ព្រះមហាក្សត្រ ប្រទានប្រាក់១លានដុល្លារ ដល់មន្ទីរពេទ្យគន្ធបុប្ផា

ជាតិ

ព្រះមហាក្សត្រ ប្រទានប្រាក់១លានដុល្លារ ដល់មន្ទីរពេទ្យគន្ធបុប្ផា

13, Jul 2018 , 8:39 pm

រូបភាព

ដោយ: អ៊ូ សុខមាន (OU Sokmean)

ព្រះមហាក្សត្រ ព្រះបាទសម្តេចព្រះបរមនាថ នរោត្តម សីហមុនី និងសម្តេចព្រះមហាក្សត្រី សម្តេចព្រះនរោត្តម មុនិនាថ សីហនុ ព្រះវររាជមាតាជាតិ បានប្រទានព្រះរាជទ្រព្យ ១លានដុល្លារ ដល់មន្ទីរពេទ្យគន្ធបុប្ផា ដើម្បីបន្តកិច្ចការមនុស្សធម៌ជួយព្យាបាលកុមារកម្ពុជា។

រាជទ្រព្យ ១លានដុល្លារនេះ ត្រូវបានព្រះបាទ នរោត្តម សីហមុនី ប្រទាន៥០ម៉ឺនដុល្លារ និងព្រះមហាក្សត្រី ប្រទាន៥០ម៉ឺនដុល្លារ ដល់លោកវេជ្ជបណ្ឌិត ដេនិស ឡូរ៉ង់ (Denis Laurent) អនុប្រធានមន្ទីរពេទ្យគន្ធបុប្ផា កាលពីថ្ងៃទី១០ ខែកក្កដា ឆ្នាំ២០១៨។

លោក ដេនិស ឡូរ៉ង់ បានថ្លែងអំណរគុណចំពោះទ្រង់ ដោយចាត់ទុកថវិកានេះ ថាជាការរួមចំណែកយ៉ាងសំខាន់ ក្នុងការថែទាំព្យាបាលកុមារកម្ពុជា ដែលមកព្យាបាលក្នុងមន្ទីរពេទ្យគន្ធបុប្ផារាប់ពាន់នាក់ជារៀងរាល់ថ្ងៃ និងធ្វើឲ្យមន្ទីរពេទ្យមួយនេះ ក្លាយជាកន្លែងល្អប្រសើរដើម្បីព្យាបាលកុមារគ្រប់រូបនៅកម្ពុជា។

គិតមកដល់ចុងខែមិថុនា ឆ្នាំ២០១៨ មូលនិធិមន្ទីរពេទ្យគន្ធបុប្ផាកម្ពុជាមានសមាជិកស្ថាបនិក១០៨រូប និងសមាជិកកិត្តិយសរួមជាមួយសប្បុរសជនរាប់ម៉ឺននាក់។ មូលនិធិមន្ទីរពេទ្យគន្ធបុប្ផានេះ មានថវិកាជិត៤លានដុល្លារ និងប្រាក់រៀលជិត ៣ពាន់លានរៀល ក្នុងនោះកាកបាទក្រហមកម្ពុជា បានផ្តល់ថវិកា១លានដុល្លារ៕