ភ្នំពេញ៖ សមាសភាពគណៈមេប្រយោគទូទាំងប្រទេសសម្រាប់ផ្នែកសំណេរ នៃការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) មានដូចជា រដ្ឋមន្ត្រីក្រសួងអប់រំ យុវជននិងកីឡា រដ្ឋលេខាធិការ អនុរដ្ឋលេខាធិការ អគ្គនាយក អគ្គនាយករង អគ្គាធិការ អគ្គាធិការរង ប្រធាននាយកដ្ឋានកិច្ចការប្រឡង ប្រធាន អនុប្រធាន អង្គភាពថ្នាក់ជាតិ ប្រធានមន្ទីរអប់រំ យុវជននិងកីឡារាជធានី-ខេត្ត ប្រធាន អនុប្រធាន ការិយាល័យថ្នាក់ជាតិ និងបុគ្គលិកអប់រំតាមអង្គភាពថ្នាក់ជាតិ។
សេចក្ដីណែនាំស្ដីពី ការរៀបចំនិងការប្រព្រឹត្តទៅនៃការប្រឡងសញ្ញាបត្រមធ្យមសិក្សាទុតិយភូមិ សម្រាប់ឆ្នាំសិក្សា២០១៧-២០១៨ នៃក្រសួងអប់រំ បានឲ្យដឹងថា សម្រាប់សមាសភាពគណៈកម្មការអប្បមាទទូទាំងប្រទេស នៃមណ្ឌលសំណេរនីមួយៗត្រូវជ្រើសរើសក្នុងចំណោម អនុប្រធានអង្គភាពថ្នាក់ជាតិមួយចំនួន អនុប្រធានមន្ទីរអប់រំ យុវជននិងកីឡារាជធានី-ខេត្តមួយចំនួន ប្រធាន អនុប្រធានការិយាល័យថ្នាក់ជាតិមួយចំនួន ប្រធាន អនុប្រធានការិយាល័យនៃមន្ទីរអប់រំ យុវជននិងកីឡារាជធានី-ខេត្តមួយចំនួន និងបុគ្គលិកអប់រំថ្នាក់ជាតិមួយចំនួន។
ចំណែកឯ ប្រធានមណ្ឌលសំណេរ ត្រូវជ្រើសរើសក្នុងចំណោមប្រធាន អនុប្រធានការិយាល័យនៃមន្ទីរអប់រំ យុវជននិងកីឡារាជធានី-ខេត្តមួយចំនួន (ករណីចាំបាច់) ប្រធាន អនុប្រធានមន្ទីរអប់រំ យុវជននិងកីឡារាជធានី-ខេត្តមួយចំនួន ប្រធានការិយាល័យអប់រំ យុវជននិងកីឡា ស្រុក-ខណ្ឌមួយចំនួន និងបុគ្គលិកអប់រំតាមអង្គភាពថ្នាក់ជាតិមួយចំនួន។
រីឯ សមាសភាពគណៈកម្មការត្រួតពិនិត្យតាមអាគារ ត្រូវជ្រើសរើសក្នុងចំណោមគ្រូបង្រៀងថ្នាក់ទី១២ មុខវិជ្ជាមិនប្រឡងមួយចំនួន និងគ្រូបង្រៀនថ្នាក់ទី១២ មុខវិជ្ជាប្រឡងមួយចំនួន ដែលមិនបានស្នើជាគណៈកម្មការកំណែ បុគ្គលិកអប់រំនៃមន្ទីរអប់រំ យុវជននិងកីឡារាជធានី-ខេត្តមួយចំនួន និងបុគ្គលិកការិយាល័យអប់រំ យុវជននិងកីឡា ស្រុក-ខណ្ឌមួយចំនួន។
សម្រាប់សមាសភាពគណៈកម្មការអនុរក្ស ត្រូវជ្រើសរើសក្នុងចំណោមគ្រូបង្រៀងថ្នាក់ទី១០ និង១១ គ្រប់មុខវិជ្ជាមួយចំនួន និងបង្រៀងថ្នាក់ទី១២ មុខវិជ្ជាមិនប្រឡងមួយចំនួន និងមុខវិជ្ជាប្រឡងមួយចំនួន ដែលមិនបានស្នើជាគណៈកម្មការកំណែ បុគ្គលិកអប់រំនៃមន្ទីរអប់រំ យុវជននិងកីឡារាជធានី-ខេត្តមួយចំនួន និងបុគ្គលិកការិយាល័យអប់រំ យុវជននិងកីឡា ស្រុក-ខណ្ឌមួយចំនួន និងបុគ្គលិកទីចាត់ការនៃវិទ្យាល័យមួយចំនួន។
សេចក្ដីណែនាំខាងលើ បានបញ្ជាក់ថា សមាសភាពមេប្រយោគគ្រប់គណៈកម្មការទាំងអស់ ត្រូវជ្រើសរើសក្នុងចំណោមបុគ្គលិកអប់រំ ដែលមានសមត្ថភាព សុចរិតភាព បទពិសោធ ស្នាដៃល្អ និងមានភាពឈ្លាសវៃក្នុងការដោះស្រាយ ដែលនឹងកើតឡើងជាយថាហេតុ។ ហាមបញ្ចូលឈ្មោះបុគ្គលិកអប់រំ ដែលក្រសួងដាក់វិន័យរដ្ឋបាលផ្អាក់មិនឱ្យចូលរួមប្រឡងទៅតាមចំនួនឆ្នាំដែលបានកំណត់។ ក្នុងករណីធ្វេសប្រហែស ឬមានចេតនាបញ្ចូលឈ្មោះសមាសភាពនៅជាប់វិន័យរដ្ឋបាលនៅឡើយ សាមីអង្គភាព និងមន្ទីរអប់រំ យុវជននិងកីឡារាជធានី-ខេត្តនោះជាអ្នកទទួលខុសត្រូវ។ នេះបើតាមការបញ្ជាក់បន្ថែមក្នុងសេចក្ដីណែនាំដដែល។
គួរបញ្ជាក់ថា បេក្ខជនប្រឡងមានចំនួន ១១៧ ,០៦១នាក់ ក្នុងសម័យប្រឡងថ្ងៃទី២០ ខែសីហា ឆ្នាំ២០១៨ និងមណ្ឌលប្រឡងចំនួន ១៩៥មណ្ឌល នៅទូទាំងប្រទេស។ គណៈមេប្រយោគមានចំនួន ៣១,១០៨ នាក់ ដោយចែកចេញជាពីរដំណាក់កាលគឺ ដំណាក់ទី១ សំណេរ មានចំនួន ១៥,៨០០នាក់ និងដំណាក់កាលទី២ កំណែ មានចំនួន ១៤,៤០០នាក់៕