តីពីសហលក្ខន្តិកៈមន្ត្រីរាជការស៊ីវិល តម្រូវឱ្យរាជការមានអព្យាក្រឹត្យភាពក្នុងសកម្មភាពបំពេញការងារ ដោយហាមដាច់ខាតនូវការប្រើប្រាស់មុខងាររបស់ខ្លួន និងសម្ភាររបស់រដ្ឋដើម្បីបម្រើសកម្មភាពនយោបាយ រាល់និន្នាការ។ ការប្រព្រឹត្តផ្ទុយពីនេះ ត្រូវបានចាត់ទុកថាជាកំហុស និងជាការឆ្គាំឆ្គងក្នុងវិជ្ជាជីវៈ។
តាមមាត្រា៣៩នៃច្បាប់ខាងលើ អ្នកប្រព្រឹត្តកំហុស នឹងត្រូវរងទណ្ឌកម្មខាងវិន័យ តាមរយៈការស្តីបន្ទោស ស្តីបន្ទោសដោយមានចំណារក្នុងសំណុំលិខិតផ្ទាល់ខ្លួន ផ្លាស់ដោយបង្ខំតាមវិធានការវិន័យ លុបឈ្មោះចេញពីតារាងឡើងឋានន្តរស័ក្កិ ឬថ្នាក់ សម្រាប់ទណ្ឌកម្មថ្នាក់ទី១។
ចំពោះករណីធ្ងន់ធ្ងរខ្លាំង មន្ត្រីដែលប្រព្រឹត្តខុសត្រូវរងនូវទណ្ឌកម្មថ្នាក់ទី២ ដែលរួមមាន ការស្ដីបន្ទោសជាទម្ងន់ដែលឈានដល់ការលុបចេញពីតារាងឡើងស័ក្ក ឬថ្នាក់ប្រសិនជាមានឈ្មោះហើយ ការដាក់ឱ្យនៅទំនេរគ្មានបៀវត្ស ការបន្ថយឋានន្តរស័ក្ក ឬថ្នាក់ ឬច្រើនថ្នាក់ ការដាក់ឱ្យចូលនិវត្ដន៍មុនកំណត់ ឬបញ្ឈប់ពីការដោយបង្ខំ ការបណ្ដេញចេញពីមុខដំណែងរាជការជាដើម។
ដោយឡែក មាត្រា៨៣ នៃច្បាប់ស្តីពីការបោះឆ្នោតជ្រើសតាំងតំណាងរាស្ត្រ នីតិកាលទី៦ បានចែងថា មន្ត្រីគ្រប់លំដាប់ថ្នាក់ មិនត្រូវ ប្រើឥទ្ធិពល អំណាចតួនាទីរបស់ខ្លួនដោយប្រយោល ឬចំពោះទៅលើដំណើរការបោះឆ្នោត ដូចជាការនិយាយដោយផ្ទាល់ ឬប្រយោល ជាលាយលក្ខណ៍អក្សរ ដែលមានន័យគំរាមកំហែងដល់អាយុជីវិត រូបរាងកាយ ឬការប៉ុនប៉ងបំផ្លិចបំផ្លាញ ធ្វើឱ្យខូចខាតទ្រព្យសម្បត្តិ ការដាក់បង្ហាញ ឬប្រើប្រាស់នូវគ្រឿងសព្វាវុធ ដើម្បីបំភ័យ។
ការប្រើប្រាស់អាគារ ឬការិយាល័យរបស់រដ្ឋ ដើម្បីឃោសនាបោះឆ្នោតស្វែងរកសំឡេងឆ្នោតឱ្យគណបក្សនយោបាយ ឬបេក្ខជនណាមួយ ក៏ត្រូវហាមឃាត់ផងដែរ ហើយការចូលរួមសកម្មភាពឃោសនាគាំទ្រចំពោះគណបក្សនយោបាយណាមួយ ឬបេក្ខជនណាម្នាក់ អាចធ្វើទៅបានបន្ទាប់ពីបញ្ចប់ម៉ោងធ្វើការ ឬស្ថិតនៅក្រៅម៉ោងធ្វើការ ឬមិនស្ថិតនៅក្នុងពេលបំពេញការងារក្នុងសមត្ថភាពផ្លូវការ ប៉ុន្តែមិនត្រូវស្លៀកពាក់ឯកសណ្ឋាន ឬមានអាវុធជាប់នឹងខ្លួន និងមិនត្រូវធ្វើអ្វីដែលនាំឱ្យមានការគំរាមកំហែងឡើយ៕
© រក្សាសិទ្ធិដោយ thmeythmey.com