គ.ជ.ប. ទទួលបានអ្នកសង្កេតការណ៍ពេញសិទ្ធិជាង៥ម៉ឺននាក់ មកពី១៤បក្ស

ជាតិ

បោះឆ្នោត

គ.ជ.ប. ទទួលបានអ្នកសង្កេតការណ៍ពេញសិទ្ធិជាង៥ម៉ឺននាក់ មកពី១៤បក្ស

17, Jul 2018 , 6:59 pm

រូបភាព

ដោយ: ថ្មីៗ

ដោយគិតត្រឹមថ្ងៃទី១៥ ខែកក្កដា មានអ្នកសង្កេតការណ៍ពេញសិទ្ធិជាង៥ម៉ឺននាក់ និងបម្រុងជិត៣ម៉ឺននាក់ហើយ ដែលគណៈកម្មាធិការជាតិរៀបចំការបោះឆ្នោត (គ.ជ.ប.) ទទួលបានពីគណបក្សចំនួន១៤ ក្នុងចំណោមគណបក្សទាំង២0។ នេះបើតាមសេចក្តីប្រកាសព័ត៌មានរបស់គ.ជ.ប.។

សេចក្តីប្រកាសព័ត៌មាន បង្ហាញថា គណបក្សប្រជាជនកម្ពុជា បានដាក់អ្នកសង្កេតការណ៍ច្រើនជាងគេ ដែលអ្នកពេញសិទ្ធិមានរហូតដល់ទៅជាង២ម៉ឺននាក់ និងបម្រុងជាង២ម៉ឺននាក់។
ឯគណបក្សទាំង៦ ដែលមិនទាន់ឃើញបញ្ជូនបញ្ជីឈ្មោះអ្នកសង្កេតការណ៍ទៅគ.ជ.ប. គឺគណបក្សពន្លឺថ្មី គណបក្សខ្មែរក្រោក គណបក្សខ្មែរសាធារណរដ្ឋ គណបក្សខ្មែរឈប់ក្រ គណបក្សធម្មាធិបតេយ្យ និងគណបក្សឆន្ទៈខ្មែរ។

លោក ឌឹម សុវណ្ណារុំ អ្នកនាំពាក្យគ.ជ.ប. បានសរសេរសារក្នុងបណ្តាញទំនាក់ទំនងតេឡេក្រាមយ៉ាងដូច្នេះថា៖«ភ្នាក់ងារគណបក្សនយោបាយ គឺជាសាក្សីនៃការបោះឆ្នោតដោយសេរី ត្រឹមត្រូវ និងយុត្តិធម៌ នៅគ្រប់ការិយាល័យ»។

ថ្ងៃទី២៣ ខែកក្កដា គឺជាថ្ងៃផុតកំណត់ ដែលឈប់ទទួលអ្នកសង្កេតការណ៍មកពីគណបក្សនយោបាយ និងសង្គមស៊ីវិលក្នុងស្រុក។

បច្ចុប្បន្ន គណបក្សទាំង២0 កំពុងនាំគ្នាឃោសនារកសំឡេងឆ្នោត។ ការបោះឆ្នោត នឹងប្រព្រឹត្តទៅនៅថ្ងៃទី២៩ ខែកក្កដា។ ប្រជាពលរដ្ឋ ដែលមានឈ្មោះក្នុងបញ្ជីបោះឆ្នោត មានជាង ៨,៣ លាននាក់៕

អត្ថបទទាក់ទង

គ.ជ.ប. ទទួលបានអ្នកសង្កេតការបោះឆ្នោតជាង៤ពាន់នាក់ហើយ