កម្ពុជា នឹងរងឥទ្ធិពលពីព្យុះម្យ៉ាង ដែលបណ្តាលឲ្យមានភ្លៀងនិងខ្យល់ខ្លាំង ពីថ្ងៃទី១៩ ដល់ថ្ងៃទី២១ កក្កដា

ជាតិ

កម្ពុជា នឹងរងឥទ្ធិពលពីព្យុះម្យ៉ាង ដែលបណ្តាលឲ្យមានភ្លៀងនិងខ្យល់ខ្លាំង ពីថ្ងៃទី១៩ ដល់ថ្ងៃទី២១ កក្កដា

18, Jul 2018 , 7:19 pm

រូបភាព

ដោយ: ថ្មីៗ

ក្រសួងធនធានទឹក និងឧតុនិយម បានប្រកាសថា ព្យុះឈ្មោះ សុនទីញ កំពុងស្ថិតនៅភាគខាងកើតនៃកោះហៃណាំ ហើយនឹងធ្វើដំណើរទៅដល់ឆ្នេរតុងកឹង នៃប្រទេសវៀតណាម នៅយប់ថ្ងៃទី១៩ ខែកក្កដា ឆ្នាំ២០១៨។ តាមរយៈសេចក្តីជូនដំណឹង ក្រសួងធនធានទឹក បានអះអាងថា កម្ពុជា នឹងរងឥទ្ធិពលពីព្យុះនេះ ដែលបណ្តាលឲ្យមានខ្យល់មូសុងនិរតីខ្លាំង។

ក្រសួងធនធានទឹក បានបន្ថែមថា ចាប់ពីថ្ងៃទី១៩ ដល់ថ្ងៃទី២១ ខែកក្កដា ឥទ្ធិពលនៃព្យុះនេះ នឹងបង្កឲ្យផ្ទៃមេឃអាប់អួ មានពពកច្រើន និងមានភ្លៀងធ្លាក់រាយប៉ាយ នៅទូទាំងប្រទេសកម្ពុជា។ ក្រសួង បញ្ជាក់ថា តំបន់ដែលនឹងមានភ្លៀងធ្លាក់ខ្លាំងជាងគេ គឺតំបន់មាត់សមុទ្រ តំបន់ខ្ពង់រាប តំបន់ជួរភ្នំ និងបណ្តាខេត្ត ដែលស្ថិតនៅតាមបណ្តោយព្រំដែនកម្ពុជា-វៀតណាម។

ក្រសួង បានប្រាប់ឲ្យប្រជាពលរដ្ឋ ដែលរស់នៅតាមតំបន់ទំនាបជាប់ផ្លូវទឹកនានា ជាពិសេសអ្នកនេសាទ និងអ្នកធ្វើដំណើរតាមសមុទ្រ បង្កើនការប្រុងប្រយ័ត្នឲ្យបានខ្ពស់ ដើម្បីជៀសវាងគ្រោះថ្នាក់ផ្សេងៗ៕