ភ្នំពេញ៖ ក្រសួងអប់រំ យុវជននិងកីឡា បានកំណត់យកវិទ្យាល័យចំនួន ១០ នៅរាជធានីភ្នំពេញ ធ្វើជាមណ្ឌលកំណែប្រឡងសញ្ញាបត្រមធ្យមសិក្សាទុតិយភូមិចំណេះទៅទូទៅ និងបំពេញវិជ្ជា សម័យប្រឡង ២០ សីហា ២០១៨ ដោយមួយមណ្ឌលកំណែកែមួយមុខវិជ្ជា។ នេះបើតាមសេចក្ដីណែនាំ ស្ដីពីការរៀបចំ និងការប្រព្រឹត្តទៅនៃការប្រឡងសញ្ញាបត្រមធ្យមសិក្សាទុតិយភូមិ សម្រាប់ឆ្នាំសិក្សា២០១៧-២០១៨ នៃក្រសួងអប់រំ។
សេចក្ដីណែនាំខាងលើបានឱ្យដឹងថា មណ្ឌលកំណែ វិទ្យាល័យទាំង ១០ រួមមានដូចខាងក្រោម៖
ទី១.មណ្ឌលកំណែ វិទ្យាល័យព្រះស៊ីសុវត្ថិ សម្រាប់មុខវិជ្ជា អក្សរសាស្ត្រខ្មែរ, ទី២.មណ្ឌលកំណែ វិទ្យាល័យបាក់ទូក សម្រាប់មុខវិជ្ជា គណិតវិទ្យា, ទី៣.មណ្ឌលកំណែ វិទ្យាល័យចតុមុខ សម្រាប់មុខវិជ្ជា ភាសបរទេស, ទី៤.មណ្ឌលកំណែ វិទ្យាល័យវត្តកោះ សម្រាប់មុខវិជ្ជា រូបវិទ្យា, ទី៥.មណ្ឌលកំណែ វិទ្យាល័យព្រះយុគន្ធរ សម្រាប់មុខវិជ្ជា គីមីវិទ្យា។
ទី៦.មណ្ឌលកំណែ វិទ្យាល័យទូលទំពូង សម្រាប់មុខវិជ្ជា ជីវវិទ្យា, ទី៧មណ្ឌលកំណែ វិទ្យាល័យជាស៊ីមបឹងកេងកង សម្រាប់មុខវិជ្ជា ភូមិវិទ្យា, ទី៨.មណ្ឌលកំណែ វិទ្យាល័យហ៊ុនសែនប៊ុនរ៉ាវត្តភ្នំ សម្រាប់មុខវិជ្ជា ប្រវត្តិវិទ្យា, ទី៩.មណ្ឌលកំណែ វិទ្យាល័យជាស៊ីមសន្ធរមុខ សម្រាប់មុខវិជ្ជា សីលធម៌-ពលរដ្ឋវិជ្ជា, ទី១០.មណ្ឌលកំណែ វិទ្យាល័យបឹងត្របែក សម្រាប់មុខវិជ្ជា ផែនដីនិងបរិស្ថានវិទ្យា។
សេចក្ដីណែនាំដដែល បានបន្តថា កិច្ចការបេក្ខជននីមួយៗ ត្រូវកែដោយអ្នកកែពីរនាក់ដាច់ខាត និងគោរពតាមអត្រាកំណែដែលគណៈមេប្រយោគបានសម្រេច។ ចំណែកឯកកិច្ចការបេក្ខជនពិការភ្នែក ត្រូវធ្វើកំណែពិសេស ដោយគ្រូបង្រៀនសិស្សពិការភ្នែក ទៅតាមអត្រាកំណែដោយឡែក។
ចំពោះដំណើរការកំណែប្រឹត្តទៅចាប់ពីថ្ងៃទី២៣ ដល់ថ្ងៃទី២៩ ខែសីហា ឆ្នាំ២០១៨។ ការស្រង់ និងបូកពិន្ទុដោយកុំព្យូទ័រប្រព្រឹត្តទៅនៅការិយាល័យប្រឡងចំណេះទូទៅ និងអប់រំបច្ចេកទេស នៃនាយកដ្ឋានកិច្ចការប្រឡង ចាប់ពីថ្ងៃទី៣០ ខែសីហា ដល់ថ្ងៃទី៩ ខែកញ្ញា។ ការពិនិត្យផ្ទៀងផ្ទាត់លទ្ធផលប្រឡង ប្រព្រឹត្តនៅវិទ្យាស្ថានជាតិអប់រំ។ នេះបើតាមការឱ្យដឹងសេចក្ដីណែនាំរបស់ក្រសួងអប់រំ និងបានបន្ថែមថា ការប្រកាសលទ្ធផលប្រឡងសញ្ញាបត្រមធ្យមទុតិយភូមិនៅថ្ងៃទី១១ ខែកញ្ញា ឆ្នាំ២០១៨ សម្រាប់មណ្ឌលប្រឡងនៅរាជធានីភ្នំពេញ និងកណ្ដាល ហើយនិងនៅថ្ងៃទី១២ សម្រាប់មណ្ឌលប្រឡងខេត្តដទៃទៀត។
គូសបញ្ជាក់ថា បេក្ខជនមានឈ្មោះប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជា មានចំនួន ១១៧ ,០៦១នាក់ ក្នុងសម័យប្រឡងថ្ងៃទី២០ ខែសីហា ឆ្នាំ២០១៨ និងមណ្ឌលប្រឡងចំនួន ១៩៥មណ្ឌល ចែកចេញជា ៤,៧១៦បន្ទប់ នៅរាជធានី-ខេត្តទាំង២៥ ទូទាំងប្រទេស៕