គិតត្រឹមថ្ងៃចន្ទនេះ ទឹកជំនន់ និងបាក់ដីនៅជប៉ុនសម្លាប់មនុស្ស៧៥នាក់ហើយ

អន្តរជាតិ

គិតត្រឹមថ្ងៃចន្ទនេះ ទឹកជំនន់ និងបាក់ដីនៅជប៉ុនសម្លាប់មនុស្ស៧៥នាក់ហើយ

09, Jul 2018 , 10:50 am

រូបភាព

ដោយ: ថ្មីៗ

ចំនួនអ្នកស្លាប់ដោយសារគ្រោះមហន្តរាយទឹកជំនន់និងបាក់ដីនៅក្នុងប្រទេសជប៉ុនកើនឡើងដល់ ៧៥នាក់ហើយគិតត្រឹមថ្ងៃចន្ទទី ៩ ខែកក្កដានេះ។ ចំនួនប្រជាជនដែលនៅបន្តបាត់ខ្លួននោះមានច្រើននាក់ផ្សេងទៀតដែរនៅតំបន់ភាគកណ្តាល និងខាងលិចប្រទេសជប៉ុននោះ។

តួលេខផ្លូវការ ៧៥នាក់នេះត្រូវបានទីភ្នាក់ងារព័ត៌មាន AFP បានស្រង់ចេញពីរបាយការណ៍រដ្ឋាភិបាលជប៉ុន។ ប៉ុន្តែខាងបណ្តាញផ្សព្វផ្សាយតំបន់បានអះអាងថា អ្នកស្លាប់ដោយសារករណីគ្រោះមហន្តរាយធម្មជាតិនេះកើនដល់ ៩០នាក់ឯណោះ ខណៈដែលប្រជាជនបាត់ខ្លួនមានប្រហែល ៧០នាក់ផ្សេងទៀត។

ឥឡូវនេះខាងក្រុមសង្គ្រោះ និងកងកម្លាំងទាហានបន្តឈ្មុសឈ្មុលដើម្បីឆ្លងកាត់ទឹក និងភក់ដើម្បីសង្គ្រោះជីវិតប្រជាជនប្រឈមគ្រោះថ្នាក់ និងកំពុងបាត់ខ្លួន។ ដោយសារស្ថានភាពមិនអំណោយផល ពួកគេត្រឹមអាចប្រើប្រាស់ទូក និងឧទ្ធម្ភាគចក្រប៉ុណ្ណោះដើម្បីជួយប្រជាជនរំដោះប្រជាជនដែលរងគ្រោះ។

បើតាមការបញ្ជាក់ពីអាជ្ញា ក្រុមសង្គ្រោះ ប៉ូលិស និងទាហានសរុបទាំងអស់ ៥០០០០នាក់ត្រូវបានគេពង្រាយទៅកាន់តំបន់រងគ្រោះដើម្បីឆ្លើយតបនឹងគ្រោះមហន្តរាយនេះ។
កាលពីថ្ងៃអាទិត្យទី ៨ ខែកក្កដា នាយករដ្ឋមន្ត្រីជប៉ុន ស៊ីនហ្សូ អាបេ បានព្រមានផងដែរពីផលលំបាកក្នុងការជួយសង្គ្រោះប្រជាជនដែលកំពុងដង្ហោយស្រែករកជំនួយ ស្របពេលស្ថានការណ៍ដែលអាចកាន់តែដុនដាបខ្លាំងដោយសារទឹកជំនន់បន្តកើនឡើងនោះ។

តាមពិតទៅ ចំនួនប្រជាជនដែលបាត់បង់ជីវិតបន្តកើនឡើងក្នុងរយៈពេលពីរបីថ្ងៃចុងក្រោយនេះ។ ប្រជាជនជប៉ុនប្រហែល ១,៥ លាននាក់ត្រូវជម្លៀសចេញពីលំនៅដ្ឋាន ខណៈ ៣លាននាក់ផ្សេងទៀតត្រូវអាជ្ញាធរណែនាំឲ្យត្រៀមខ្លួនចាកចេញដូចគ្នា។ ស្ថានភាពកាន់តែដុនដាបបានបង្ខំឲ្យប្រជាជនឡើងទៅលើដំបូលផ្ទះដើម្បីគេចផុតពីការកើនឡើងនៃកម្រិតទឹកជំនន់ និងរង់ចាំការជួយសង្គ្រោះពីអាជ្ញាធរផងដែរ។

សូមបញ្ជាក់ថា ចំនួនអ្នកស្លាប់កើនក្នុងគ្រោះមហន្តរាយទឹកជំនន់ និងបាក់ដីលើកនេះកើនឡើងខ្ពស់ជាងគ្រោះមហន្តរាយឆ្នាំ ២០១៤ នៅហ៊ីរ៉ូស៊ីម៉ាដែលអ្នកស្លាប់កាលនោះមានត្រឹម ៧៤ នាក់ប៉ុណ្ណោះ៕