ជាតិ
បោះឆ្នោត
គ.ជ.ប នឹងពិនិត្យទឹកថ្នាំជ្រលក់ដៃ នៅថ្ងៃទី១៧ កក្កដា
× ភ្នំពេញ៖ គណៈកម្មាធិការជាតិរៀបចំការបោះឆ្នោត (គ.ជ.ប) នឹងធ្វើសន្និសីទសារព័ត៌មានមួយ ជុំវិញគុណភាពទឹកថ្នាំជ្រលក់ដៃ សម្រាប់ការបោះឆ្នោត នៅថ្ងៃទី១៧ កក្កដា ដើម្បីជម្រះមន្ទិលសង្ស័យរបស់សាធារណៈជន។
អ្នកនាំពាក្យគ.ជ.ប លោក ហង្ស ពុទ្ធា បាននិយាយថា ទឹកថ្នាំដែលគ.ជ.ប បានបញ្ជាទិញពីក្រុមហ៊ុននៅឥណ្ឌានោះ បានមកដល់ដៃរបស់គ.ជ.ប ហើយ ។ គ.ជ.ប នឹងដាក់បង្ហាញទឹកថ្នាំនេះ នៅក្នុងសន្និសីទកាសែត ដោយមានភាគីខាងសង្គមស៊ីវិល អង្គទូត និងស្ថាប័នពាក់ព័ន្ធ ចូលរួមត្រួតពិនិត្យ និងជ្រលក់ដៃសាកល្បង ដើម្បីជម្រះមន្ទិលសង្ស័យផងដែរ។
ថ្លែងប្រាប់សារព័ត៌មានថ្មីៗ លោក ហង្ស ពុទ្ធា បាននិយាយថា៖«យើងនឹងដាក់ឲ្យពិនិត្យ និងជ្រលក់ដៃសាកល្បងលើកទីមួយ នៅព្រឹកម៉ោង១០ នៅថ្ងៃទី១៧ កក្កដា ដើម្បីឲ្យអ្នកពាក់ព័ន្ធនានា បានឃើញពីគុណភាពទឹកថ្នាំនេះ»។
លោក ហង្ស ពុទ្ធា បានបន្ថែមថា ប្រសិនជាការពិនិត្យទឹកថ្នាំសាកល្បងទីមួយនេះ នៅតែមិនអាចផ្ដល់ទំនុកចិត្ត ដល់សាធារណជនទេនោះ គ.ជ.ប នឹងរៀបចំសិក្ខាសាលាលើកទីពីរ ដោយមានការចូលរួមពីភាគីម្ចាស់ក្រុមហ៊ុន និងអ្នកផលិត មកពន្យល់ពីគុណភាពទឹកថ្នាំនេះ ។
«យើងមិនទាន់កំណត់ពេល បើកសិក្ខាសាលាលើកទី២នៅឡើយទេ ព្រោះយើងកំពុងរង់ចាំចម្លើយពីម្ចាស់ក្រុមហ៊ុនសិនថា តើគេអាចមកធ្វើបទបង្ហាញនៅពេលណា»។ នេះបើតាមអ្នកនាំពាក្យគ.ជ.ប ដែលបានបន្ថែមថា ទឹកថ្នាំសម្រាប់ប្រើប្រាស់ក្នុងការបោះឆ្នោត មានចំនួន៥១,០០០ដប ដោយស្មើនឹង២២កេស។
កន្លងមកអគ្គលេខាធិការរងគ.ជ.ប លោក សោម សូរីដា បានបញ្ជាក់ថា មូលហេតុដែលគ.ជ.ប បញ្ជាទិញទឹកថ្នាំពីឥណ្ឌានេះ ដោយសារវាមានគុណភាពខ្ពស់ សម្រាប់ប្រើប្រាស់ក្នុងការបោះឆ្នោត ថ្នាក់ឃុំ-សង្កាត់ កាលពីឆ្នាំ២០១៧កន្លងមក។ បើតាមលោក សូរីដា ទឹកថ្នាំដែល គ.ជ.ប បានបញ្ជាទិញនេះ មានតម្លៃ១៥,៧០ដុល្លារ ក្នុងមួយដប ដែលមានចំណុះ៧០មីលីលីត្រ ដោយចំណាយថវិកាសរុប៨០០,៧០០ដុល្លារ សម្រាប់ទឹកថ្នាំចំនួន៥១,០០០ដប។
មន្ត្រីជាន់ខ្ពស់នៃគណៈកម្មាធិការ ដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា (ខុមហ្វ្រែល) លោក កន សាវាង្ស បាននិយាយថា បញ្ហាទឹកថ្នាំគឺជារឿងមួយ ប៉ុន្តែវាមិនទាន់ជាដំណាក់កាលព្រួយបារម្ភដល់ការបោះឆ្នោតទេ។ សម្រាប់លោក កន សាវាង្ស ការបោះឆ្នោតដំណើរការល្អបាន លុះត្រាតែ គ.ជ.ប ប្រើប្រាស់វិធានការទាំង៥ ដែល គ.ជ.ប ធ្លាប់អនុវត្តការងារ ក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ កាលពីឆ្នាំ២០១៧។ យន្តការដែលលោក សាវាង្ស លើកឡើងនេះ គឹសំដៅទៅលើការទប់ស្កាត់ ការកេងបន្លំសន្លឹកឆ្នោត , បន្លំការបោះឆ្នោត និងការប្រើប្រាស់បញ្ជីឈ្មោះដោយមានរូបថត លុបបំបាត់ឈ្មោះស្ទួន និងឈ្មោះខ្មោចជាដើម៕
Tag:
ហង្ស ពុទ្ធា
ទឹកថ្នាំ
គ.ជ.ប
បោះឆ្នោត
© រក្សាសិទ្ធិដោយ thmeythmey.com