អន្តរជាតិ
ឡាវ ហៅវិធានការរឹតត្បិតទិដ្ឋាការរបស់អាមេរិកលើមន្ត្រីជាន់ខ្ពស់ ជារឿងមិនសមហេតុសមផល
រដ្ឋមន្រ្តីការបរទេសឡាវ Saleumxay Kommasith (រូបភាព Manila Bulletin)
×![]()
រដ្ឋាភិបាលក្រុងវៀងចន្ទន៍ បានសម្តែងការខកចិត្តខ្លាំងទៅនឹងវិធានការរបស់រដ្ឋាភិបាលក្រុងវ៉ាស៊ីនតោនក្នុងការរឹតត្បិតលើទិដ្ឋាការដល់មន្ត្រីជាន់ខ្ពស់ឡាវ។ ក្រុងវៀងចន្ទន៍ បានចាត់ទុកវិធាននេះ ជារឿងមិនសមហេតុសមផល និងធ្វើឲ្យប៉ះពាល់ដល់រូបភាពនៃទំនាក់ទំនងទ្វេភាគី។
ក្រសួងការបរទេសឡាវ នៅថ្ងៃ១០ កក្កដាកន្លងទៅ បានចេញថ្លែងការណ៍មួយដើម្បីឆ្លើយតបនឹងចំណាត់របស់ក្រសួងសន្តិសុខផ្ទៃក្នុងរបស់អាមេរិក ដែលដាក់ទណ្ឌកម្មប្រឆាំងនឹងឡាវតាមរយៈការរឹតត្បិតលើការផ្តល់ទិដ្ឋាការដល់ពលរដ្ឋឡាវ បន្ទាប់ពីរដ្ឋាភិបាលឡាវ បដិសេធទទួលពលរដ្ឋខ្លួនដែលផុតសុពលភាពក្នុងការរស់នៅក្នុងទឹកដីអាមេរិក។
តាមការចុះផ្សាយរបស់សារព័ត៌មានឡាវ Laotian Times ក្រសួងការបរទេសឡាវ បានសម្តែងការខកចិត្ត និងសោកស្តាយចំពោះការអនុវត្តទណ្ឌកម្មឯកតោភាគីរបស់អាមេរិកប្រឆាំងនឹងពលរដ្ឋឡាវ។ ក្រសួងឡាវ បានមើលឃើញថាសកម្មភាពរបស់អាមេរិកបែបនេះមិនមែនតម្លាភាព ហើយ វា ក៏ជះឥទ្ធិពលអវិជ្ជមានដល់ទំនាក់ទំនងឡាវ-អាមេរិក ដែលកំពុងតែរីកលូតលាស់។
តាមរយៈសេចក្តីថ្លែងការណ៍ដដែលនោះ ក្រសួងការបរទេសឡាវ បានពន្យល់ថា ឡាវ តែងតែឲ្យតម្លៃលើកិច្ចសហប្រតិបត្តិការជាមួយនឹងអាមេរិក និងការអនុវត្តច្បាប់។ លើបញ្ហានេះ ក្រសួង ក៏បានបកស្រាយថា រដ្ឋាភិបាលឡាវ ក៏បានបង្កើតគណៈកម្មការត្រួតពិនិត្យមួយដើម្បីវាយតម្លៃលើសំណើរបស់អាមេរិក ដែលជាលទ្ធផល រដ្ឋាភិបាលឡាវ ក៏បានព្រមទទួលយកពលរដ្ឋមួយចំនួនរួចហើយដែរ។ នេះ មានន័យថា រដ្ឋាភិបាលឡាវ មិនមែនមិនអើពើលើសំណើអាមេរិកឡើយ។
ជាមួយគ្នានេះ ក្រសួងរបស់ឡាវ ក៏បានឲ្យអាមេរិកដកចេញនូវវិធានការប្រឆាំងនឹងបែបនេះឲ្យបានឆាប់ ដើម្បីផលប្រយោជន៍រួមនៃប្រទេស និងប្រជាជនទាំងពីរ ហើយឡាវ ក៏បានត្រៀមខ្លួនរួចស្រេចដើម្បីបន្តកិច្ចសហប្រតិបត្តិការល្អជាមួយនឹងអាមេរិក។
សូមជម្រាបផងដែរ នៅថ្ងៃ៩ កក្កដាកន្លងទៅ ក្រសួងសន្តិសុខផ្ទៃក្នុងអាមេរិក បានប្រកាសផ្អាកផ្តល់ទិដ្ឋាការដល់មន្ត្រីជាន់ខ្ពស់របស់ក្រសួងសន្តិសុខសាធារណៈឡាវ ដែលមានឋានៈចាប់ពីអគ្គនាយកឡើងទៅ រួមទាំងក្រុមគ្រួសារពួកគេផងដែរ។ ចំណាត់ការធ្វើឡើង ដោយអាមេរិក ចាត់ទុកឡាវ ជារដ្ឋរឹងរូសក្នុងការទទួលយកសំណើរបស់ខ្លួនពាក់ព័ន្ធនឹងពលរដ្ឋឡាវរស់នៅខុសច្បាប់ក្នុងប្រទេសខ្លួន៕
Tag:
ឡាវ
អាមេរិក
© រក្សាសិទ្ធិដោយ thmeythmey.com
