កាំកុងត្រូល ហាមមិនឲ្យទិញផលិតផលអាមេរិកមួយប្រភេទ ដែលផ្ទុកបាក់តេរី

ជាតិ

កាំកុងត្រូល ហាមមិនឲ្យទិញផលិតផលអាមេរិកមួយប្រភេទ ដែលផ្ទុកបាក់តេរី

05, Jul 2018 , 8:39 am

រូបភាព

ដោយ: អ៊ូ សុខមាន (OU Sokmean)

អគ្គនាយកដ្ឋានកម្ពុជាត្រួតពិនិត្យនីហរ័ណ អាហរ័ណ និងបង្ក្រាបការក្លែងបន្លំ (កាំកុងត្រូល) បានហាមប្រជាពលរដ្ឋ ទិញផលិតផល Kellogg's Honey Smacks Cereal ពីក្រុមហ៊ុន Kellogg របស់អាមេរិក ព្រោះមានការចម្លងបាក់តេរី Samonella ដែលបរិភោគទៅបណ្ដាឲ្យមានជំងឺប្រព័ន្ធរំលាយអាហារ និងគ្រុនពោះវៀន ពិសេសកុមារ និងស្ត្រីមានផ្ទៃពោះ ជាជនងាយរងគ្រោះថ្នាក់បំផុត។

សេចក្តីជូនដំណឹងរបស់កាំកុងត្រូល ដែលចុះនៅថ្ងៃទី៣ ខែកក្កដា បានឲ្យដឹងថា ការហាមនេះ ធ្វើឡើងបន្ទាប់ពីមានការស្រាវជ្រាវឃើញប្រភពនៃការពុលអាហារ បណ្តាលមកពីការទទួលទានផលិតផល Kellogg's Honey Smacks Cereal ដែលមានបាក់តេរី Samonella។

ក្នុងសេចក្តីជូនដំណឹងខាងលើ អគ្គនាយកដ្ឋានកាំកុងត្រូល បាននិងកំពុងទប់ស្កាត់ការនាំចូល និងការចែកចាយផលិតផលនេះលើទីផ្សារកម្ពុជា។ ជាមួយគ្នានេះ កាំកុងត្រូល នឹងចាត់វិធានការតាមច្បាប់ ប្រសិនបើមានការដាក់តាំងលក់ផលិតផលប្រភេទនះនៅលើទីផ្សារ៕