ជាតិ
ក្រសួងធនធានទឹក៖ ឆ្នាំនេះ នឹងមានជំនន់ទឹកភ្លៀងកើតឡើងញឹកញាប់
× ភ្នំពេញ៖ ឆ្នាំ២០១៨នេះ កម្ពុជា បានទទួលរងឥទ្ធិពលច្រើនពីបាតុភូតឡាលីណា ដែលធ្វើឲ្យមានភ្លៀងធ្លាក់ច្រើន ទាំងក្នុងប្រទេស និងផ្ទៃរកតំបន់ទន្លេមេគង្គ។ តាមការព្យាករ ភ្លៀងធ្លាក់ច្រើនក្នុងឆ្នាំនេះ អាចនឹងមានជំនន់ទឹកភ្លៀងកើតឡើងជាញឹកញាប់ ហើយទឹកទន្លេវិញ អាចនឹងឡើងខ្ពស់ផងដែរ។ នេះបើតាមលោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយម។
ការព្យាករអាកាសធាតុរបស់ក្រសួងធនធានទឹកនាពេលកន្លងមក បង្ហាញថា នៅក្របខណ្ឌតំបន់ក្នុងប្រទេសកម្ពុជា បានទទួលឥទ្ធិពលច្រើន ពីបាតុភូតឡាលីណា ហើយឥទ្ធិពលនេះធ្វើឲ្យមានភ្លៀងធ្លាក់ច្រើន។ លោក ចាន់ យុត្ថា បានប្រាប់សារព័ត៌មានថ្មីៗ តាមទូរសព្ទយ៉ាងដូច្នេះ៖«ក្នុងឆ្នាំ២០១៨នេះ កម្ពុជា បានទទួលរងឥទ្ធិពលច្រើនពីបាតុភូតឡាលីណា ធ្វើឲ្យមានភ្លៀងធ្លាក់ច្រើន ទាំងក្នុងប្រទេស និងផ្ទៃរកតំបន់ទន្លេមេគង្គ ពិសេសអំឡុងខែ៨ និងខែ៩។ តាមការព្យាករ ឆ្នាំនេះ មានភ្លៀងច្រើនជាងឆ្នាំកន្លងទៅ»។
អ្នកនាំពាក្យដដែលបន្តថា ភ្លៀងធ្លាក់ច្រើនជាបន្តបន្ទាប់ នឹងធ្វើឲ្យមានជំនន់ទឹកភ្លៀងកើតឡើងជាញឹកញាប់ ហើយទឹកទន្លេ មានកម្ពស់ខ្ពស់ ដែលជាជំនន់ធំ ប៉ុន្តែការប៉ះពាល់មានតិចតួចប៉ុណ្ណោះ។ ជាមួយគ្នានេះ ទឹកទន្លេមេគង្គលើនឹងហក់ឡើង នៅល្ងាចថ្ងៃទី១៨ កក្កដានេះ ដោយហូរចូលព្រែក និងតំបន់នានា ដែលស្ថិតនៅអមសងខាងទន្លេមេគង្គ រួមមានខេត្តស្ទឹងត្រែង ក្រចេះ ត្បូងឃ្មុំ និងកំពង់ចាម ហើយការហក់ឡើង មិនទាន់មានចំណុចប្រកាសអាសន្ននៅឡើយទេ។
ទាក់ទងនឹងជំនន់ទឹកភ្លៀង ក្នុងខេត្តកំពង់ស្ពឺ និងព្រះសីហនុ ដែលកំពុងទទួលរងគ្រោះ ក្រសួងធនធានទឹក ក៏មានវិធានការបច្ចេទេស និងត្រៀមគ្រឿងចក្រធន់ធ្ងន់ ដើម្បីអន្តរាគមន៍ស្ថានការណ៍ជាក់ស្ដែងផងដែរ៕
Tag:
ជំនន់ទឹកភ្លៀង
អាកាសធាតុ
ភ្លៀង
ចាន់ យុត្ថា
© រក្សាសិទ្ធិដោយ thmeythmey.com