ប៉ូលិសឥណ្ឌូណេស៊ី បាញ់សម្លាប់ជនសង្ស័យឧក្រិដ្ឋកម្ម១១នាក់មុនរៀបចំ Asian Games

កីឡាអន្តរជាតិ

អន្តរជាតិ

ប៉ូលិសឥណ្ឌូណេស៊ី បាញ់សម្លាប់ជនសង្ស័យឧក្រិដ្ឋកម្ម១១នាក់មុនរៀបចំ Asian Games

17, Jul 2018 , 3:07 pm

រូបភាព

ឥណ្ឌូណេស៊ី រឹតបន្តឹងសន្តិសុខ ខណៈពួកគេត្រៀមរៀបចំព្រឹត្តិការណ៍ Asian Games។ រូបថត AFP

ដោយ: រួបរួម

ប៉ូលិសឥណ្ឌូណេស៊ី បានបាញ់ប្រហារ និងសម្លាប់ជនសង្ស័យ១១នាក់ ពាក់ព័ន្ធនឹងបទឧក្រិដ្ឋ ដែលអាចគំរាមកំហែងដល់ការរៀបចំព្រឹត្តិការណ៍ Asian Games នាខែក្រោយ។ អាជ្ញាធរប៉ូលិស បានថ្លែងប្រាប់ AFP បន្ថែមថា ជនសង្ស័យរាប់សិបនាក់ទៀត ក៏រងរបួសផងដែរ។

បើគិតចាប់តាំងពីដើមខែកក្កដា មក មនុស្សប្រមាណ៥២នាក់ ត្រូវអាជ្ញាធរប៉ូលិសបាញ់ចំក្នុងប្រតិបត្តិការចាប់ខ្លួននៅក្នុងក្រុងហ្សាការតា។ លោក Argo Yuwono អ្នកនាំពាក្យប៉ូលិសក្រុងហ្សាការតា បានអះអាងថា អ្នកទាំងអស់នោះ ជាជនដែលបង្ករគ្រោះថ្នាក់ដល់សន្តិសុខសាធារណៈ។

ជាលទ្ធផល មនុស្ស១១នាក់ បានស្លាប់ និងជាច្រើននាក់រងរបួស ហើយជាមួយគ្នានេះផងដែរ ជនសង្ស័យបទឧក្រិដ្ឋប្រមាណ២០០០នាក់ទៀត ត្រូវបានចាប់ខ្លួននារយៈពេលប៉ុន្មានសប្តាហ៍ចុងក្រោយនេះ។

បើតាម AFP អាជ្ញាធរឥណ្ឌូណេស៊ី បើកប្រតិបត្តិការប្រឆាំងនឹងការគំរាមកំហែងអំពើភេរវកម្ម ខណៈទីក្រុងហ្សាការតា រួមជាមួយក្រុង Pelembang និង West Java នឹងធ្វើជាម្ចាស់ផ្ទះនៃព្រឹត្តិការណ៍កីឡាប្រចាំទ្វីបអាស៊ី Asian Games ពីថ្ងៃទី១៨ ខែសីហា ដល់ថ្ងៃទី២ ខែកញ្ញា។

សម្រាប់ព្រឹត្តិការណ៍ខាងមុខ ឥណ្ឌូណេស៊ី នឹងដាក់ពង្រាយកងកម្លាំងប្រមាណ១០០ ០០០នាក់ ដើម្បីការពារសុវត្ថិភាពជូនដល់អត្តពលិក ១១០០០នាក់មកពី៤៥ប្រទេស ដោយ Asian Games ត្រូវបានចាត់ទុកជាព្រឹត្តិការណ៍ធំលំដាប់ទីពីរបន្ទាប់ពីកីឡាអូឡាំពិក៕