អន្តរជាតិ
លោក ត្រាំ៖ គ្មានពេលកំណត់ឡើយក្នុងការរំសាយនុយក្លេអ៊ែរកូរ៉េខាងជើង រូបភាព AFP
× មកទល់ពេលនេះ វាមានរយៈពេលជាងមួយខែហើយក្រោយជំនួបមេដឹកនាំអាមេរិក និងកូរ៉េខាងជើងនៅសិង្ហបុរី។ អាមេរិក និងកូរ៉េខាងជើងបានឯកភាពគ្នារំសាយនុយក្លេអ៊ែររបស់ក្រុងព្យុងយ៉ាងទាំងស្រុង។ ជាងមួយខែមកនេះ គេក៏មិនទាន់ឃើញមានដំណើរការអ្វីគួរឲ្យកត់សម្គាល់លើបញ្ហានេះដែរ។ ប្រធានាធិបតីអាមេរិក ដូណាល់ ត្រាំ នៅថ្ងៃទី១៧ ខែកក្កដា ស្រាប់តែនិយាយថា ការរំសាយនុយក្លេអ៊ែរធ្វើឡើងដោយមិនមានកំណត់ពេលឡើយ។
ប្រធានាធិបតីអាមេរិក ដូណាល់ ត្រាំ ហាក់ដើរថយមួយជំហាននៅក្នុងការទាមទារឲ្យកូរ៉េខាងជើងបោះបង់នុយក្លេអ៊ែររបស់ខ្លួន។ បន្ទាប់ពីឯកភាពជាមួយមេដឹកនាំកូរ៉េខាងជើង គីម ជុងអ៊ុន ក្នុងការរំសាយនុយក្លេអ៊ែរទាំងស្រុង ប្រធានាធិបតីរូបនេះប្រកាសពីការចាប់ផ្ដើមភ្លាមៗនៃដំណើរការនេះ។ ប៉ុន្តែនៅថ្ងៃទី១៧ ខែកក្កដា លោក ត្រាំ បែរជាយល់ថា គ្មានការបន្ទាន់ក្នុងការលុបបំបាត់នុយក្លេអ៊ែរភ្លមៗទៀតឡើយ។
តាមពិតទៅ លោក ត្រាំ តែងចង់ឲ្យមានការរំសាយនុយក្លេអ៊ែរឲ្យបានឆាប់តាមការព្រមព្រៀងរវាងលោក និងលោក គីម នៅសិង្ហបុរី ប៉ុន្តែមេដឹកនាំទាំងពីរបានបញ្ជាក់ច្បាស់ពីពេលវេលាឡើយ និងទុកឲ្យមន្ត្រីប្រទេសទាំងពីរជួបចរចាគ្នាដើម្បីមានចំណាត់បន្ទាប់ទៀត។ យោងតាមទីភ្នាក់ងារព័ត៌មាន AFP លោក ត្រាំ និយាយដូច្នេះថា៖ «ការពិភាក្សាកំពុងធ្វើឡើង ហើយធ្វើឡើងដោយរលូន។ យើងមិនមានកំណត់ពេលឡើយ និងគ្មានល្បឿនកំណត់ទៀតផង។»
មុនជំនួបថ្ងៃទី១២ ខែមិថុនា នៅសិង្ហបុរី ក្រុងវ៉ាស៊ីនតោនតែងនិយាយជារឿយៗថា ការរំសាយនុយក្លេអ៊ែររបស់កូរ៉េខាងជើង នឹងធ្វើឡើងដោយគ្មានការពន្យារពេលអ្វីទេ ហើយក្រោយជំនួបនេះ ក្រុងវ៉ាស៊ីនតោនក៏នៅតែនិយាយថា ការលុបបំបាត់អាវុធនេះនឹងចាប់ផ្ដើមភ្លាមៗដែរ។ គិតត្រឹមថ្ងៃទី១៨ ខែកក្កដា វាមានរយៈពេលមួយខែ និង៦ថ្ងៃហើយ ប៉ុន្តែគ្មានសកម្មភាពផ្លែផ្កាអ្វីទាល់តែសោះជុំវិញសំណុំរឿងដ៏ធំមួយនេះ។
ក្នុងគោលដៅឈានទៅបញ្ចប់បញ្ហានុយក្លេអ៊ែរនេះ រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ ក៏បានទៅកាន់រដ្ឋធាននីព្យុងយ៉ាងដើម្បីជួបជជែកជាមួយមន្ត្រីកូរ៉េខាងជើង សំដៅអនុវត្តតាមកិច្ចព្រមព្រៀងថ្ងៃទី១២ ខែមិថុនា។ ជំនួបនេះមិនមានលទ្ធផលដុំកំភួនអ្វីទេ តែបង្ហាញពីការខ្វែងគំនិតគ្នារវាងអាមេរិក និងកូរ៉េខាងជើងទៅទៀត។ ខណៈលោក ប៉ុមប៉េអូ អះអាងថា ការចរចាធ្វើឡើងដោយល្អប្រសើរនោះ កូរ៉េខាងជើងឯណោះបែរជារិះគន់អាមេរិក ដែលទាមទារជាឯកតោភាគីឲ្យខ្លួនបោះបង់នុយក្លេអ៊ែរ។
ជាមួយនឹងការប្រកាសថា ការរំសាយនុយក្លេអ៊ែរនឹងធ្វើឡើងដោយគ្មានពេលកំណត់បែបនេះ លោក ត្រាំ ទំនងជាចង់ទទួលស្គាល់ថា ការដោះស្រាយបញ្ហាជាមួយកូរ៉េខាងជើងមិនមែនស្រួលដូចមាត់ថានោះឡើយ។ ឯការលុបបំបាត់នុយក្លេអ៊ែរនេះទៀតសោត ក៏មិនអាចបញ្ចប់ក្នុងអាណត្តិរបស់លោក ត្រាំ នៅឆ្នាំ២០២១ ដូចការគុណគូររបស់លោក ប៉ុមប៉េអូ ដែរ ខណៈដែលកូរ៉េខាងជើងហាក់លេងល្បែងអូសបន្លាយពេលវេលទៅទៀតនោះ៕
Tag:
អាមេរិក
កូរ៉េខាងជើង
ដូណាល់ ត្រាំ
គីម ជុងអ៊ុន
នុយក្លេអ៊ែរ
© រក្សាសិទ្ធិដោយ thmeythmey.com